Փաստաբան․ Ծառուկյանը հարցաքննության է կանչվել խարդախությանն ու փողերի լվացմանն առնչվող գործի շրջանակներում

Արմինֆո.  "Բարգավաճ Հայաստան" կուսակցության առաջնորդ Գագիկ Ծառուկյանին կանչել են քննչական մարմին հարցաքննության՝ խարդախության ու փողերի լվացման համար նրան առաջադրված մեղադրանքների շրջանակներում: Այդ մասին հուլիսի 21-ին հաղորդել է Ծառուկյանի փաստաբաններից՝ Երեմ Սարգսյանը՝ Պետական եկամուտների կոմիտեի քննչական վարչության շենքի մոտ լրագրողների հետ զրույցում։

Ընդ որում, նա հստակեցրել է, որ քննչական մարմինն իրենց կանչել է հարցաքննության, նշելով, որ անհրաժեշտ են լրացուցիչ ճշտումներ, սակայն հարցաքննության կանչվելու ստույգ պատճառները հնարավոր կլինի հստակ ասել արդեն քննչական միջոցառումներից հետո: "Առայժմ հայտնի չէ, թե Ծառուկյանին որ դրվագով են բերել հարցաքննության։ Հարցաքննությունն, ամենայն հավանականությամբ, տեղի կունենա խարդախության եւ փողերի լվացման համար Ծառուկյանին առաջադրված մեղադրանքների շրջանակում։ Ինչ վերաբերում է հարկերից խուսափելու մեղադրանքին, ապա այն կարճվել է դատախազի կողմից ՝ ապօրինի ճանաչվելու հիմքով", - հաղորդել է փաստաբանը։

Մեկնաբանելով օրեր առաջ հրապարակված այն փաստաթղթերին, որոնք, պաշտպանական կողմի պնդմամբ, հերքում են կուսակցության առաջնորդին առաջադրված մեղադրանքները, փաստաբանը նշել է, որ իրենց կողմից նախկինում ևս ներկայացվել են Ծառուկյանի անմեղության բազմաթիվ ապացույցներ: "Սակայն դեռ պարզ չէ, թե արդյոք այդ նյութերը հաշվի են առնվել գործի քննության շրջանակներում, թե՝ ոչ։ Եթե նրանք ցանկանում են օբյեկտիվ քննություն անցկացնել, ապա մեր ներկայացրած բոլոր փաստաթղթերը պետք է ուսումնասիրվեն և օգտագործվեն որպես ապացույց։ Սակայն հազիվ թե նրանք ակտիվ աշխատեն այդ ուղղությամբ", - կարծում է Սարգսյանը։  

Նրա խոսքով ՝ դատավորին ներկայացվել են նաև փաստարկներ, որ Ծառուկյանի հետապնդումը քաղաքական ենթատեքստ ունի: Ավելին, նրա ասելով, պաշտպանությունն ուղղակիորեն դիմել է դատավորին այն հարցով, թե արդյոք նա ի վիճակի է քաղաքական ճնշման պայմաններում օբյեկտիվ գնահատական տալ գործին: "Մենք տեսնում ենք, որ դատական համակարգի նկատմամբ ճնշում է գործադրվում։ Ի պատասխան մեր հարցի ՝ դատավորն առաջարկեց մեզ ներկայացնել մեր հիմնավորումները,  ասելով, որ դրանք ուսումնասիրելուց հետո որոշում կկայացնի։ Սակայն հետագայում տեսանք, որ դա տեղի չունեցավ։ Դատարանի որոշման մեջ որևէ անդրադարձ չի եղել այն փաստերին, որոնք մենք ժամերով ներկայացրել ենք նիստի ընթացքում։ Դրանք կարող էին, առնվազն, փորձել հերքել, թեեւ դա անելը չափազանց դժվար էր, քանի որ մենք բավականին ծանրակշիռ ապացույցներ ունեինք", - նկատել է Սարգսյանը։

Մյուս փաստաբանը՝ Էմին խաչատրյանն, իր հերթին, կուսակցության առաջնորդի կալանավորման առնչությամբ ներկայացված վերաքննիչ բողոքի վերաբերյալ նշել է, որ այս պահին այդ հարցով որևէ նորություն չկա:"Բողոքը ներկայացվել է, մեկ - երկու օրվա ընթացքում կիմանանք, թե ով է քննելու այդ գործը, կանցնի բանավոր, թե գրավոր, եթե գրավոր, ապա երբ կհրապարակվի համապատասխան որոշումը", - եզրափակել է փաստաբանը:

Հիշեցնենք, որ հուլիսի 6-ին "Բարգավաճ Հայաստան" կուսակցության առաջնորդ և գործարար Գագիկ Ծառուկյանին ձերբակալել և տեղափոխել էին Հայաստանի Քննչական կոմիտե: Նա մեղադրվում է խարդախություն կազմակերպելու և առանձնապես խոշոր չափերով դրամական միջոցներն օրինականացնելու (լվանալու) մեջ ։ Հետաքննության վարկածով ՝ 2022-2024 թվականներին նրա ղեկավարությամբ գործող խումբը Հայաստանի և Իրանի միջև առևտրատնտեսական կապերի զարգացման պատրվակով Իրանի քաղաքացիների մասնակցությամբ ստեղծել է համատեղ իրավաբանական անձեր, որից հետո իրականացրել է խարդախ սխեմա ՝ պատճառելով ավելի քան 21 մլն դոլարի վնաս ։ Բացի այդ, Գագիկ Ծառուկյանին ևս մեկ մեղադրանք է առաջադրվել ՝ ապօրինի որսի համար: Հուլիսի 7-ին դատարանը բավարարել է Ծառուկյանին երկու ամսով կալանավորելու մասին մեղադրող կողմի միջնորդությունը։