Օվերչուկ․ Ռուսաստանը հույս ունի, որ Հայաստանը կշարունակի կառուցողական աշխատանքը ԵԱՏՄ-ում

Արմինֆո. Ռուսաստանը հույս ունի, որ Հայաստանը կշարունակի կառուցողական աշխատանքը Եվրասիական տնտեսական միությունում (ԵԱՏՄ): Այդ մասին հայտարարել է ՌԴ փոխվարչապետ Ալեքսեյ Օվերչուկը՝ "Վեստի" ծրագրին։

Նրա խոսքով՝ Հայաստանը միության մասնակից է 10 տարուց մի փոքր ավելի, և այդ ժամանակահատվածում երկրի ՀՆԱ-ն աճել է գրեթե երեք անգամ: Բնակչության մեկ շնչին բաժին ընկնող ՀՆԱ-ն, համապատասխանաբար, նույնպես եռապատկվել է։

"Մեր առևտուրը պիկ 2024 թվականին հասել է 12,4 մլրդ դոլարի՝ այն դեպքում, երբ Հայաստանի ՀՆԱ-ն այդ ժամանակահատվածում եղել է մոտ 26-27 մլրդ դոլարի մակարդակում։ Եվ մենք, իհարկե, մեծ հույս ունենք, որ Հայաստանը կշարունակի կառուցողական աշխատել Եվրասիական տնտեսական միության մյուս մասնակից պետությունների հետ միասին", - ասել է Օվերչուկը։

Մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում Հայաստանին առաջարկել էր որքան հնարավոր է շուտ կողմնորոշվել ԵՄ-ին և ԵԱՏՄ-ին անդամակցության հարցում ՝ նշելով հարկ եղած  դեպքում "քաղաքակիրթ ապահարզան սկսելու" պատրաստակամությունը։ Երևանում՝ ի պատասխան, նշել էին, որ ԵԱՏՄ-ն կլքեն, երբ հարկ համարեն։ Իսկ արդեն մայիսի 29-ին ԵԱՏՄ երկրների ղեկավարները համատեղ հայտարարություն էին ընդունել, որում Հայաստանից պահանջել էին հանրաքվե անցկացնել ԵԱՏՄ-ում գտնվելու հարցի շուրջ։ Նույն օրը Ռուսաստանի նախագահը հայտարարել էր, որ Հայաստանը չի կարող նստել երկու աթոռի վրա և պետք է հնարավորինս շուտ կողմնորոշվի ընտրության հարցում:

Հիշեցնենք, որ ՀՀ կառավարությունը 2025 թվականի հունվարի 9-ին հավանություն է տվել "ԵվրաՔե" քաղաքացիական նախաձեռնության կողմից առաջարկված ՝ Եվրոպական միությանն անդամակցելու գործընթաց սկսելու մասին օրենքի նախագծին: Նախագիծն ուղարկվել է Հայաստանի խորհրդարան ՝ հաստատման։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը ։ Փաստաթուղթը ստորագրվել է նույն թվականի ապրիլի 4-ին։ Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրամիությանը միաժամանակյա անդամակցությունն անհնար է: