Մի խումբ մայրեր նստացույց են իրականացնում ՀՀ գլխավոր դատախազության մոտ ՝ ի աջակցություն Փաշինյանին առնչվող միջադեպից հետո կալանավորված դպրոցականի

Արմինֆո.Մի խումբ մայրեր նստացույց են անում ՀՀ գլխավոր դատախազության մոտ ՝ ի աջակցություն Երևանի Սուրբ Աննա եկեղեցում ՀՀ վարչապետ Նիկոլ Փաշինյանի մասնակցությամբ տեղի ունեցած միջադեպից հետո երկամսյա կալանքի տակ գտնվող 18-ամյա դպրոցական Դավիթ Մինասյանի:

Ինչպես լրագրողների հետ զրույցում պատմել է "ՀայաՔվե" քաղաքացիական նախաձեռնության անդամ, չորս երեխաների մայր Սաիդա Պողոսյանը, իրենք նախատեսում են նստացույց անցկացնել շաբաթվա ընթացքում՝ առավոտյան 11-ից մինչև երեկոյան 8-ը: "Ես խնդրում եմ այն մայրերին, ովքեր անտարբեր չեն Դավիթ Մինասյանի ճակատագրի հանդեպ, միանալ մեզ, գալ այստեղ, նույնիսկ, մի քանի րոպեով", - նշել է Պողոսյանը: Նա պարզաբանել է, որ այդ կերպ իրենք ցանկանում են ուշադրություն հրավիրել այդ խնդրի վրա։ Նրա խոսքով ՝ իրենք ՀՀ գլխավոր դատախազ Աննա Վարդապետյանից պահանջում են անաչառ քննություն, ինչպես նաև՝ թույլ տալ Մինասյանին լիարժեք բուժում ստանալ տանը՝ ընտանիքի հսկողության ներքո, և վերանայել նրան առաջադրված մեղադրանքը:

"Մենք գիտենք, որ Դավիթ Մինասյանը մեղավոր չէ, և դրա համար էլ փորձում ենք հնարավորինս շատ մարդկանց ուշադրությունը հրավիրել այս խնդրի վրա։ Պետք է հասկանալ, որ այսօր այդ իրավիճակը տեղի է ունեցել Դավիթի հետ, վաղը նրա փոխարեն կարող է հայտնվել ցանկացած այլ երեխա։ Մենք դրանից ապահովագրված չենք", - ընդգծել է "ՀայաՔվեի" անդամը։

Նշենք, որ ակցիայի ընթացքում կանանց սկսել են միանալ նաև այլ մայրեր: Մասնավորապես, արցախցի փախստական, երեք երեխաների մայր Նուբար Դանիելյանը հայտարարել է, որ  մտադիր է միանալ նստացույցին և պայքարել մինչև վերջ: "Մեր երեխաները պետք է ապահով ապրեն։ Մենք չպետք է հայտնվենք նման իրավիճակներում: Մենք ձայնազուրկ չենք և այստեղ կլինենք այնքան, մինչև արդյունքի հասնենք", - ընդգծել է Դանիելյանը։

Հատկանշական է, որ ակցիային միացածներից շատերն անձամբ ծանոթ չեն Մինասյանի ընտանիքին և Գլխավոր դատախազության շենքի մոտ են եկել այն պատճառով, որ տեղի ունեցածը համարում են անթույլատրելի: Ավելի վաղ Սուրբ Աննա եկեղեցու մոտ նույնպես, որտեղ տեղի է ունեցել միջադեպը, ակցիա էին իրականացրել "ՀայաՔվե" երիտասարդական կազմակերպության ներկայացուցիչները: Նրանք եկել էին եկեղեցի՝ կապկպված ձեռքերով և փակված բերաններով ՝ այդպիսով բողոքելով դպրոցականի ապօրինի կալանավորման դեմ։ Նրանց ձեռքներին կային "Հարգանք մի ակնկալեք, երբ ոտնահարվում է հավատը", "Վաղը ձեզ հետ նույնն է լինելու", "Ազատություն Դավիթ Մինասյանին", "Հայաստանի քաղաքացին անպաշտպան է" գրություններով պաստառներ:

Հիշեցնենք, որ ապրիլի 1-ին ՀՀ դատարանը 18-ամյա Դավիթ Մինասյանի նախնական կալանքը երկու ամսով երկարաձգել է։ Քննիչները նրան մեղադրանք են առաջադրել ՀՀ Քրեական օրենսգրքի 297-րդ հոդվածի 1-ին մասով (խուլիգանություն) և ՀՀ Քրեական օրենսգրքի 452-րդ հոդվածի 3-րդ մասով (պաշտոնատար անձի օրինական պաշտոնեական կամ քաղաքական գործունեությանը խոչընդոտելը), որը նախատեսում է երկուսից հինգ տարի ազատազրկում: Միջադեպը տեղի է ունեցել մարտի 29-ին Սուրբ Աննա եկեղեցում՝ Ծաղկազարդի օրը, պատարագի ժամանակ, երբ Փաշինյանը, անվտանգության աշխատակիցների ուղեկցությամբ, շարժվում էր դեպի ելքը: Այդ պահին Մինասյանը ձեռքով կտրուկ շարժում է կատարել դեպի վարչապետը, սակայն նրա ձեռքը հետ են քաշել թիկնապահները: Նույն օրը համացանցում շրջանառվող տեսանյութերում երևում է, թե ինչպես է անվտանգության ծառայության աշխատակիցը ուժեղ հարված հասցնում Դավիթ Մինասյանի դեմքին, ինչի հետևանքով երիտասարդը վայր է ընկնում, և վեր կենալուց հետո երկար ժամանակ ուշքի չի գալիս:

Հետագայում նրա մոտ հայտնաբերվել է գանգուղեղային վնասվածք ։ Հատկանշական է, որ Քննչական կոմիտեն գործ է հարուցել Քրեական օրենսգրքի «պաշտոնատար անձի օրինական պաշտոնեական կամ քաղաքական գործունեությանը խոչընդոտելը» հոդվածով, չնայած վարչապետ Փաշինյանն՝ ինքը, բազմիցս հայտարարել է, որ կիրակնօրյա պատարագներին մասնակցում է բացառապես որպես Հայ Առաքելական Եկեղեցու շարքային հետեւորդ։ Ինքը՝ Նիկոլ Փաշինյանը, անվտանգության աշխատակցի գործողությունները համարել է տրամաբանական: Նրա խոսքով՝ ծառայողական պարտականությունները չկատարելու դեպքում աշխատակիցը կարող էր քրեական պատասխանատվության ենթարկվել: