Լեմկինի ինստիտուտը լուրջ մտահոգություն է հայտնել Հայաստանի Հանրապետության ինքնիշխանության վերաբերյալ

Արմինֆո.Ցեղասպանության կանխարգելման և մարդկային անվտանգության ապահովման Լեմկինի ինստիտուտը հայտարարություն է հրապարակել, որում լուրջ մտահոգություն է հայտնել Հայաստանի Հանրապետության ինքնիշխանության վերաբերյալ։

Հունիսի 6-ին հրապարակված հայտարարության մեջ նշվում էր այն սպառնալիքների մասին, որոնց բախվում են Հայաստանի սահմանամերձ համայնքները, հատկապես հունիսի 7-ի խորհրդարանական ընտրությունների նախաշեմին, և մեջբերվում էր Սյունիքի անանուն մի բնակչի խոսքը. «Երևանում մեզ խենթ են անվանում այստեղ մնալու համար, բայց նրանք չեն հասկանում, որ եթե մենք հեռանանք այստեղից, հաջորդը իրենք են լինելու»։

Ինստիտուտը հայտարարել է, որ Հայաստանի ինքնիշխանությունը քննարկման ենթակա չէ, և նշել է, որ անկախ հունիսի 7-ին Հայաստանում կայացած ընտրությունների արդյունքներից, միջազգային հանրությունը պետք է ցեղասպանության կանխարգելման մեխանիզմը կիրառի Հարավային Կովկասում տնտեսական և դիվանագիտական հարաբերությունների նկատմամբ։

Հայտարարության մեջ նաև կոչ էր արվում միջազգային դիտորդներին, լրատվամիջոցներին և քաղաքացիական հասարակության կազմակերպություններին հետաքննել սահմանամերձ համայնքների ու Արցախից տեղահանված փախստականների հայտարարությունները, ներառյալ բնակելի տների ուղղությամբ ադրբեջանական գնդակոծությունների, Հայաստանի ինքնիշխան տարածքում ստեղծված ադրբեջանական ապօրինի հենակետերի և Արցախից տեղահանված փախստականների նկատմամբ խտրականության մասին հաղորդումները։ Լեմկինի ինստիտուտը նաև նախազգուշացրել է, որ Ադրբեջանը ցեղասպանություն է իրականացրել 2023 թվականին և չի կանգնի հանցագործության այդ միակ դեպքի վրա՝ կոչ անելով միջազգային հանրությանը վերջապես լրջորեն վերաբերվել այն սպառնալիքներին, որոնց բախվում են հայերը Հարավային Կովկասում։