Հայաստանի ՆԳՆ․ Վերաքննիչ դատարանը բավարարել է Միգրացիայի և քաղաքացիության ծառայության բողոքը՝ արգելելով արցախցիներին քվեարկել խորհրդարանական ընտրություններում

Արմինֆո. Հայաստանի Վերաքննիչ քաղաքացիական դատարանը բավարարել է ՆԳՆ Միգրացիայի եւ քաղաքացիության ծառայության բողոքը՝ արգելելով 070 կոդով անձնագիր ունեցող արցախցիներին քվեարկել 2026թ. հունիսի 7-ի խորհրդարանական ընտրություններում:

«Ղարաբաղից տեղահանված սիրելի՛ հայրենակիցներ, ինչպես տեղյակ եք, սոցիալական մեդիայի տիրույթում տարածվել էր տեղահանված անձանց ընտրական իրավունքին վերաբերող մոլորեցնող տեղեկատվություն, որ առանց ՀՀ քաղաքացիության համար դիմելու և ստանալու հնարավոր է ձեռք բերել ընտրական իրավունք և ընդգրկվել ընտրողների ցուցակներում։

ՆԳՆ միգրացիայի և քաղաքացիության ծառայության կողմից Երևան քաղաքի առաջին ատյանի ընդհանուր իրավասության քաղաքացիական դատարանի կողմից քաղաքացիական 3 գործերով կայացված դատական ակտերը բողոքարկվել էին ՀՀ վերաքննիչ քաղաքացիական դատարան։

Շարունակելով ձեզ հետ բաց և ազնիվ երկխոսությունը՝ հայտնում ենք, որ ՀՀ վերաքննիչ քաղաքացիական դատարանի կողմից վերոնշյալ գործերով ՆԳՆ միգրացիայի և քաղաքացիության ծառայության ներկայացրած վերաքննիչ բողոքները բավարարվել են․ դատական ակտերը բեկանվել են, և քաղաքացիական գործերի վարույթները կարճվել են:

Ինչ վերաբերում է դատական ակտերի բողոքարկման հնարավորության վերաբերյալ կրկին մոլորեցնող շահարկումներին, ապա դրան անդրադարձ կկատարենք Վերաքննիչ դատարանի որոշմամբ՝

«(․․․) Վերաքննիչ դատարանը հարկ է համարում նշել, որ դատական ակտի բողոքարկման հնարավորությունն արձանագրվում է ոչ թե դատական ակտով՝ դատարանի կատարած եզրահանգումների հիման վրա, այլ օրենսդրական համապատասխան նորմերով:

Վերաքննիչ դատարանը գտնում է, որ ՀՀ վարչական դատավարության օրենսգրքի 213-րդ հոդվածի 1-ին մասով սահմանված իրավակարգավորումը, այն է՝ ընտրական իրավունքի պաշտպանության վերաբերյալ գործերով վարչական դատարանի` գործն ըստ էության լուծող դատական ակտերը վերջնական են, վերանայման ենթակա չեն և ուժի մեջ են մտնում հրապարակման պահից, սույն գործի փաստերի նկատմամբ կիրառելի չէ և նման պայմաններում պետք է գործեն դատական ակտերի բողոքարկմանը վերաբերող ՀՀ քաղաքացիական դատավարության օրենսգրքի ընդհանուր կանոնները, քանի որ ՀՀ վարչական դատավարության օրենսգրքի 208-րդ հոդվածի 1-ին մասի 2-րդ կետի համաձայն` ընդհանուր իրավասության դատարանին ենթակա են ընտրական իրավունքի պաշտպանությանն ուղղված այն գործերը, որոնք վերաբերում են ընտրողների ցուցակների ճշգրտմանը, իսկ տվյալ դեպքում դատարանի կողմից քննության առարկա է դարձվել ընդհանուր իրավասության դատարանին ոչ ենթակա գործ»։

Սիրելի՛ հայրենակիցներ, կրկին իրազեկում ենք՝ համապետական ընտրություններին մասնակցելու ընտրական իրավունք ունեն միայն ՀՀ քաղաքացիները։ Կոչ ենք անում չտրվել մոլորեցնող հայտարարություններին և դրանց հիման վրա չկատարել անօգտակար գործողություններ», - ասվում է Հայաստանի ՆԳՆ հաղորդագրությունում։

Հիշեցնենք, որ 2026 թվականի մայիսի 26-ին արցախցի փաստաբան Ռոման Երիցյանը հաղորդել էր, որ Հայաստանի դատարանը բավարարել է արցախցի Մարատ Եգանյանի հայցը ՝ ՀՀ ՆԳՆ Միգրացիայի և քաղաքացիության ծառայությանը պարտավորեցնելով նրան ընդգրկել ընտրական ցուցակներում։ Դատարանը, մասնավորապես, նշել էր, որ արդեն քաղաքացի համարվող անձը չի կարող կառավարության որոշմամբ դադարեել այդպիսին հանդիսանալ։ Այսպիսով՝ դատարանը հաստատել էր 070 կոդով անձնագիր ունեցող արցախցիների պասիվ ընտրական իրավունքի առկայությունը: