Թբիլիսիի փողոցներից մեկը կարող է անվանակոչվել Շառլ Ազնավուրի անունով

Արմինֆո. Վրաստանում Հայաստանի դեսպան Աշոտ Սմբատյանը և Վրաստանում Ֆրանսիայի դեսպան Օլիվիե Կուրտոն հանդիպել են Թբիլիսիի քաղաքային խորհրդի նախագահ Զուրաբ Աբաշիձեի հետ։

Վրաստանում Հայաստանի դեսպանատան մամուլի ծառայության հաղորդմամբ՝ դիվանագետները ընդգծել են երկու երկրների սերտ կապերի կարևորությունը Վրաստանի հետ, որը նաև ազդում է մայրաքաղաք Թբիլիսիի հետ համագործակցության և երեք ժողովուրդների միջև պատմական կապերի ու ավանդական բարեկամության զարգացման վրա։

Զրուցակիցները հույս են հայտնել ապագայում առկա սերտ համագործակցությունն էլ ավելի խորացնելու վերաբերյալ։ Հանդիպման ընթացքում քննարկվել է նաև վրացական արմատներով հայազգի աշխարհահռչակ ֆրանսիացի երգիչ Շառլ Ազնավուրի անունով Թբիլիսիի փողոցներից մեկը կոչելու հարցը։

Զուրաբ Աբաշիձեն հայտարարել է, որ Թբիլիսիի քաղաքային խորհրդի համապատասխան հանձնաժողովը պատրաստ է քննարկել այս հարցը։