Քաղաքական գործիչ․ Հայաստանի երրորդ նախագահի հայտարարությունն ընդդիմությանը կարող է զրկել Փաշինյանին իշխանությունից զրկելու միակ քաղաքական հիմքից

Արմինֆո.  ՀՀ երրորդ նախագահ Սերժ Սարգսյանի հայտարարությունն այն մասին, թե վարչապետ Նիկոլ Փաշինյանը չի գնում երրորդ ժամկետի, քանի որ նախորդ ընտրություններն արտահերթ էին, կարող է ընդդիմությունից խլել նրան իշխանությունից զրկելու միակ քաղաքական հիմքը: Այդ մասին Facebook-ի իր էջում գրել է քաղաքական մեկնաբան Կարպիս Փաշոյանը, ով խորհրդարանական հերթական ընտրություններին մասնակցել է "Լուսավոր Հայաստան" կուսակցության առաջնորդ Էդմոն Մարուքյանի հետ ։

«Հանրապետական մեր գործընկերների լկտի ու այլանդակ արձագանքները մի պահ թողնենք մի կողմ ու խոսենք ըստ էության։ «Երրորդ ժամկետի» քննադատությունը այս պահի դրությամբ միակ քաղաքագիտական հիմքն է, որի միջոցով հնարավոր է ապալեգիտիմացնել Նիկոլ Փաշինյանի ռեժիմը։ Մնացածը պոեզիայի ժանրից է։

2018 թ․-ին նորընտիր վարչապետ Սերժ Սարգսյանի մոտ թղթերով ամեն ինչ ճիշտ էր։ Քաղաքական ուժերի ճնշող մեծամասնությունը, հանրային զանգվածները ընդունել էին 2017 թ․-ի խորհրդարանական ընտրությունների արդյունքները, ամեն ինչ ճիշտ էր և մարդիկ պատրաստ կլինեին ապրել նոր խաղի կանոններով, եթե չլիներ սահմանադրական «խարդախության» գիտակցումը։

Այսինքն, ոչ մի հեղափոխություն էլ չէր լինի, եթե վարչապետի պաշտոնում մնար Կարեն Կարապետյանը կամ նույնիսկ ՀՀԿ-ից որևէ այլ թեկնածու առաջադրվեր, օրինակ՝ Վիգեն Սարգսյանը։

Բայց երրորդ նախագահը դրժեց իր խոստումը, առաջադրվեց ու ընտրվեց վարչապետ և մարդիկ հասկացան, որ սահմանադրական «խարդախությամբ» նա կարող է հավերժացնել իր իշխանությունը։ Հենց այս ամենի ընկալումը ապալեգիտիմացրեց նրա իշխանությունը՝ դատապարտելով անխուսափելի փլուզման։

Գրեթե նույն իրավիճակը ունենք Նիկոլ Փաշինյանի պարագայում։ Նա էլ օգտվելով այդ նույն կոստյումի անսպառ հնարավորություններից փորձում է հավերժացնել իր իշխանությունը՝ հղում անելով նույն խարդախությանը։ Իբր թե, ունի դրա իրավունքը։ Թղթերով նորից ամեն ինչ ճիշտ է, իսկ խորհրդարանական ընտրությունների արդյունքներն էլ որքան էլ վիճելի ու կասկածելի, բայց այնուամենայնիվ կարծես թե բոլորի կողմից ընդունելի։

Եվ հիմա ի՞նչ է լինելու։ Նիկոլ Փաշինյանը պե՞տք է անի այն, ինչը չստացվեց Սերժ Սարգսյանի մոտ, թե այն ինչ չի կարելի Սերժին, կարելի՞ է Նիկոլին։

Մեր մոտեցումը հետևյալն է․ չի կարելի թույլ տալ որևէ մեկի իշխանության հավերժացումը և Հայաստանում ադրբեջանական ու բելառուսական տիպի ռեժիմների հաստատումը։ Սա ամենակարճ ճանապարհն է դեպի ավտորիտարիզմ, որտեղ տիրապետող կլինեն բռնությունը, անարդարությունը, օրենքների և Սահմանադրության պղծումը, կոռուպցիան և ի վերջո պետության փլուզումը։

Սիրելի հանրապետականներ, օբյեկտիվ իրականությանը դիմադրելու փոխարեն, ագրեսիան մի պահ դրեք մի կողմ ու կյանքում մի անգամ գոնե խոստովանեք, որ Սերժ Սարգսյանը կոպտագույն, ճակատագրական սխալ է թույլ թվել։ Խոստովանեք ու անցնենք առաջ՝ քաղաքական դաշտը ազատագրելով Սերժ-Քոչարյան անիմաստ ու անվերջ գզվռտոցից», - գրել է Փաշոյանը։

Հիշեցնենք, որ հունիսի 10-ին ՀՀ երրորդ նախագահը լրագրողի խնդրանքով մեկնաբանելով, թե ինչու է Փաշինյանը գնում երրորդ ժամկետի, եթե 2018 թվին դրան դեմ էր (այն ժամանակ Սերժ Սարգսյանը երկու ժամկետ անընդմեջ նախագահի պաշտոնը զբաղեցնելու արգելքի պատճառով սահմանադրական փոփոխություններ նախաձեռնեց և դարձավ վարչապետ, որից հետո երկրում բողոքի ցույցեր սկսվեցին - խմբ.), հայտարարել էր, որ ինքը չի ընտրվել երրորդ ժամկետով: Ինչպես պարզաբանել Է Սարգսյանը, "երկու անգամ նախագահ է եղել, մեկ անգամ ՝ վարչապետ" ։ Մինչդեռ, ըստ երրորդ նախագահի, այդ պնդումները չի կարելի կիրառել Փաշինյանի նկատմամբ, քանի որ նրա դեպքում առաջին երկու քվեարկությունները եղել են վաղաժամկետ: