Հայաստանում թանգարանների աշխատակիցների աշխատավարձերի հաշվարկման նոր համակարգ կներդրվի

Արմինֆո.Հայաստանում կներդրվի թանգարանների աշխատակիցների աշխատավարձերի հաշվարկման նոր համակարգ։ Համապատասխան որոշումն ընդունվել է կառավարության մայիսի 27-ի նիստում։

Նախագիծը ներկայացնելիս ՀՀ կրթության, գիտության, մշակույթի և սպորտի նախարար Ժաննա Անդրեասյանը նշել է, որ նոր համակարգի շրջանակներում նախատեսվում է թանգարանների աշխատողներին ատեստավորում անցնելու հնարավորություն ընձեռել և դրանով իսկ զգալիորեն բարձրացնել նրանց աշխատավարձերը։ Նախարարը նկատել է, որ թանգարանային մասնագետների աշխատավարձերի բարձրացումը նպատակային քայլ է։ Ներկայումս թանգարանային մասնագետներն իրականացնում են բազմաթիվ գործառույթներ, որոնք պահանջում են բարձր մասնագիտական որակավորում՝ մշակութային արժեքների պահպանում, հանրահռչակում, հաշվապահական հաշվառում, գիտական զարգացում, ցուցահանդեսների կազմակերպում, կրթական ծրագրերի իրականացում, սակայն նրանց աշխատանքի վարձատրության ցածր մակարդակը բացասաբար է անդրադառնում կադրային կազմի կայունության, մասնագետների ներգրավման ու պահպանման, ինչպես նաև թանգարանային գործունեության արդյունավետության վրա։ Վերջին տարիներին թանգարանների գործառույթները զգալիորեն ընդլայնվել են՝ թվայնացում, միջազգային ցուցահանդեսների կազմակերպում, աճուրդների մոնիտորինգ և որակավորում պահանջող այլ գործառույթներ։ Չնայած աշխատանքի բարձր պատասխանատվությանը և բարդությանը՝ այս ոլորտում վարձատրության մակարդակը մնում է ոչ մրցունակ, ինչը համակարգային խնդիրներ է առաջացնում՝ երիտասարդ կադրերի ներգրավման ցածր հետաքրքրվածություն, սահմանափակ մասնագիտական աճ ու վերապատրաստում, ինչպես նաև թանգարանային կառավարման որակի անկման ռիսկ։ Վարձատրության բարձրացումը պետք է դիտարկել ոչ թե որպես զուտ սոցիալական միջոցառում, այլ որպես ռազմավարական ներդրում՝ ուղղված թանգարանային համակարգի կայունացմանը։

Նախագծի ընդունումը կնպաստի ոլորտում միասնական ընթացակարգերի ներդրմանը, ատեստավորման արդյունքների օբյեկտիվության բարձրացմանը և մարդկային ռեսուրսների կառավարման արդյունավետության ամրապնդմանը։

Փաստաթուղթը համապատասխանում է նաև տնտեսական բաղադրիչին՝ առաջին հերթին նկատի ունենալով զբոսաշրջության աճը։ Վերջին տարիներին թանգարանային գործի զարգացման ուղղությամբ զգալի քայլեր են ձեռնարկվել. բավական է միայն հիշել, որ մի քանի տարի առաջ ընդունվեց «Թանգարանների մասին» օրենքը։ Նախարարը հիշեցրեց նաև ստեղծված Թանգարանների զարգացման հիմնադրամի մասին, որի խնդիրն է մարքեթինգի իրականացումը, հուշանվերների արտադրությունը և այլն։ Առաջիկա երկու ամսվա ընթացքում հուշանվերների առաջին խմբաքանակն արդեն վաճառքի կհանվի։ Այս կապակցությամբ թանգարաններում կհայտնվեն առևտրային հարթակներ, որտեղ դրանք կվաճառվեն։ Խոսքը, մասնավորապես, Ազգային պատկերասրահի և Պատմության թանգարանի մասին է, որտեղ շինարարական աշխատանքները պետք է ավարտվեն մինչև տարեվերջ։

Այս իրավական ակտի ընդունումը կհանգեցնի թանգարանային աշխատողների աշխատավարձերի բարձրացմանը, ինչն ուղղված է ոլորտի զարգացմանը և կայուն կադրային քաղաքականությանը։