Իվետա Տոնոյան․ ԲՀԿ փաստաբանական թիմը մտադիր է հայց ներկայացնել ՀՀՀ դեմ ՝ Ծառուկյանի հասցեին հնչեցրած վիրավորանքների համար

Արմինֆո. "Բարգավաճ Հայաստան" կուսակցության փաստաբանական թիմը մտադիր է դատական հայց ներկայացնել Հայաստանի հանրային հեռուստաընկերության դեմ (ՀՀՀ)՝ քաղաքական ուժի առաջնորդ Գագիկ Ծառուկյանի հասցեին զրպարտություն տարածելու և վիրավորական արտահայտությունների համար: Այդ մասին մայիսի 25-ին Երեւանում կայացած մամուլի ասուլիսում հայտարարել է ԲՀԿ մամուլի քարտուղար Իվետա Տոնոյանը։

Նրա խոսքով՝ օրեր առաջ ՀՀՀ-ը տեսանյութ էր հրապարակել, որում Ծառուկյանի և նրա ընտանիքի անդամների հասցեին վիրավորական արտահայտություններ և անթույլատրելի բառապաշար է հնչել: "Ափսոսանք է հարուցում, որ հարկատուների հաշվին աշխատող ՀՀՀ-ը նման բան է թույլ տալիս։ Մեր փաստաբանական թիմը դատական հայց է պատրաստում զրպարտության տարածման առնչությամբ։ Մեզ համար նման պահվածքն անընդունելի է։ Քաղաքական պայքարի պայմաններում կարող են հնչել քննադատական գնահատականներ ընտրություններին մասնակցող տարբեր ուժերի կողմից, սակայն նրանք չպետք է անցնեն բարոյական սահմանները", - ընդգծել է Տոնոյանը։

ԲՀԿ մամուլի խոսնակն ուշադրություն է հրավիրել այն ակնհայտ փաստի վրա, որ այժմ պետական և վարչական ողջ ռեսուրսն ուղղված է բացառապես մեկ բանի՝ լռեցնել քաղաքական ընդդիմախոսներին: Այդ գործընթացների շրջանակներում, ինչպես նշել է Տոնոյանը, տարբեր քրեական գործեր են հարուցվում։ Այդ առնչությամբ նա հիշեցրել է, որ այս պահին գործ է հարուցվել իրենց ընտրական ցուցակի երկրորդ համար Անդրանիկ Թևանյանի դեմ: "Մեր փաստաբաններն արդեն հայտարարել են, որ անհիմն են համարում այդ գործը և մտադիր են բողոքարկել Թևանյանին կալանավորելու որոշումը։ Շարունակվում են նաև Մարտուն Գրիգորյանի նկատմամբ ՀՀ հակակոռուպցիոն կոմիտեի հարուցած գործի հետ կապված գործընթացները: Այս կապակցությամբ ուզում եմ դիմել Հայաստանի հակակոռուպցիոն կոմիտեին և հարց տալ․ ինչու՞ նույն կերպ չի դիտարկվում իշխանության կողմից վարչական ռեսուրսի օգտագործումը նախընտրական քարոզչության ժամանակահատվածում։ Ու՞ր է նայում Հակակոռուպցիոն կոմիտեն Թող գոնե մեկ գործ հարուցվի իշխանության ներկայացուցիչների, մասնավորապես, Փաշինյանի դեմ։ Ընտրություններից առաջ բարձրացվել են թոշակները, պետական ծառայողներին վճարվել են պարգևավճարներ, տեղի է ունեցել պաշտոնների բաշխում", - հիշեցրել է ԲՀԿ խոսնակը։

Միևնույն ժամանակ, նա ընդգծել է, որ չնայած ճնշումներին, սպառնալիքներին և քրեական գործերի հարուցմանը, իրենց քաղաքական ուժը շարունակելու է կառուցողական գործելաոճը և մտադիր չէ շեղվել ընտրված ուղուց: "Փաշինյանը գնաց վախի և թշնամանքի մթնոլորտ ձևավորելու ճանապարհով։ Սակայն, չի ստացվի։ Ուզում եմ վստահեցնել, որ մենք չենք շեղվելու մեր ճանապարհից և շարունակելու ենք հանրությանը ներկայացնել երկրի զարգացման մեր տեսլականը ։ Մենք հասկանում ենք, որ մեր թիմակիցների դեմ քրեական գործեր են հարուցվում նախընտրական շրջանում մեր թիմի գործունեությունը կաթվածահար անելու նպատակով ։ Սակայն ոչինչ չի ստացվի", - եզրափակել է Տոնոյանը։

Հիշեցնենք, որ մայիսի 21-ին ՀՀ քննչական կոմիտեից հայտնել էին, որ Անդրանիկ Թևանյանի նկատմամբ քրեական գործ է հարուցվել "պետական դավաճանության և լրտեսության" փաստով: Թևանյանին մեղադրում են պետական գաղտնիք պարունակող տեղեկատվությունը 622 հազար դոլարով օտարերկրյա պետությանը փոխանցելու մեջ: Իսկ մայիսի լույս 24-ի գիշերը Թևանյանը դատարանի որոշմամբ դատապարտվել է երկամսյա կալանքի: Ընդ որում, Թևանյանի փաստաբան Արամ Օրբելյանի խոսքով ՝ իր պաշտպանյալին կալանավորելու համար որևէ իրավական հիմք չի եղել։ Հավելենք, որ ընդդիմադիր գործչի ձերբակալությունը տեղի է ունեցել ՀՀ գործող վարչապետ Նիկոլ Փաշինյանի ուղիղ ցուցումով: Ինքը ՝ Թևանյանը, անհեթեթ է համարել քննության պնդումները, նշելով, որ պատգամավորական մանդատը վայր է դրել դեռևս 2023 թվականին, և, հետևաբար, քննչական կոմիտեի նման պնդումներն անհիմն են։ Գագիկ Ծառուկյանը նույնպես պահանջել է ապացույցներ ներկայացնել կուսակցության համամասնական ցուցակի երկրորդ համար Անդրանիկ Թևանյանի հասցեին լրտեսության մեղադրանքների վերաբերյալ, համոզմունք հայտնելով, որ Թևանյանի մասին ասվածը զրպարտություն է, նա պարկեշտ, համարձակ մարդ է և հայրենասեր: Թևանյանի ձերբակալման օրը դիմակավորված անձինք ներխուժել են նաև ընդդիմադիր "Պատիվ ունեմ" խմբակցության պատգամավոր, "Բարգավաճ Հայաստան" կուսակցության պատգամավորի թեկնածու Մարտուն Գրիգորյանի տուն՝ Գյումրիում: