Պոլսո հայոց պատրիարքությունը զորակցությւոն է հայտնել Ամենայն հայոց կաթողիկոսին և եպիսկոպոսներին

Արմինֆո.Պոլսո հայոց պատրիարքությունը զորակցություն է հայտնել Ամենայն հայոց Գարեգին Բ կաթողիկոսին և վեց եպիսկոպոսներին, որոնց նկատմամբ դատական վարույթներ են նախաձեռնվել: Այդ մասին ասվում է Պոլսո պատրիարքարանի պաշտոնական հայտարարությունում։ 

Ամենայն հայոց կաթողիկոսի և Եկեղեցու սրբազան եպիսկոպոսների դեմ դատական գործընթացներին դիմելը, նրանց աշխարհիկ դատարաններ կանչելը քրեական հանցագործություններ կատարելու մեղադրանքներով, աղբյուրի համաձայն, խորապես վիրավորում է Հայոց եկեղեցու հիերարխիկ արժանապատվությունը: Այդ ցավը սաստկանում է, ինչպես նշել են Պատրիարքարանում,  երբ անտեսվում են Հայաստանի Հանրապետության սահմանադրությամբ Եկեղեցուն տրված երաշխիքները, ինչպես նաև Մարդու իրավունքների հիմնարար սկզբունքները: 

"Սփյուռքում էլ Հայոց եկեղեցին շարունակում է առանցքային դերակատարում ունենալ մեր ժողովրդի հոգևոր, ազգային և հասարակական կյանքում: Ուստի, Սուրբ Էջմիածնի հեղինակության թուլացմանը կամ նրա անձեռնմխելիության դեմ ոտնձգությանն ուղղված ցանկացած քայլ վնասում է Եկեղեցու և հավատացյալ ժողովրդի դարավոր ամրապնդված կապերը: 

Պատմությունը վկայում է, որ այն ժամանակաշրջանում, երբ մեր ժողովուրդը զրկված է եղել պետականությունից, Հայ Առաքելական Եկեղեցին եղել է նրա անխորտակելի հենասյուներից մեկը", - ասված է հայտարարությունում: 

Հայտարարության համաձայն,  այդ գործընթացները վիրավորում են ոչ միայն Սուրբ Էջմիածնի եղբայրությանը, այլև Հայոց եկեղեցու Նվիրապետական աթոռներին, հոգևորականներին և միջեկեղեցական հարաբերությունները: 

"Մենք կոչ ենք անում բոլոր պատասխանատուներին թույլ չտալ ոտնձգություններ Հայոց եկեղեցու նկատմամբ և եկեղեցական պաշտոնական մարմինների որոշումները չդարձնել աշխարհիկ դատական դիմակայության առարկա", - նշել են Պատրիարքարանում:

Հիշեցնենք, որ Հայաստանի իշխանությունները 2025 թվականի մայիսից ակտիվ հակաեկեղեցական քաղաքականություն են ծավալել և ձգտում են հասնել Ամենայն հայոց Գարեգին Բ կաթողիկոսի հեռացմանը, ով այդ պաշտոնում ընտրվում է ցմահ: Այդ արշավի շրջանակներում հալածանքների են ենթարկվում ինչպես հոգևորականները, այնպես էլ եկեղեցու օգտին հանդես եկող քաղաքացիները։ Այս տարվա փետրվարին Հայաստանի դատախազությունը քրեական գործ է հարուցել Ամենայն հայոց Գարեգին Բ կաթողիկոսի նկատմամբ, նրա մեկնումը երկրից արգելված է: Գործը հարուցվել է Արման Սարոյանին կարգալույծ հռչակելու հետ կապված դատական ակտի կատարմանը խոչընդոտելու մեղադրանքով: Քրեական գործով դատախազ է նշանակվել Խաչատուր Գալստյանը: Գործով անցնում են ևս մի քանի բարձրաստիճան հոգևորականներ։ 

Օգոստոսի 7-ին, ժամը 16:00-ին պետք է կայանար Ամենայն հայոց Գարեգին Բ կաթողիկոսի և Գերագույն հոգևոր խորհրդի անդամ վեց եպիսկոպոսների գործով առաջին դատական նիստը: Սակայն դատավոր Հակոբ Մանուկյանը, ում նախագահությամբ պետք է տեղի ունենար նիստը, ինքնաբացարկ է հայտնել։ Դրանից հետո գործը պետք է հանձնվի մեկ այլ դատավորի, որը նոր նիստ կնշանակի։