Երևանում կանցկացվի Ստեփան Սարգսյանին նվիրված ազատ ոճի ըմբշամարտի միջազգային մրցաշար

Արմինֆո. Սեպտեմբերի 10-13-ը Երևանում կանցկացվի Ստեփան Սարգսյանին նվիրված ազատ ոճի ըմբշամարտի ավանդական միջազգային մրցաշարը, որի իրականացման համար ՀՀ կառավարության սեպտեմբերի 3-ի որոշմամբ կուղղվի 18,483 մլն դրամ։

Կառավարության որոշման հիմնավորման մեջ նշվում է, որ վերջին տարիներին ազատ ոճի ըմբշամարտը մեծ հաջողությունների է հասել. Արսեն Հարությունյանը և Արման Անդրեասյանը դարձել են Եվրոպայի 2024 թվականի չեմպիոններ, Լյովիկ Միքայելյանն ու Սարգիս Բեգոյանը ՝ Եվրոպայի 2025 թվականի պատանեկան և երիտասարդական առաջնությունների հաղթողներ: Հայաստանի մեծահասակների, պատանիների ազգային հավաքականի կազմում ևս կան մրցանակակիրներ: Հաշվի առնելով այս բոլոր հանգամանքները, ինչպես նաև ավանդույթները ՝ ըմբշամարտի միջազգային ֆեդերացիան առաջարկել է Հայաստանում անցկացնել Ստեփան Սարգսյանին նվիրված ազատ ոճի ըմբշամարտի միջազգային մրցաշար:

Ակնկալվում է, որ միջոցառմանը կմասնակցեն 15 երկրների ներկայացուցիչներ և 181 մասնակից: Միջազգային մրցաշարի անցկացումը կարևոր դեր է խաղում այս մարզաձևի զարգացման և հանրահռչակման գործում, ինչի շնորհիվ Հայաստանի Հանրապետությունը միջազգային մարզական հարթակներում առավել ճանաչելի կդառնա որպես առաջատար երկիր, ինչը կապահովի երկրի մարզական հեղինակության բարձրացումը և Հայաստան-Սփյուռք կապերի ամրապնդումը:  Միեւնույն ժամանակ, կնպաստի մշակութային արժեքների եւ զբոսաշրջության զարգացմանը, այդ թվում ՝ հյուրանոցների, մշակութային կենտրոնների եւ մարզական կառույցների վերականգնմանը, ինչն, իր հերթին, ազդեցություն է ունենում երկրի տնտեսության զարգացման վրա: