Ռուսաստանի ԿԸՀ  ներկայացուցիչ․ Հայաստանի ընտրատեղամասերում զինծառայողների մեծ խմբերի քվեարկության վերահսկմանն առնչվող բարդություններ են առաջացել

Արմինֆո.  Հայաստանում խորհրդարանական ընտրությունների ժամանակ բարդություններ են առաջացել այն ընտրատեղամասերում քվեարկության գործընթացի վերահսկողությունը կազմակերպելու հարցում, որտեղ գտնվել են հայ զինծառայողների մեծ խմբեր: Այդ մասին հունիսի 8-ին կայացած մամուլի ասուլիսի ժամանակ հայտարարել է Ռուսաստանի Կենտրոնական ընտրական հանձնաժողովի ներկայացուցիչ Լյուդմիլա Մարկինան։

Նա պատմել է, որ Հայաստանում խորհրդարանական ընտրությունների նկատմամբ վերահսկողություն է իրականացրել  Ռուսաստանի ընտրական համակարգի 30 ներկայացուցիչների հետ՝ ԱՊՀ առաքելության կազմում: Նրա խոսքով ՝ իրենց խումբն այցելել է Հայաստանի 9 մարզերի 200 ընտրատեղամասեր։ Մարկինան նշել է, որ իրենք իրենց կողմից արձանագրել են ընտրական հանձնաժողովների անդամների ոչ բավարար պատրաստվածությունը, ինչը հանգեցրել է քվեարկության ձգձգման: "Բոլոր այն խախտումները, որոնք հնարավոր էր օպերատիվ կերպով կարգավորել տեղում, վերացվում էին։ Եթե դա տեղի չի ունեցել, ապա մենք դա արձանագրել ենք մեր հարցաթերթիկներում ։ Ուշադրություն ենք հրավիրել մի շարք ընտրատեղամասերում զինծառայողների մեծ խմբերի քվեարկության կազմակերպման վրա։ Այս գործընթացը ինչ-որ կերպ վերահսկելը բավականին դժվար էր, քանի որ դրանք փակ տվյալներ են։ Այնուամենայնիվ, սա բավականին զգայուն հարց է, որը որոշակի կասկածներ է առաջացնում նման կարգի քվեարկության կազմակերպման բոլոր ընթացակարգերի պահպանման վերաբերյալ", - ուշադրություն է հրավիրել Ռուսաստանի ԿԸՀ-ի ներկայացուցիչը։

Մարկինան նաև նշել է ձայների հաշվարկի ընթացակարգի շրջանակներում խնդիրների առկայությունը, նշելով, որ այն չհիմնավորված բարդացված է: "Դա հսկայական ծանրաբեռնվածություն է ընտրական հանձնաժողովների անդամների վրա։ Թեև մեծ աշխատանք է կատարվել, այնուամենայնիվ, տեղամասային ընտրական հանձնաժողովների անդամները շփոթվել են ձայները հաշվելիս և արձանագրություններ կազմելիս։ Այսինքն, այդ ընթացակարգը, ինչպես մեզ թվում է, բավարար չափով չի մշակվել", - նշել է Ռուսաստանի ԿԸՀ ներկայացուցիչը։

Նա պատմել է, որ ևս մեկ ծայրահեղ բարդ դեպք է տեղի ունեցել Արմավիրի մարզում։ Նրա ասելով, դիտորդների խմբի անդամները հանձնաժողովի աշխատանքում թերություններ են հայտնաբերել եւ նրանց ուշադրությունը հրավիրել են դրա վրա: "16/25 ընտրատեղամասում առանց բեյջերի մարդիկ են մոտեցել և խնդրել են ոչնչացնել դիտարկման ակտը։ Ընտրական տեղամասի տարածքում հասարակական կարգի պահպանություն իրականացնող մարմիններն անգործության էին մատնված: Դժվար էր, բայց մենք բարեհաջող դուրս եկանք այդ իրավիճակից", - եզրափակել է Մարկինան։

Հիշեցնենք, որ 2026 թվականի հունիսի 7-ին Հայաստանում տեղի են ունեցել հերթական խորհրդարանական ընտրությունները։ Ընդդիմությունն ահազանգել է, որ այդ օրը Սյունիքի մարզում զինծառայողների մեծ խմբեր ընտրատեղամասեր են բերվել ընտրատեղամասերի փակումից անմիջապես առաջ՝ մինչև ժամը 20:00-ն: Ըստ օրենսդրության՝ բոլոր նրանք, ովքեր արդեն տեղամասերում են, նույնիսկ, տեղամասերի փակումից հետո պետք է կամարտահայտություն իրականացնեն։ Նրանց քվեարկությունը տեւել է մինչեւ կեսգիշեր, իսկ որոշ տեղամասերում այն ավարտվել է ավելի ուշ։ Ընդդիմության ներկայացուցիչները համոզմունք են հայտնել, որ այդ միջադեպը երկրի իշխանությունների կողմից վարչական ռեսուրսի կիրառման հերթական դրսեւորումն է, որի նպատակն է ազդել ընտրությունների արդյունքների վրա:

Հավելենք, որ Հայաստանի Կենտրոնական ընտրական հանձնաժողովի նախնական տվյալների համաձայն, բոլոր 2005 ընտրատեղամասերի ձայների հաշվարկի արդյունքում խորհրդարան են անցնում Նիկոլ Փաշինյանի իշխող "Քաղաքացիական պայմանագիր" կուսակցությունը, Սամվել Կարապետյանի "Ուժեղ Հայաստան" դաշինքը, երկրորդ նախագահ Ռոբերտ Քոչարյանի "Հայաստան"դաշինքը: Մյուս թեկնածուների արդյունքները ցածր են կուսակցությունների համար անհրաժեշտ  4 տոկոս, դաշինքների համար՝ 8-10 տոկոս անցողիկ շեմից։ Ընտրություններին մասնակցությունը կազմել է 58,97 տոկոս։ Ամբողջ երկրում կայացած ընտրություններին քվեարկել է 1 476 597 քաղաքացի ՝ ընտրելու իրավունք ունեցող 2 միլիոն 505 հազար 228 քաղաքացիներից: Նշենք, որ ընտրությունների օրը վաղ առավոտից դիտորդներն ու լրագրողներն ահազանգում էին իշխող ուժի կողմից քվեարկության կազմակերպման բազմաթիվ խախտումների մասին: Այսպիսով, Փաշինյանի կուսակցությունը հնարավորություն ունի միանձնյա ձևավորել երկրի կառավարությունը ՝ ստանալով Հայաստանի խորհրդարանում մանդատների մեծամասնությունը: Այդ մասին նա հանդիսավոր հայտարարել էր ուշ գիշերին, երբ մշակվել էին ընտրատեղամասերի միայն մոտ 10% - ի տվյալները։