Ալեն Սիմոնյան ․ "Ո՞վ է խոսում Տիգրանաշենի հանձնման մասին։ Փաշինյանն, ուղղակի, այն այլ անունով է կոչել"

ԱրմԻնֆո.  Հայաստանի Անվտանգության խորհրդի քարտուղար Ալեն Սիմոնյանը որևէ տարօրինակ բան չի տեսել այն բանում, որ Հայաստանի վարչապետ Նիկոլ Փաշինյանը հայկական Տիգրանաշենը կոչել է ադրբեջանական անվանումով:

Այսպես, սեպտեմբերի 3-ին լրագրողների հետ զրույցում Սիմոնյանը մեկնաբանել է Հայաստանի վարչապետ Նիկոլ Փաշինյանի հայտարարությունն այն մասին, որ Տիգրանաշենը (որը Հայաստանի վարչապետը կոչել է ադրբեջանական Քյարքի անվանումով - խմբ.) Հայաստանի տարածք չէ: "Ո՞վ է խոսում Տիգրանաշենի հանձնման մասին։ Փաշինյանն, ուղղակի, այլ անունով է կոչել այն։ Քանի որ մենք գիտենք, որ Հայաստանի տարածքը 29 743 քառակուսի կիլոմետր է։ Եվ երբ մենք խոսում ենք սահմանազատման և սահմանագծման մասին, Դա նշանակում է, որ այնտեղ, որտեղ մենք առաջ ենք գնացել,  ստիպված ենք լինելու հեռանալ այդ դիրքերից, իսկ այնտեղ, որտեղ դա արել է Ադրբեջանը, նրանք են ստիպված  լինելու հեռանալ այդ տարածքներից", - հայտարարել է Հայաստանի ԱԽ քարտուղարը։

Ընդհանուր առմամբ, ինչպես նշել է Սիմոնյանը, ինքը տեսնում է ադրբեջանական կողմի խաղաղության պատրաստակամությունը ։ "Ես տեսնում եմ ադրբեջանական կողմի պատրաստակամությունը՝ քայլեր անելու, և նա արդեն անում է դրանք ՝ խաղաղության հաստատման ուղղությամբ ։ Այն քայլերը, որոնք կարող է իրեն թույլ տալ։ Պարզ է, որ մենք դեռևս ունենք հարցեր, որոնք բարձրաձայնում ենք մեր հանդիպումների ընթացքում, և որոնց քննարկման շրջանակներում բախվում ենք խնդիրների ։ Դրանք հարցեր են ՝ կապված պահվող անձանց, անհետ կորածների հետ", - պարզաբանել է Սիմոնյանը։

Խոսելով այն մասին, թե արդյոք գերիների հարցը քննարկվել է Բիշքեկում կայացած հանդիպման ժամանակ, ԱԽ քարտուղարը նշել է, որ այդ բոլոր հարցերը մեկ վերնագիր ունեն՝ երկրների միջև խաղաղության խորացում: Ընդ որում, ի պատասխան հերթական ճշտմանը, թե ինչու Ադրբեջանը չի վերադարձնում հայ ռազմագերիներին, Սիմոնյանը որոշել է հիշեցնել, որ նրանց մի մասին պատերազմից հետո վերադարձրել են, և, նրա ասելով, դա իրենց ընդհանուր աշխատանքի արդյունքն է: "Մեզ համար չկա տարբերակ, որ մենք այդ հարցով չենք զբաղվելու կամ որ այն մեր օրակարգից դուրս է լինելու", - վստահեցրել է Սիմոնյանը:

Նա նաև հաղորդել է Ադրբեջան նախատեսվող այցի մասին, նշելով, որ առայժմ հստակ ժամկետներ չկան: "Չեմ բացառում, որ նման այց հնարավոր է։ Բայց առայժմ կոնկրետ ժամկետներ չկան", - եզրափակել է Սիմոնյանը։

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Փորձագետների գնահատմամբ ՝ նրանք մի քանի հարյուր են ։ Այսօր Ադրբեջանի իշխանությունները հաստատում են իրենց մոտ 19 հայերի առկայությունը ։ Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ․ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:

Բաքվի խամաճիկային դատարանը շինծու մեղադրանքներով  ցմահ ազատազրկման է դատապարտել Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին, իսկ Բակո Սահակյանին և Արկադի Ղուկասյանին եւ Ռուբեն Վարդանյանին՝ 20 տարվա ազատազրկման: Մնացած արցախցիներին, այսպես կոչված, դատարանը դատապարտել է մինչև 15 տարվա ազատազրկման։