Հայաստանի մարզային բուհերը փակման վտանգի տակ են

Արմինֆո.Հայաստանի գրեթե բոլոր մարզային բուհերը փակվելու են։ Այդ մասին սեպտեմբերի 1-ին Ակադեմիական քաղաքի տարածքից տեսաուղերձով հաղորդել է ընդդիմադիր պատգամավոր, "Ուժեղ Հայաստան" կուսակցության ներկայացուցիչ Էդգար Ղազարյանը։

Մասնավորապես, նա հաղորդել է, որ այս տարվա սեպտեմբերի 1-ից Հայաստանի 229 հանրակրթական դպրոցների աշակերտները չեն կարողանա դպրոց հաճախել, քանի որ վերջիններս փակվելու են: Բացի այդ, պատգամավորը խոսել է կառավարության մշակած նախագծի մասին, որի համաձայն, փակվելու են այն բուհերը, որտեղ ուսանողների թիվը չի գերազանցում 4 հազարը։ Ղազարյանի ասելով՝ խոսքը գրեթե բոլոր մարզային բուհերի կամ մարզային մասնաճյուղերի մասին է՝ բացառությամբ Շիրակի մարզի: "Բացի այդ, վտանգված է Գիտությունների ազգային ակադեմիայի հետագա ճակատագիրը, եւ այս ամենն արվում է, որպեսզի մեր երկրում Ակադեմիական քաղաք կառուցվի", - ասել է խորհրդարանականը:

Այնուհետև նա տեսախցիկով ցուցադել է շրջակա տարածքը, որի վրա ոչինչ կառուցված չէ, և ոչինչ չկա, բացի քարերի ու պարկերի կույտից՝ հեգնական մեկնաբանություններ անելով կատարված աշխատանքների ընթացքի մասին։

Պատգամավորը նաև ընդգծել է, որ Ակադեմիական քաղաք կառուցել խոստանում է կառավարությունը, որն ի վիճակի չէ վերանորոգել դպրոցի սովորական սանհանգույցը: «Վարչապետը ստիպված է ինքնուրույն ստուգել զուգարանների վիճակը և բացահայտել դրանցում առկա խնդիրները: Բայց դա մեզ չի խանգարում, որպեսզի իրականացնենք այս հրաշալի նախագիծը, որը կոչվում է Ակադեմիական քաղաք», - ասել է Ղազարյանը։

Հիշեցնենք, որ 2025 թվականի նոյեմբերին կրթության, գիտության, մշակույթի և սպորտի նախարար Ժաննա Անդրեասյանը հաղորդել էր, որ ավանում շինարարական աշխատանքները կմեկնարկեն 2026 թվականին։ Հիշեցնենք, որ ավանի գլխավոր հատակագիծը մշակել է գերմանական gmp International GmbH Architects and Engineers ընկերությունը։ Այն կկառուցվի Երևանի 17-րդ թաղամասին հարող տարածքում։ ՀՀ կառավարությունը 2024 թվականի հունվարի 4-ին ընդունել է "Ակադեմիական ավանի կառուցման նպատակով Երևան քաղաքի և Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշակի տարածքների նկատմամբ գերակա հանրային շահ ճանաչելու մասին" որոշման նախագիծը: Երևանի 17-րդ թաղամասի տարածքը, որի սահմաններում են գտնվում պետության և համայնքի սեփականություն հանդիսացող, ինչպես նաև ֆիզիկական և իրավաբանական անձանց պատկանող հողամասերը, ինչպես նաև Համո Բեկնազարյանի անվան "Հայֆիլմ" կինոստուդիայի զբաղեցրած տարածքը կփոխանցվեն "Ակադեմիական քաղաք" հիմնադրամին: 2023 թվականի ապրիլի 21-ին ստեղծվել է «Ակադեմիական ավանի» հիմնադրամը: 2024 թվականի հոկտեմբերի 19-ին կառավարությունը հաստատել է "Ակադեմիական ավան" ծրագրի հայեցակարգը։ Ժաննա Անդրեասյանը, ներկայացնելով նախագիծը, հայտարարել է, որ մինչև 2030 թվականը Հայաստանի զարգացման պետական ծրագրի համաձայն, նախատեսվում է ստեղծել Ակադեմիական ավան՝ որպես որակյալ կրթության և հետազոտությունների ժամանակակից միջավայր: Անդրեասյանը տեղեկացրել է, որ Ակադեմիական ավանի տարածքում կտեղակայվի մինչև 16 բուհ՝ մինչև 8 պետական խոշորացված և մինչև 8 մասնավոր կամ միջազգային բարձրագույն ուսումնական հաստատություններ: Ակադեմիական քաղաքի կառուցումը կարժենա 1,2 տրիլիոն դրամ։