«Հայաքվե»-ն Կոռուպցիայի կանխարգելման հանձնաժողովից պահանջում է վարույթ նախաձեռնել Փաշինյանի դեմ՝ պաշտոնեական էթիկայի կանոնները խախտելու համար

Արմինֆո. «Հայաքվե» նախաձեռնության համակարգող Ավետիք Չալաբյանը դիմել է Հայաստանի Կոռուպցիայի կանխարգելման հանձնաժողով՝ պահանջելով վարույթ հարուցել Հանրապետության վարչապետ Նիկոլ Փաշինյանի կողմից պաշտոնեական էթիկայի կանոնները խախտելու փաստով։

Չալաբյանը Facebook-ի իր էջում կատարած հրապարակման մեջ ընդգծել է, որ մայիսի 18-ին Երևանի Արաբկիր վարչական շրջանում նախընտրական քարոզարշավի ժամանակ հայաստանյան վարչապետը կոպտորեն վիրավորել է իրեն մոտեցած քաղաքացուն, ինչպես նաև բացահայտորեն բռնության կոչեր է արել ու սպառնացել իր քաղաքական ընդդիմախոսներին։

«Կցում եմ դիմումի առաջին և վերջին էջերը և հետևողականորեն ձեռնամուխ եմ լինելու դրա պատշաճ քննությանը։ Եթե դուք նույնպես ձեզ վիրավորված եք զգում Փաշինյանի կոպիտ ու սպառնալից հայտարարություններից, կարող եք նմանատիպ դիմում ներկայացնել նույն Հանձնաժողով»,- եզրափակել է «Հայաքվե» նախաձեռնության համակարգողը՝ հրապարակելով իր դիմումի լուսանկարը։

Նշենք, որ «Արցախի հեղափոխական կուսակցության» ղեկավար Արթուր Օսիպյանը, ով մայիսի 18-ի ցերեկը նախընտրական քարոզարշավի ժամանակ Երևանի Արաբկիր վարչական շրջանում բանավեճի մեջ էր մտել Հայաստանի վարչապետ Նիկոլ Փաշինյանի հետ, մայիսի 19-ի գիշերը տեղափոխվել է ձերբակալվածների պահման վայր։ Նրան մեղսագրվում է արարք, որը համապատասխանում է խուլիգանության հոդվածին։

Հիշեցնենք, որ մայիսի 18-ին Երևանի Արաբկիր վարչական շրջանում վեճ էր տեղի ունեցել Օսիպյանի և Հայաստանի վարչապետի միջև։ Օսիպյանը Փաշինյանին մեղադրել էր այն բանում, որ նա կոռուպցիոն սխեմաներով օգնել է Արայիկ Հարությունյանին ընտրվել Արցախի նախագահ։ Ավելին, նա նշել էր, որ հենց Փաշինյանն է լուծարել Լեռնային Ղարաբաղի հակամարտության կարգավորման ԵԱՀԿ Մինսկի խումբը, իսկ այժմ ադրբեջանական իշխանություններն առաջ են մղում Հայաստանն ադրբեջանցիներով բնակեցնելու օրակարգը։ Այս խոսքերը հունից հանել էին Փաշինյանին, և նա սկսել էր գոռալ. «Կորիր այստեղից, նալոգ», «ղարաբաղյան կեղծ էլիտաները թող ընդհանրապես կորչեն այստեղից»։ «Գնայիք մեռնեիք մեր տղերքի փոխարեն, Արթո՛ւր Օսիպյաններ: Թալանչինե՛ր, անասուննե՛ր: Գնայիր մեռնեիր, ինչո՞ւ ես սաղ, անասո՛ւն, մի հատ էլ 5000 զոհից ես խոսում: Կորիր, նալո՛գ: Պետք էր թողնել, որ հիմա փետուրներդ թռցնեին»: Դրանից հետո Օսիպյանը բերման էր ենթարկվել և տեղափոխվել ոստիկանության Արաբկիրի բաժին: