Պետր Պիրունչիկ․ Հունիսից Չեխիայի վիզաներ կտրամադրեն վիզային կենտրոնները

Արմինֆո. Հայաստանում Չեխիայի դեսպանությունը հունիսից սկսած Հայաստանում վիզաների կենտրոնները կկառավարի TLScontac ընկերության միջոցով։ Այդ մասին հաղորդել է Հայաստանում Չեխիայի դեսպան Պետր Պիրունչիկը։

"Մենք պայմանագիր ենք կնքել վիզային ծառայությունների արտաքին մատակարարի հետ։ Հունիսից սկսած՝ Չեխիայի Հանրապետությունը TLScontac ընկերության միջոցով կկառավարի վիզաների կենտրոնները Հայաստանում։ Այս քայլը շենգենյան վիզաների համար դիմումների ներկայացման գործընթացն ավելի մատչելի և հարմար կդարձնի օգտատերերի համար", - գրել է դիվանագետը՝ Facebook-ի իր էջում։

Չեխ դիվանագետի խոսքով ՝ թողունակության ավելացման շնորհիվ ավելի շատ դիմորդներ կկարողանան ժամանակին ներկայացնել իրենց դիմումները: Բացի այդ, նրա խոսքով, դիմողները կարող են նաև ակնկալել ընդունելության համար գրանցման ավելի ճկուն տարբերակներ և հաճախորդներին ավելի լավ աջակցություն ողջ գործընթացի ընթացքում:

"Նպատակն է պարզեցնել ընթացակարգերը ՝ պահպանելով վիզային համակարգի ամբողջականությունն ու անվտանգությունը։ Մենք լիովին գիտակցում ենք, որ շենգենյան վիզաները շատ կարևոր և հաճախ բարդ խնդիր են շատ մարդկանց համար։ Թեեւ վիզային ծառայությունների աութսորսինգը չի լուծում բոլոր խնդիրները, դա գործնական առաջընթաց քայլ է: Մենք ձգտում ենք ոչ թե տեղում կանգնել, այլ շոշափելի բարելավումներ կատարել, որոնք թույլ կտան հնարավորինս շատ իրական ճանապարհորդների այցելել Չեխիայի Հանրապետություն: Մենք անհամբերությամբ սպասում ենք ձեզ հետ հանդիպման",- հավելել Է դիվանագետը։

Նշենք, որ Հայաստանի քաղաքացիներն առավել հաճախ բողոքում են եվրոպական երկրների դեսպանատներում կամ վիզաների կենտրոններում ընդունելու համար գրանցման դժվարությունից՝ վիզա ստանալու համար փաստաթղթեր ներկայացնելու նպատակով: Քաղաքացիները դժգոհում են նաև այն բանից, որ ստիպված են լինում միջնորդներից գնել դեսպանատների ազատ ժամերը՝ հսկայական գումարներով, ավելին, հաճախ շատերին մերժում են մուտքի արտոնագրերը՝ անհասկանալի պատճառներով։ Արդյունքում՝ ստացվում է, որ չնայած 2012 թվականին Հայաստանի և ԵՄ միջև մուտքի արտոնագրային ռեժիմի դյուրացման առաջին փուլի շրջանակներում (ուժի մեջ է մտել 2014թվին) ձեռք բերված պայմանավորվածություններին, որը ենթադրում էր ՀՀ քաղաքացուն 30 եվրոյով մուտքի արտոնագրի տրամադրում, իրականում, քաղաքացիները ստիպված են մի քանի անգամ ավելի շատ վճարել մուտքի արտոնագիր ստանալու համար: Դա տեղի է ունենում նաև այն պատճառով, որ շատ դեսպանատներ այդ պայմանավորվածություններից հետո սկսել են դիմել վիզային կենտրոնների ծառայություններին, որոնք, իրենց հերթին, սահմանում են սեփական սպասարկման սակագները։