Փաստաբան Կոչուբաևը մեղավոր է ճանաչվել դատական և քննչական իշխանության ներկայացուցիչների "պատիվն արատավորող" հրապարակում տարածելու վերաբերյալ գործով

Արմինֆո.ՀՀ քրեական գործերի ընդհանուր իրավասության դատարանը մեղավոր է ճանաչել փաստաբան Ալեքսանդր Կոչուբաևին՝ դատական և քննչական իշխանության ներկայացուցիչների պատիվն ու արժանապատվությունը արատավորող տեղեկություններ տարածելու գործով: Այդ մասին Facebook-ի իր էջում գրել է Ալեքսանդր Կոչուբաևի փաստաբան Էրիկ Ալեքսանյանը։ 

Ավելի վաղ Կոչուբաեւին մեղադրանք էր առաջադրվել ՀՀ քրեական օրենսգրքի 490-րդ հոդվածի 2-րդ մասի հատկանիշներով: Այդ հոդվածը ենթադրում է մինչև 5 տարվա ազատազրկում ։ Ալեքսանյանն իր հրապարակման մեջ Կոչուբաևի կալանավորման ժամկետի վերաբերյալ մանրամասներ չի ներկայացրել։ 

Հայտնի փաստաբան, Contra Legem փաստաբանական ընկերության ղեկավար Ալեքսանդր Կոչուբաևը ձերբակալվել է 2025 թվականի հոկտեմբերի 16-ին ուժայինների կողմից՝ Շենգավիթի դատարանից դուրս գալուց հետո, որտեղ ընթանում էր Բագրատ արքեպիսկոպոս Գալստանյանի և իշխանությունների կողմից մեղադրվող ևս 17 մարդու գործով դատական նիստը։ Այնուհետև դատարանի որոշմամբ երկու ամսով կալանավորվել էր։ 

Հայ Առաքելական Եկեղեցու ներկայացուցիչներին աջակցող իրավաբանական հանրության նկատմամբ հոգեբանական ներգործության նպատակով ձեռնարկված կոպիտ ձերբակալության առիթը նրա գրառումն էր սոցցանցերում, որտեղ փաստաբանը ոչ այնքան պատշաճ էր արտահայտվել իրավապահ համակարգի և հենց Հայաստանի իշխանությունների նկատմամբ: "Քննիչներ, դատախազներ, դատավորներ, ովքեր հոգիները վաճառեցին սատանային, ձեր պատիժը կլինի երկնային: Աղոթում եմ Տիրոջը, որ չների ձեզ, և դուք ձեր մեղքը քավեք սերունդներով", - կիսվել էր փաստաբանն իր ապրումներով՝ Հայ Առաքելական Եկեղեցու ներկայացուցիչների դեմ հերթական ուժային արշավանքից հետո։ "Ես նույնպես սպա էի, և ուսադիրներից հրաժարվելը իմ կյանքի ամենադժվար որոշումն էր։ Բայց ընտանիք պահել կարելի է նաև ազնիվ աշխատանքով, ոչ թե աշխատավարձ ծծելով", - գրել էր նա։ Փաստաբանը հավելել էր նաև մի քանի անպարկեշտ արտահայտություններ, սակայն, ըստ միջադեպի վերաբերյալ իրենց վերաբերմունքն արտահայտող նրա գործընկերների, դրանցից ոչ մեկը չի ընկնում Քրեական օրենսգրքի հոդվածների տակ՝ որպես ոչ անձնավորված վիրավորանք: Նրա ձերբակալությունը հանրային լայն արձագանք և քննադատություն է առաջացրել փաստաբանական համայնքի մի շարք ներկայացուցիչների և իրավապաշտպանների շրջանում: