Հայաստանում կխստացվի թմրամիջոցների ապօրինի շրջանառության համար նախատեսված պատիժը

Արմինֆո.  Հայաստանում կխստացվի թմրամիջոցների ապօրինի շրջանառության համար նախատեսված պատիժը։ Ազգային ժողովի Պետական-իրավական հարցերի հանձնաժողովը մայիսի 11-ի արտահերթ նիստում դրական եզրակացություն է տվել ԱԺ կառավարող "Քաղաքացիական պայմանագիր" խմբակցության պատգամավոր Հայկ Սարգսյանի կողմից երկրորդ ընթերցման ներկայացված Քրեական օրենսգրքի փոփոխություններին:

Պատգամավորի խոսքով՝ ՀՀ կառավարության հետ խորհրդակցելուց հետո որոշում է կայացվել էլ ավելի խստացնել առաջարկվող փոփոխությունները, որոնք ավելի վաղ ընդունվել էին երկրի խորհրդարանի կողմից՝ առաջին ընթերցմամբ: Մասնավորապես, իրացնելու նպատակով թմրամիջոցներ արտադրելու, պատրաստելու, վերամշակելու, ձեռք բերելու, պահելու, փոխադրելու, առաքելու, տարածելու, գովազդելու և իրացնելու դեպքում, եթե հանցագործությունը կատարվում է տեղեկատվական տեխնոլոգիաների կիրառմամբ, առաջարկվում է խստացնել պատիժը՝ ներկայիս 3-6 տարուց մինչև 5-10 տարվա ազատազրկում: Բացի այդ, անչափահասի մասնակցությամբ կամ անչափահասի նկատմամբ նույն հանցանքը կատարելու դեպքում առաջարկվում է սահմանել ավելի խիստ պատիժ ՝ 8-15 տարի ազատազրկում: Սարգսյանն առաջարկել է նաև պատժի համանման խստացում անօգնական վիճակում գտնվող անձի նկատմամբ հանցագործություն կատարելու դեպքերում:

Կուժեղացվի նաև պատասխանատվությունը անձնական նպատակներով թմրաբույսերի աճեցման համար։ Մասնավորապես, միջին աշխատավարձի 10-ապատիկի չափով տուգանքի փոխարեն կկիրառվի 20-ապատիկը, կամ ներկայիս 1 տարվա փոխարեն 2 տարի ժամկետով ազատազրկումը:

Պատգամավորը նշել է, որ իրավապահ մարմինների կողմից հայտնաբերված թմրամիջոցների ապօրինի շրջանառությանն առնչվող հանցագործությունների թիվը մի քանի անգամ աճել է: Նրա խոսքով ՝ նման հանցագործությունները կանխելու համար անհրաժեշտ է երկու պայման ՝ պատժի անխուսափելիությունն ու խստությունը։