ՅՈՒՆԵՍԿՕ-ի գլխավոր տնօրեն Խալեդ Էլ-Էնանին այցելել է  Զվարթնոց տաճար

Արմինֆո.  Կենսաբազմազանության մասին կոնվենցիայի կողմերի 17-րդ համաժողովին (COP17) մասնակցելու նպատակով Հայաստանում գտնվող ՅՈՒՆԵՍԿՕ-ի գլխավոր տնօրեն Խալեդ Էլ-Էնանին այցելել է  Զվարթնոց տաճար, որը գրանցված է  ՅՈՒՆԵՍԿՕ-ի Համաշխարհային ժառանգության ցուցակում։

Կրթության, գիտության, մշակույթի և սպորտի նախարարության հաղորդագրության համաձայն,  ՅՈՒՆԵՍԿՕ-ի գլխավոր տնօրեն Խալեդ Ալ-Անանիին ուղեկցել են ԿԳՄՍ նախարարի տեղակալ Ալֆրեդ Քոչարյանը և ՅՈՒՆԵՍԿՕ-ում Հայաստանի մշտական ներկայացուցիչ Արամ Հակոբյանը:

Պաշտոնյաները շրջել են հուշարձանի տարածքում և թանգարանային հատվածում։ Գլխավոր տնօրենին ներկայացվել են հուշարձանի պատմությունը, պահպանության ներկայիս վիճակը, կատարված և նախատեսվող աշխատանքները:

ՅՈՒՆԵՍԿՕ-ի գլխավոր տնօրենն ընդգծել է հուշարձանների պատշաճ կառավարման
կարևորությունը, մշակութային և կրթական նպատակներով օգտագործումը: Քննարկվել են համագործակցության հետագա զարգացման հնարավորությունները:

Սուրբ Գրիգոր Լուսավորչին նվիրված Զվարթնոց տաճարը 7-րդ դարի հայկական ճարտարապետության հուշարձան, գտնվում է Երևանի և Վաղարշապատի մոտակայքում։ 2000 թվականին տաճարի ավերակները և դրա շրջակայքում գտնվող հնագիտական տարածքը ներառվել են ՅՈՒՆԵՍԿՕ-ի Համաշխարհային ժառանգության ցանկում: Վարկածներից մեկի համաձայն, անվանումը հին հայերենից թարգմանաբար նշանակում է "արթուն հրեշտակների տաճար"։ Ըստ հայ պատմիչ Սեբեոսի՝ կառուցվել է Ներսես Գ Շինարար կաթողիկոսի օրոք 640-650 թվականներին, ով նախատեսում էր իր նստավայրը Դվինից տեղափոխել Վաղարշապատ։ X դարում տաճարը երկրաշարժի ժամանակ փլուզվել է՝ երկրորդ հարկաշարքի հենարանների հանգույցների թուլության պատճառով։ Զվարթնոցի ավերակները բացվել են 1901-1907 թթ. պեղումների ժամանակ։ Ներկայումս առաջին հարկաշարքը գրեթե ամբողջությամբ վերակառուցվել է։