Արցախյան ՀԿ-ները Հայաստանի իշխանություններին կոչ են արել ազատ արձակել Արթուր Օսիպյանին

Արմինֆո. Արցախյան մի շարք հասարակական կազմակերպություններ և հասարակական գործիչներ կոչ են արել Հայաստանի իշխանություններին դադարեցնել Արցախի հեղափոխական կուսակցության ղեկավար Արթուր Օսիպյանի նկատմամբ ապօրինի քրեական հետապնդումը և նրա նկատմամբ քրեական գործիքակազմի կիրառումը Հայաստանում հունիսյան խորհրդարանական ընտրություններին ընդառաջ:

Ինչպես նշվում է Արմինֆո-ին տրամադրված հայտարարության տեքստում, որի ներքո  ստորագրել են 8 ՀԿ և ավելի քան չորս տասնյակ գործիչներ, Արթուր Օսիպյանի նկատմամբ կիրառված խափանման միջոցն ապօրինի է և անհամաչափ։

«Մենք նաև անընդունելի ենք համարում «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանի՝ վեճի ընթացքում Արթուր Օսիպյանին ուղղված հարցը․ «Ինչո՞ւ ես ողջ և չես զոհվել մեր տղաների փոխարեն»։ Նման ամբոխահաճո պահվածքը պետական գործչին անհարիր հռետորաբանության ցայտուն օրինակ է, որն, ամեն ինչից զատ, խորացնում է  ներքաղաքական անհանդուրժողականությունն ու հանրության տարբեր շերտերի տարանջատվածությունը, նպաստում բնակչության ամբողջական խմբերի պիտակավորմանն ու ապամարդկայնացմանը: 

Արթուր Օսիպյանի ձերբակալությունն ու կալանավորումը ոչ միայն ստվեր են ձգում հունիսի 7–ին կայանալիք համապետական ընտրությունների վրա, այլև ըստ ամենայնի խաթարում են վստահությունը իրավապահ մարմինների, ընդհանրապես՝ ընտրական գործընթացի ու ժողովրդավարության առկայության նկատմամբ, ինչպես նաև կասկածի տակ են դնում իշխող ուժի՝ մարդու հիմնարար իրավունքները հարգելու և երկրում քաղաքացիական համերաշխություն արմատավորելու պատրաստակամություն։

Արթուր Օսիպյանը  Նիկոլ Փաշինյանին հարցեր է ուղղել, որոնց անկեղծ պատասխանները հետաքրքրում են ոչ միայն արցախցիներին, այլև ողջ հանրությանը, քանի որ մարդիկ փորձում են հասկանալ 2020–2023 թվականների շարունակական ողբերգությունների պատճառահետևանքային կապերը, ինչպես նաև Հայաստանի ու Արցախի քաղաքական վերնախավերի դերն այդ ամենում։

Հնարավոր է, իհարկե, կալանավորել ծանր ու ցավոտ հարցեր բարձրացնողին, բայց անհնար է ի չիք դարձնել բուն հարցերը, ինչպես նաև կաթվածահար անել դրանց պատասխանները ստանալու՝ հանրության կամքն ու ցանկությունը: Այդ հարցերից ու դրանց շուրջ բանավիճելու հրամայականից հնարավոր չէ խուսափել այսօր, ու հնարավոր չի լինելու նաև վաղը:

Իրավիճակից միակ ելքն այդ հարցերի շուրջ քաղաքակիրթ երկխոսությունն է հանրության տարբեր շերտերի հետ, և համապետական ընտրությունները հարմար առիթ են դրա համար, քանի որ անհամեմատ մեծ հնարավորություններ են ընձեռում մարդկանց հետ քաղաքական ուժերի շփումների համար: Հակված ենք կարծելու, որ մեր բոլորիս դարդուցավի, մեր ոչ վաղեմի դժբախտությունների ու ողբերգությունների մասին ամենայն անկեղծությամբ ու սրտացավությամբ,  արժանապատվությամբ ու սկզբունքայնությամբ, քննադատությամբ ու ինքնաքննադատությամբ խոսող քաղաքական ուժն ավելի շատ շանսեր կունենա ընտրազանգվածի համակրանքը շահելու համար: Ամենակարևորը հենց խաղաղ- հանգիստ մթնոլորտի ձևավորումն է համազգային-համապետական խնդիրների հանրային քննարկումների համար: Ըստ երևույթին, խաղաղությունը հենց այստեղից է սկսվում՝ մարդկանց հոգու ու մտքի խաղաղությունից: Ներքին այս խաղաղության արժեքը չիմացողը չի կարող հետամուտ լինել մեծ խաղաղությունը, էլ ավելի մեծ աբսուրդ է ներքին առճակատմամբ մեր շուրջ խաղաղությանը նպաստելը:

ՀՀ իշխանություններին կոչ ենք անում ժամ առաջ միջոցներ ձեռնարկել առկա լարվածությունը թոթափելու, համազգային-համապետական խնդիրների ու մարտահրավերների, ինչպես նաև մեր ոչ վաղեմի դժբախտությունների ու ողբերգությունների մասին կառուցողական քննարկումների համար բարենպաստ մթնոլորտ ստեղծելու համար: Դրա առաջին քայլը կարող է լինել Արթուր Օսիպյանին անհապաղ արգելանքից ազատ արձակելն ու նրա նկատմամբ քրեական հետապնդումը դադարեցնելը, ինչպես նաև ընդհանրապես քրեական գործիքակազմի ապօրինի և անհամաչափ կիրառումը բացառելն ընտրական գործընթացում:

Մենք՝ ներքոստորագրյալներս, վճռական ենք մեր բարձրացրած խնդիրների լուծմանը հետամուտ լինելու հարցում», - ասվում է հայտարարությունում, որի ներքո ստորագրել են «ՄեդիաՍտեփ» ՀԿ, «Վերադարձ դեպի Դիզակ» ՀԿ, «Հանուն Հադրութի» ՀԿ, «Վերադարձ դեպի Քարվաճառ» ՀԿ, «Վերադարձ դեպի Քաշաթաղ» ՀԿ, «Հարմոնիա» Շուշիի կանանց ՀԿ, «Արցախի Թեքեյան մշակութային միություն» ՀԿ, «Ստեփանակերտ» մեդիա ակումբը եւ մի շարք հասարակական գործիչներ։

Հիշեցնենք, որ մայիսի 18-ին Երևանի Արաբկիր վարչական շրջանում Փաշինյանի նախընտրական քարոզարշավի ժամանակ նրան էր մոտեցել Արցախի հեղափոխական կուսակցության ղեկավար Արթուր Օսիպյանը: Նա Փաշինյանին մեղադրել էր Արայիկ Հարությունյանին կոռուպցիոն սխեմաներով Արցախի նախագահ ընտրվելու հարցում օգնելու համար։ Ավելին, նա նշել էր, որ հենց Փաշինյանն է լուծարել Լեռնային Ղարաբաղի հակամարտության կարգավորման հարցով ԵԱՀԿ Մինսկի խումբը, իսկ հիմա ադրբեջանական իշխանություններն առաջ են տանում Հայաստանը ադրբեջանցիներով բնակեցնելու օրակարգը։ Այդ խոսքերը հունից հանել էին Փաշինյանին եւ նա սկսել էր  բղավել՝ "ռադ եղի այստեղից, համբալ", "ղարաբաղյան պսևդոէլիտները թող այստեղից, ընդհանրապես, ռադ ըլնեն"։ "Գնայիք զոհվեիք մեր տղաների փոխարեն, Արթուր Օսիպյաններ։ Թալանչիներ, անասուններ: Գնայիր զոհվեիր, ինչու՞ ես կենդանի, անասուն, դեռ 5000 հազար զոհվածի մասին ես խոսում։ Ռադ եղի,  համբալ"։

Իրավիճակը թեժացել էր, Օսիպյանին հետ էին մղել Փաշինյանից։  Ավելի ուշ   նրան բերման էին ենթարկել՝ այն բանից հետո, երբ ԱԺ նախագահ Ալեն Սիմոնյանը ուղիղ եթերով Փաշինյանին ցույց էր տվել դեպքից առաջ սոցցանցում Արթուր Օսիպյանի գրառումը. "Եթե մեկը գիտի Նիկոլի տեղը, ասեք ՝ կգտնեմ ու նրա փետուրները հանեմ": Դրանից հետո Օսիպյանը ձերբակալվել և կալանավորվել է երկու ամիս ժամկետով։