ՀՀ ԱԺ խոսնակ․ Շաքի գյուղում դիվերսիայի մասին խոսելու հարկ չկա

Արմինֆո. Անհրաժեշտ է պարզել, թե ինչ պայմաններում է Ադրբեջանի զինված ուժերի զինծառայողը հայտնվել Հայաստանի տարածքում։ Այդ մասին հոկտեմբերի 6-ին լրագրողների հետ ճեպազրույցում հայտարարել է ՀՀ Ազգային ժողովի նախագահ Ռուբեն Ռուբինյանը ՝ անդրադառնալով Շաքի գյուղում տեղի ունեցած միջադեպին։

ԱԺ նախագահի խոսքով՝ հայ-ադրբեջանական սահմանն ամենաերկարն է։ Ընդ որում, այդ սահմանը սահմանազատման է ենթարկվել միայն մասամբ։ Դրա մի մասը հսկում են սահմանապահները, մյուս մասը ՝ զինված ուժերի զինծառայողները։ 1991 թվականից, շարունակել է Ռուբինյանը, երկու կողմերի զինծառայողներն այս կամ այն պատճառով, բացառությամբ դիվերսիոն գործողությունների, հայտնվել են միմյանց տարածքներում։ Վերջին շրջանում, երբ տեղի էին ունենում նման դեպքեր, հատկապես խաղաղության հաստատումից հետո, կողմերը, որպես կանոն, միմյանց հետ էին վերադարձնում այդ զինվորներին։ Բայց եղել են դեպքեր, երբ զինծառայողներն՝ իրենք, չեն ցանկացել վերադառնալ։

"Իսկ Շաքիի միջադեպի պարագայում  պետք է պարզել՝ արդյոք ադրբեջանական բանակի զինվորը դասալիք է եղել, թե մոլորվել է։ Ակնհայտ է միայն մեկ բան. տվյալ դեպքում դիվերսիայի մասին խոսելու հարկ չկա։ Եթե խոսքը դիվերսիայի մասին լիներ, ադրբեջանական կողմը նախապես չէր տեղեկացնի հայկական կողմին։ Լավ նորությունն այն է, որ Հայաստանի տարածք ներխուժելու փորձ չկա։ Մենք գործ ունենք մի զինվորի հետ, ով ապօրինի հատել է սահմանը։ Ակնհայտ է նաև, որ Հայաստանում գտնվելու ժամանակ տվյալ զինծառայողը հանցագործություն է կատարել, քանի որ մտել է մարդկանց տուն, կրակել նրանց վրա, իսկ դա հանցագործություն է: Հենց այդ պատճառով էլ նա կալանավորվել է և նրան մեղադրանք է առաջադրվել", - ասել է Ռուբեն Ռուբինյանը։

Նա հավելել է, որ այս ֆոնին անհասկանալի է, թե ինչի դեմ է պայքարում ընդդիմությունը, ըստ էության, խոսքը գոյություն չունեցող կարծիքի դեմ պատերազմի մասին է: ԱԺ նախագահը նշել է, որ փաստի առթիվ քննչական միջոցառումներ են ընթանում, աշխատանքներ են տարվում իրավիճակը գնահատելու ուղղությամբ: "Իսկ ընդդիմությունն անընդհատ մատնանշում է, որ այս դեպքն, իբր, խաղաղության բացակայության վառ օրինակ է։ Բայց թույլ տվեք, չէ որ սա այն դեպքն է, երբ որպես սուբյեկտ  հանդես է գալիս ոչ թե Ադրբեջանը, այլ դասալիքը, որն ապօրինաբար լքել է իր զորամասը", - նշել է Ազգային ժողովի նախագահը։

Հիշեցնենք, որ հոկտեմբերի 1-ին հայտնի էր դարձել, որ ադրբեջանցի զինված զինվոր Նասիմի Մուսաևը, ով ապօրինի մուտք է գործել Հայաստանի տարածք և ներխուժել Սյունիքի մարզի Շաքի գյուղի տներից մեկը, հարձակվել է երեխաների և նրանց մոր վրա: Ծավալված պայքարի արդյունքում տուժել է տանտիրուհին ՝ Անի Ավետիսյանը (հրազենային վիրավորում է ստացել), ինչպես նաև նրա երկու երեխաները ։ Դիմադրություն ցույց տալով ՝ Ավետիսյանը հասցրել է դանակահարել ադրբեջանցի զինվորականին։ Դեպքի վայր ժամանած ուժայինները ձերբակալել են Մուսաևին ։ Հարուցվել է քրեական գործ, ադրբեջանցի զինվորականը ձերբակալվել է 2 ամիս ժամկետով։