«Ուժեղ Հայաստան». Անապահով ընտանիքներին էլեկտրաէներգիայի և ջրի սուբսիդիաներ կտրամադրվեն

Արմինֆո.«Ուժեղ Հայաստան» դաշինքի առաջնորդ Սամվել Կարապետյանը երկիրը դուրս կբերի աղքատության ճիրաններից։ Այս մասին Հանրային հեռուստաընկերության եթերում նախընտրական բանավեճի ժամանակ հայտարարել է «Ուժեղ Հայաստան» կուսակցության խորհրդի անդամ Նարեկ Կարապետյանը։

Այս կապակցությամբ նա ուշադրություն է հրավիրել այն բանին, որ այսօր Հայաստանում 650,000 մարդ ապրում է աղքատության մեջ։ Նրա խոսքով՝ այս խնդրի հաղթահարման համար մեծ աշխատանք կա անելու։ «Մենք մեծ աշխատանք ունենք անելու երկրի արդյունաբերականացման ուղղությամբ։ Եվ որպեսզի հաղթահարենք այս աղքատությունը, անհրաժեշտ է նոր աշխատատեղեր ստեղծել»,- հայտարարել է Կարապետյանը։

Բացի այդ, նրա խոսքով, իրենց քաղաքական ուժը մտադիր է իշխանության գալու դեպքում նպաստներ տրամադրել Հայաստանի այն քաղաքացիներին, ովքեր այսօր գտնվում են ծայրահեղ աղքատության մեջ։ Նպաստները, նրա խոսքով, կվճարվեն 150,000 դրամի չափով։ «Մենք նաև մտադիր ենք ձեզ ներկայացնել մեր նոր ծրագիրը, որի շրջանակներում անապահով ընտանիքներին էլեկտրաէներգիայի և ջրի սուբսիդիաներ կտրամադրվեն։ Դա նշանակում է, որ անապահով ընտանիքները 0 դրամ կվճարեն այդ ծառայությունների համար»,- ընդգծել է «Ուժեղ Հայաստան» կուսակցության քաղխորհրդի անդամը։

Կարապետյանը պարզաբանել է, որ դա կարվի պետական և մասնավոր միջոցների համադրման հաշվին։ «Եվ օգնության կարիք ունեցող մեր հայրենակիցներն այլևս ստիպված չեն լինի իրենց վերջին գումարները տալ դրա համար»,- ամփոփել է Կարապետյանը։

Հիշեցնենք, որ «Ուժեղ Հայաստան» դաշինքի անդամ Արամ Վարդևանյանը հայտարարել էր, որ 2021 թվականին Հայաստանի աղքատ բնակչության ցուցանիշը կազմում էր 27%։ Այնինչ, կառավարող «Քաղաքացիական պայմանագիր» կուսակցության նախընտրական խոստումների համաձայն, այդ ցուցանիշը պետք է կրկնակի նվազեր։ Մինչդեռ, նրա խոսքով, ինչպես վկայում են վերջին պաշտոնական տվյալները, աղքատության մակարդակը երկրում կազմում է շուրջ 22%, իսկ ծայրահեղ աղքատության վիճակում է գտնվում մոտ 30 հազար մարդ։