Լեոնարդո Դի Կապրիոն աջակցություն է հայտնել Երևանում հայտարարված վտանգված տեսակների պաշտպանության լայնածավալ գլոբալ նախաձեռնությանը

Արմինֆո.  Հոլիվուդյան դերասան և շրջակա միջավայրի պաշտպան Լեոնարդո Դի Կապրիոն իր աջակցությունն է հայտնել Երևանում Կենսաբազմազանության վերաբերյալ COP17 համաժողովի ժամանակ հայտարարված վտանգված տեսակների պաշտպանության լայնածավալ գլոբալ նախաձեռնությանը:

Ինչպես հաղորդում է Կոլումբիայի ԱԳՆ մամուլի ծառայությունը, Կոլումբիան և Հայաստանը գործարկել են անհետացման սպառնալիքի տակ գտնվող տեսակների վերականգնման գործողությունների կոալիցիան (CARES): Կոալիցիայի կազմում են 16 հիմնադիր կառավարություններ՝ Հայաստանի, Բելիզի, Բրազիլիայի, Կանադայի, Չինաստանի, Կոլումբիայի, Կոստա Ռիկայի, Էկվադորի, Ֆիջիի, Մադագասկարի, Մեքսիկայի, Պանամայի, Պապուա Նոր Գվինեայի, Պերուի, Միացյալ Թագավորության և Վանուատուի:

"Կոլումբիայի համար անհետացումը կանխելը բավարար չէ։ Իրական խնդիրն է վճռականորեն շարժվել դեպի տեսակների վերականգնումը իրենց բնական միջավայրում: Այս տեսլականը մեր "հրաշք ազգի" ABC ծրագրի հիմքում է: Կոլումբիայում մենք արդեն կյանքի ենք կոչում այս նպատակը ՝ քայլեր ձեռնարկելով անհետացման վտանգի տակ գտնվող տեսակների վերականգնման համար, ինչպիսիք են օրինոկյան կոկորդիլոսը և կապտակտուց կուրասոն, ինչպես նաև վերականգնել դեղականջ թութակի պոպուլյացիան: CARES ծրագրի շրջանակներում Կոլումբիան եւ Հայաստանը ձգտում են ամրապնդել միջազգային համագործակցությունը եւ պարտավորություններից անցնել կոնկրետ գործողությունների, որոնք թույլ կտան ապահովել անհետացման վտանգի տակ գտնվող տեսակների կայուն վերականգնումը", - հայտարարել է Կոլումբիայի շրջակա միջավայրի եւ կայուն զարգացման նախարար Ֆաբիո Արխոնա Հինկապիեն, ում հղում է անում  Կոլումբիայի արտաքին քաղաքական գերատեսչությունը:

Կոալիցիայի գործարկումներին արձագանքել է Լեոնարդո Դի Կապրիոն, ով համոզմունք է հայտնել, որ ոչնչացման կանխարգելումը բավարար չէ: Նրա խոսքով ՝ անհրաժեշտ է փրկել անհետացման եզրին գտնվող տեսակները և վերականգնել դրանց պոպուլյացիաները։

"ՄԱԿ-ի կենսաբազմազանության համաժողովի (COP17) հայտարարությունները վկայում են այդ նպատակին հասնելու աճող գլոբալ ձգտման մասին: 17 երկրներ ՝ Հայաստանի և Կոլումբիայի գլխավորությամբ, միացել են վտանգված տեսակների վերականգնման գործողությունների նոր կոալիցիային (CARES) ՝ հանձնառություն ստանձնելով արագացնել անհետացումը կանխելու և տեսակների չափելի վերականգնմանը հասնելու ջանքերը:

Ինը բարեգործական հիմնադրամներ և կազմակերպություններ, ներառյալ իմ կազմակերպությունը՝ Re:wild-ը, ձեւավորել են տեսակների վերականգնման դաշինք ՝ հինգ տարվա ընթացքում համատեղ հատկացնելով և համախմբելով ավելի քան 500 միլիոն դոլար ՝ աջակցելու վայրի բնության ոչնչացման կանխարգելմանը, խիստ վտանգված  տեսակների վերականգնմանը ամբողջ աշխարհում: Այս երկու առանձին նախաձեռնությունները միավորում է ընդհանուր նպատակ՝ օգնել վերականգնել աշխարհի ամենավտանգված տեսակները, ինչը պահանջում է շարունակական ներդրումներ, համակարգված պահպանման գործողություններ և երկարաժամկետ նվիրվածություն: Շնորհավորում եմ հիմնադիր կառավարություններին և կազմակերպություններին", - գրել է դերասանն Instagram-ի իր էջում ։

Դերասան, մի շարք մրցանակների դափնեկիր Լեոնարդո Դի Կապրիոն, ով չորս անգամ առաջադրվել է "Օսկար" մրցանակի, իր կարիերայի մեծ մասի ընթացքում բացահայտ արտահայտվել է շրջակա միջավայրի պաշտպանության օգտին: 1998 թվին, 24 տարեկան հասակում, Դի Կապրիոն հիմնել է իր սեփական հիմնադրամը ՝ նվիրված Երկրի վերջին պահպանված անձեռնմխելի անկյունները պաշտպանելուն և լուծումներ մշակելուն, որոնք ուղղված են մարդկության և բնության ավելի ներդաշնակ հարաբերությունների ձեռքբերմանը: Դրամաշնորհների տրամադրման, հանրային արշավների անցկացման և մեդիա-նախագծերի իրականացման շրջանակներում Դի Կապրիոյին հաջողվել է ուշադրություն գրավել և ֆինանսական աջակցություն ցուցաբերել կենսաբազմազանության պաշտպանության, ծովային և անտառային բնական ռեսուրսների ռացիոնալ օգտագործման և կլիմայի փոփոխության խնդիրներին ուղղված գործողություններին:

"Լեոնարդո Դի Կապրիո հիմնադրամը" աջակցում է բնական ռեսուրսների ռացիոնալ օգտագործման ավելի քան 35 նորարարական նախագծերի ամբողջ աշխարհում, որոնք օգնում են պահպանել խոցելի էկոհամակարգերը և հիմնական կենսաբանական տեսակները: Դի Կապրիոն նաև մի շարք բնապահպանական կազմակերպությունների տնօրենների խորհրդի անդամ է, ներառյալ Վայրի բնության համաշխարհային հիմնադրամը, Բնական ռեսուրսների պահպանության խորհուրդը, Կենդանիների պաշտպանության միջազգային հիմնադրամը և "Մաքուր ծովեր և օվկիանոսներ 5" նախագիծը: