ԿԸՀ ղեկավար․ Առաջիկա խորհրդարանական ընտրությունների ընթացքում անհրաժեշտ է խուսափել վարչական ռեսուրսի կիրառման ցանկացած ձեւից

Արմինֆո.Առաջիկա խորհրդարանական ընտրությունների ընթացքում անհրաժեշտ է խուսափել վարչական ռեսուրսի կիրառման ցանկացած ձևից։ Այդ մասին ապրիլի 15-ին ՀՀ Ազգային ժողովում հայտարարել է Կենտրոնական ընտրական հանձնաժողովի նախագահ Վահագն Հովակիմյանը՝ ներկայացնելով  հանձնաժողովի 2024-2025 թթ. գործունեության մասին զեկույցը։

Նրա խոսքով՝ այս խնդրի լուծման համար ՀՀ արդարադատության նախարարության հետ համատեղ մշակվել է ուղեցույց, որն ուղարկվել է բոլոր պետական հաստատություններին: 2024 - 25թթ. տեղական ինքնակառավարման մարմինների չորս ընտրություններ են կազմակերպվել, որոնցից մեկը ՝ մեծամասնական, իսկ երեքը ՝ համամասնական ընտրակարգով ։ Ընտրությունների արդյունքները չեն բողոքարկվել։ 2025 թվականի ապրիլի 10-ին ԿԸՀ-ը հաստատել է 2025-2028 թվականների զարգացման ռազմավարական ծրագիրը։ Փաստաթղթում ներկայացված է հանձնաժողովի զարգացման ռազմավարության տեսլականը։ Ըստ փաստաթղթի՝ ԿԸՀ առաքելությունն է ապահովել ժողովրդի իշխանության իրացումը ազատ, արդար, թափանցիկ, մրցակցային և միջազգային չափանիշներին համապատասխան ընտրությունների և հանրաքվեների միջոցով: Հանձնաժողովի ջանքերը, սկսած 2025 թվականից, ուղղված կլինեն ընտրական գործընթացների արդյունավետ կազմակերպմանը, թափանցիկության և հաշվետվողականության բարձրացմանը, տեխնոլոգիական զարգացմանը, ընտրողների կրթության և իրազեկման բարձրացմանը, ընտրական հանձնաժողովների ներուժի զարգացմանը:

Հանձնաժողովի նախագահի խոսքով, հաշվի առնելով ընտրական համակարգի հետ կապված համաշխարհային միտումները, ակնհայտ է, որ տարածքային ընտրական հանձնաժողովները պետք է ունենան առանձին տարածքներով եւ ժամանակակից տեխնոլոգիաներով հագեցած մարզային նստավայրեր: "Նախատեսում ենք նստավայրեր ունենալ 10 մարզերում ։ Միջազգային գործընկերներից դրական արձագանք է ստացվել, եւ ԱԺ ընտրություններից հետո կնախաձեռնվի դրանց ձեւավորման գործընթացը", - ընդգծել է Վահագն Հովակիմյանը։

Նա հավելել է, որ 2024 թվականից ԿԸՀ-ի կողմից կիրառվող թվային համակարգը մշտապես կատարելագործվում և բարելավվում է: Հանձնաժողովում գրեթե ողջ գործընթացը թվայնացվել է, բացառությամբ բուն քվեարկության գործընթացի, որը կշարունակի մնալ թղթային տեսքով ։ Թվային համակարգը կկիրառվի նաև առաջիկա խորհրդարանական ընտրությունների նախապատրաստման և անցկացման ընթացքում: Ավելին, 300 և ավելի ընտրող ունեցող բոլոր տեղամասերում կապահովվի քվեարկության և արդյունքների ամփոփման գործընթացի հեռարձակում: Հովակիմյանը կարևորել է նաև ընտրական գործընթացում ներգրավված սուբյեկտների ՝ տեղական և տարածքային հանձնաժողովների անդամների, ԶԼՄ ներկայացուցիչների, դիտորդների և վստահված անձանց ուսուցումը: