Փաստաբան․ Արդեն երկրորդ դատավորը չցանկացավ քննել Ամենայն հայոց կաթողիկոսի դեմ գործը

Արմինֆո.Արդեն երկրորդ դատավորը չցանկացավ վարել Ամենայն հայոց Գարեգին Բ կաթողիկոսի և վեց եպիսկոպոսների դեմ գործը: Այդ մասին օգոստոսի 28-ին դատարանի դիմաց լրագրողների հետ զրույցում հայտարարել է փաստաբան Արա Զոհրաբյանը։

Նա հիշեցրել է, որ նիստի ընթացքում մեղադրող կողմը փորձել է հասնել դռնփակ ռեժիմով լսումների անցկացման։ Փաստաբանի կարծիքով՝ այս կերպ փորձ է արվել կոծկել այդ գործի շուրջ առկա ներքին խնդիրները: "Որովհետև այս գործը շատ լուրջ խնդիրներ ունի։ Չէ որ, ինչպես գիտեք, Ամենայն հայոց Գարեգին Բ կաթողիկոսին մեղադրում են իր կանոնական գործառույթը կատարելու համար։ Ընդ որում, այսօր մենք ականատես եղանք, թե ինչպես երկրորդ դատավորը չցանկացավ քննել այդ գործը", - ուշադրություն է հրավիրել փաստաբանը։

Միաժամանակ, Զոհրաբյանը նշել է, որ պաշտպանական կողմը համաձայն չէ նման որոշմանը։ Քանի որ, ինչպես հիշեցրել է փաստաբանը, Ամենայն հայոց կաթողիկոսի կարգադրությունը ընդունվել է Էջմիածնում, հետևաբար, այն ենթակա է քննության տեղի դատարանում: "Դատավորը չկիսեց մեր կարծիքը։ Մյուս կողմից, նրա կայացրած որոշումը խոսում է այն մասին, որ դատավորներն այդ գործը խնդրահարույց են համարում։ Որովհետև, մի կողմից, նրանց խիղճը, արդարությունն ու ճշմարտությունը, մյուս կողմից ՝ քաղաքական ճնշումը։ Եվ, ըստ երեւույթին, նրանք գտել են այդ հարցի լուծման այդպիսի ճանապարհ։ Սա իմ կարծիքն է: Մեր դիրքորոշումն այն է, որ գործն, ընդհանրապես, պետք է կարճվեր այս փուլում", - ընդգծել է Զոհրաբյանը։

Խոսելով այն մասին, թե ինչու է պաշտպանական կողմը դեմ եղել գործի Երևան վերահասցեագրմանը, փաստաբանը հիշեցրել է, որ Շիրակի թեմի առաջնորդ Միքայել արքեպիսկոպոս Աջապահյանի գործով լսումները ևս տեղի են ունեցել Երևանում, սակայն հետագայում պարզ է դարձել, որ խախտվել է շարունակականության սկզբունքը, և այդ որոշումը չեղյալ է հայտարարվել: "Որպես արդյունք, ժամանակ է կորցվել։ Այն, որ կաթողիկոսի գործը ևս քննվելու է Երևանում, իր մեջ նույն ռիսկերն է պարունակում ։ Բացի այդ, գործը կարող է մակագրվել այնպիսի դատավորի, որին հասարակությունը չի վստահում։ Օրինակ ՝ դատավոր Մասիս Մելքոնյանին, Կարեն Ֆարխոյանին, Արմինե Մելիքսեթյանին և այլն։ Նրանց դեպքում մենք բախվելու ենք խնդիրների արդարադատության հարցերում։ Բայց՝ տեսնենք։ Երբ գործը մակագրվի, մենք կներկայացնենք մեր դիրքորոշումը", - նշել է փաստաբանը։

Դատավորի որոշմանն արձագանքել է նաև "ՀայաՔվե" նախաձեռնության համակարգող Ավետիք Չալաբյանը: "Այսօր ՀՀ Արմավիրի առաջին ատյանի դատավոր Սերժ Ռուշանյանը հրաժարվեց քննել Ամենայն Հայոց կաթողիկոսի և հոգևոր խորհրդի անդամների ապօրինի գործը, վկայակոչելով նրա վիճելի ընդդատությունը։ Արդեն երկրորդ դատավորը , թեև ձևական պատրվակով, հրաժարվեց ձեռք տալ այս խայտառակ գործին", - Facebook-ի իր էջում գրել է Չալաբյանը:

Հիշեցնենք, որ Հայաստանի իշխանությունները 2025 թվականի մայիսից հակաեկեղեցական ակտիվ քաղաքականություն են ծավալել և ձգտում են հասնել Ամենայն հայոց Գարեգին Բ կաթողիկոսի հեռացմանը, ով այդ պաշտոնում ընտրվում է ցմահ: Այդ արշավի շրջանակներում հալածանքների են ենթարկվում ինչպես հոգևորականները, այնպես էլ եկեղեցու օգտին հանդես եկող քաղաքացիները։ Այս տարվա փետրվարին Հայաստանի դատախազությունը քրեական գործ էր հարուցել Ամենայն հայոց Գարեգին Բ կաթողիկոսի դեմ, նրա մեկնումը երկրից արգելված է: Գործը հարուցվել է Արման Սարոյանին կարգալույծ հռչակելուն առնչվող դատական ակտի կատարմանը խոչընդոտելու մեղադրանքով: Քրեական գործով դատախազ է նշանակվել Խաչատուր Գալստյանը: Գործով անցնում են ևս մի քանի բարձրաստիճան հոգևորականներ։ Օգոստոսի 7-ին դատավոր Հակոբ Մանուկյանը, ում նախագահությամբ պետք է տեղի ունենար Ամենայն հայոց կաթողիկոսի և վեց եպիսկոպոսների գործով առաջին նիստը, ինքնաբացարկ է հայտնե: Դրանից հետո գործը մակագրվել է դատավոր Սերժ Ռուշանյանին։ Ամենայն հայոց կաթողիկոսի և վեց եպիսկոպոսների նկատմամբ քրեական գործով նախնական դատական նիստը տեղի է ունեցել 2026 թվականի օգոստոսի 28-ին, ժամը 16:30-ին Էջմիածնի դատարանի Վաղարշապատի նստավայրում: Նիստի ժամանակ դատավորը որոշել է Ամենայն հայոց Գարեգին Բ կաթողիկոսի և վեց եպիսկոպոսների վերաբերյալ գործը փոխանցել Երևանի ընդհանուր իրավասության քրեական դատարան: