Սամվել Կարապետյանը դիմել է կողմնակիցներին. Հայաստանը պետք է դառնա անվտանգ, խաղաղ, հարուստ և ուժեղ երկիր

Արմինֆո. Հայաստանը պետք է դառնա անվտանգ, խաղաղ, հարուստ և ուժեղ երկիր՝ մի երկիր, որտեղ կառավարիչները ոչ թե կդատարկեն բյուջեն սեփական հարստացման համար, այլ ընդհակառակը՝ կդատարկեն իրենց գրպանները հանուն հայրենիքի բարօրության: Այս մասին հայտարարել է «Ուժեղ Հայաստան» կուսակցության առաջնորդ, գործարար Սամվել Կարապետյանը՝ Երևանի Ազատության հրապարակում քաղաքական ուժի կողմից այսօր հրավիրված հանրահավաքի մասնակիցներին ուղղված տեսաուղերձում։

«Ես գտնվում եմ կալանքի տակ՝ եկեղեցու և մեր ինքնության պաշտպանության համար։ Ես բարձրացրել եմ ձայնս մի վարչակարգի դեմ, որը մեր ժողովրդին պահում է աղքատության, պատերազմի, վախերի և պառակտման մեջ։ Թեև ես այս պահին անձամբ ձեր կողքին չեմ, բայց միանում եմ ձեր բոլորի ձայներին։ Միասին մենք այն ուժն ենք, որը փոփոխություններ կբերի, և այդ ուժն անկասելի է»,- ասել է Կարապետյանը։

Նա հավելել է, որ իր քաղաքական ուժը պետք է անվերապահ հաղթանակ տանի ընտրություններում՝ իշխանությունից հեռացնելով մի փոքր խմբի, որը խայտառակում է հայ ժողովրդին, նվաստացնում պետությունը և քանդում հայոց պետականության հիմքերը։

«Մենք բոլորս պատրաստ ենք զոհաբերել ամեն ինչ հանուն Հայաստանի։ Մինչդեռ Փաշինյանն ամեն ինչ զոհաբերում է հանուն իր աթոռի. թող հիմա նրանք լսեն մեզ՝ մենք ասում ենք, որ փոփոխությունները գալիս են։ Մեր թիմի հետ միասին մենք կստեղծենք Հայաստանի հզոր տնտեսություն՝ նոր գործարաններով, 300 հազար նոր աշխատատեղերով, մարդկանց կյանքի արմատական բարելավմամբ, բիզնեսի և գյուղատնտեսության համար նոր հնարավորություններով։ Ժամանակակից աշխարհում հզոր տնտեսությունն ամրապնդում է դիվանագիտությունը և պաշտպանությունը, և մենք կունենանք հզոր դիվանագիտություն ու հզոր պաշտպանություն՝ պաշտպանված երկնքով, պրոֆեսիոնալ սպառազինված բանակով, որն իրականում երաշխավորում է խաղաղությունը ոչ թե խոսքով, այլ գործով։ Հայաստանը պետք է դառնա անվտանգ, խաղաղ, հարուստ, ուժեղ երկիր, երկիր, որտեղ կառավարիչները չեն դատարկում բյուջեն և չեն լցնում սեփական գրպանները, այլ, ընդհակառակը, դատարկում են իրենց գրպանները հանուն մեր հայրենիքի բարօրության։ Արդարությունը և ներքին համերաշխությունը Հայաստանում կլինեն հավերժ»,- խոստացել է Կարապետյանը՝ հավելելով, որ երաշխավորում է վերոհիշյալ բոլոր խոստումների կատարումը։

Այնուհետև նա ընդգծել է, որ Հայաստանի «վարչակարգը» վախեցնում է մարդկանց պատերազմով և նույնիսկ ժամկետ է նշում՝ սեպտեմբերը, քանի որ, իր խոսքով, հենց այդ ամսին է սկսվել 2020 թվականի 44-օրյա ծանր պատերազմը։ «Սեպտեմբերին սկսվեց ագրեսիան Հայաստանի տարածքային ամբողջականության դեմ, սեպտեմբերին սկսվեց Արցախի բռնի հայաթափումը և էթնիկ զտումները՝ պատերազմներ, որտեղ Փաշինյանը պարտվեց։ Մի՞թե մենք թույլ կտանք, որ նա ևս մեկ պատերազմ տանուլ տա Հայաստանի համար։ Վստահ եմ, որ թույլ չենք տա։ Իմ խոստումն է, որ մեր հաղթանակի և իմ՝ վարչապետ ընտրվելու դեպքում գալիք սեպտեմբերը և հաջորդող ամիսները կլինեն խաղաղ»,- ասել է նա՝ կոչ անելով չընկճվել։

Գործարարն ընդգծել է, որ Հայաստանը կարող է լինել ուժեղ, և իրենց քաղաքական ուժը կհասնի տևական խաղաղության։ Նա հավելել է, որ Հայաստանն այլևս թույլ չի լինելու։ «Մենք ուժեղ կլինենք Մոսկվայում և կվերականգնենք փչացած հարաբերությունները, մենք ուժեղ կլինենք Վաշինգտոնում, Լոնդոնում, ինչպես նաև Պեկինում։ Վարչակարգը քայքայել է հարաբերությունները սփյուռքի հետ, և միայն մեզ հետ հնարավոր կլինի վերականգնել սփյուռքի ներուժը»,- հավելել է նա։

Կարապետյանը նաև կոչ է արել չընկճվել բռնաճնշումներից ու հետապնդումներից՝ հավելելով, որ իշխանությունները կարող են նույնիսկ ձերբակալել կամ կալանավորել իրենց, բայց չեն կարող խանգարել փոփոխություններ բերելուն։ «Մենք նրանց կեղծ ու անհասկանալի սրտիկները կփոխարինենք մեր իսկական հայկական սրտերով։ Մենք երբեք չենք մոռանա, որ Հայաստանյայց Առաքելական Սուրբ Եկեղեցին մեր սիրտն է, Արարատ լեռը՝ մեր սիրտը։ Մեզ մեծ հաղթանակ է պետք ընտրություններում, որպեսզի կարողանանք ավելի արագ իրականացնել բոլոր այն լայնածավալ ծրագրերն ու փոփոխությունները, որոնց հայ ժողովուրդը վաղուց արժանի է։ Իշխանությունը ձեր ձեռքերում է, սկսեք փոփոխությունները, իսկ ես դրանք իրականություն կդարձնեմ»,- շարունակել է Կարապետյանը։

Եզրափակելով՝ նա հայտնել է, որ իր ստեղծած խոշորագույն հայկական գործարար ընկերության կառավարումը հանձնում է իր զավակներին, իսկ ինքը ծառայելու է իր երկրին և փոխելու է Հայաստանի քաղաքացիների կյանքը հանուն ավելի լավ ապագայի։ «Փոփոխությունների ժամանակը եկել է, ես շուտով ձեզ հետ կլինեմ, ոչ մի վայրկյան չկասկածեք, արդարությունը հաղթելու է»,- ամփոփել է Կարապետյանը։

Կարապետյանի ելույթից հետո քաղաքական ուժի հանրահավաքը հայտարարվել է ավարտված, և քաղաքացիները երթով Ազատության հրապարակից ուղղվել են Երևանի կենտրոնական փողոցներով։ Նրանք վանկարկում են «Սամվել՝ վարչապետ»։

Հանրահավաքի կադրերի համաձայն՝ Ազատության հրապարակը լիովին լեցուն էր քաղաքացիներով։ Այսօր ավելի վաղ հաղորդվում էր, որ իշխանությունները խոչընդոտներ են ստեղծել մարզերից Սամվել Կարապետյանի կողմնակիցների Երևան գալու համար։ Չնայած դրան, հրապարակը մարդաշատ էր։