Խամոյան․ "Հայաստան" դաշինքը չի քվեարկի նոր սահմանադրությունը հանրաքվեի դնելու օգտին

Արմինֆո. Հնարավոր չի լինի համոզել "Հայաստան" դաշինքին՝ քվեարկել նոր սահմանադրությունը հանրաքվեի դնելու օգտին։ Այդ մասին հոկտեմբերի 22-ին հայտարարել է ԱԺ ընդդիմադիր "Հայաստան" խմբակցության պատգամավոր Ագնեսա Խամոյանը՝ դատարանի դիմաց, որտեղ քննարկվում է ՀՀ երկրորդ նախագահ Ռոբերտ Քոչարյանի եւ նրա որդու՝ Սեդրակ Քոչարյանի կալանքը երկարաձգելու հարցը։ Նա այդպես է մեկնաբանել  Հայաստանում հնարավոր արտահերթ ընտրությունների մասին վարչապետ Նիկոլ Փաշինյանի հայտարարությունը՝ եթե չհաջողվի խորհրդարանական ընդդիմությանը համոզել կողմ քվեարկել նոր սահմանադրությունը հանրաքվեի դնելու որոշմանը։

Այդ առնչությամբ պատգամավորը հիշեցրել է, որ իրենց քաղաքական ուժը հստակ դիրքորոշմամբ հանդես է եկել դեռ Փաշինյանի այսօրվա հայտարարությունից առաջ: "Այդ մասին մենք արդեն հայտարարել ենք ավելի վաղ, մինչև վարչապետի այսօրվա հայտարարությունը։ Մենք այդ մասին խոսել ենք նաև մեր քաղաքական ուժի նախընտրական քարոզարշավի ժամանակ, հայտարարելով, որ դեմ ենք "ալիևյան" սահմանադրությանը, և ընտրությունների ժամանակ, և դրանից հետո, և Ազգային ժողովում։

Բազմաթիվ ելույթներում և հարցազրույցներում մենք նաև բազմիցս ընդգծել ենք, որ այդ հարցում չարժե հույս դնել "Հայաստան" դաշինքի աջակցության վրա: Մենք մտադիր չենք քվեարկել նոր սահմանադրության ընդունման օգտին", - նշել է Խամոյանը։ Մեկնաբանելով Փաշինյանի հայտարարությունն այն մասին, որ ինքը սահմանադրական փոփոխությունները դիտարկում է որպես Հայաստանի հարատևության հարց, ընդդիմադիրը հիշեցրել է, որ սա Հայաստանի վարչապետի առաջին նման հայտարարությունը չէ:

Նա հիշեցրել է, թե ինչպես Փաշինյանը դեռ իր քաղաքական ուժի նախընտրական քարոզարշավի ժամանակ հայտարարում էր, որ եթե իր" Քաղաքացիական պայմանագիր" կուսակցությունը չստանա սահմանադրական մեծամասնություն, Հայաստանում պատերազմ կսկսվի: "Այսինքն, նույն մարդը հայտարարում էր, որ սեպտեմբերին պատերազմ կլինի, եթե իր կուսակցությունը սահմանադրական մեծամասնություն չստանա, իսկ այսօր արդեն հոկտեմբերն է։ Իր իշխանությունը պահելու համար նա կարող է ցանկացած հայտարարություն անել և դիմել ցանկացած մանիպուլյացիայի", - նշել է պատգամավորը։ Ընդհանուր առմամբ, Խամոյանը կարծում է, որ ներկայիս բռնաճնշումները կապված են նոր զիջումների հետ, որոնց մտադիր է գնալ Փաշինյանը: Դրանք, նրա ասելով, նպատակ ունեն կանխել ցանկացած դիմադրության ձևավորում։ "Եվ Փաշինյանը շատ լավ հասկանում է, որ Հայաստանի երկրորդ նախագահ Ռոբերտ Քոչարյանը կարող է հայտնվել այդ դիմադրության առաջնագծում", - ամփոփել է պատգամավորը:

Նշենք, որ հոկտեմբերի 22-ին ճեպազրույցի ընթացքում Հայաստանի վարչապետը չի բացառել արտահերթ խորհրդարանական ընտրությունների անցկացումը, եթե չհաջողվի համոզել խորհրդարանական ընդդիմությանը կողմ քվեարկել նոր ՀՀ սահմանադրությունը հանրաքվեի դնելու որոշմանը: Հիշեցնենք, որ 2026 թվականի հունիսի 7-ին Հայաստանում կայացած հերթական խորհրդարանական ընտրությունների արդյունքում "Քաղաքացիական պայմանագիր" կուսակցությունն ունի 3/5 մեծամասնություն, որը թույլ է տալիս ընդունել սահմանադրական օրենքներ և նշանակել պաշտոններում, սակայն կուսակցությունը չունի ձայների 2/3 մեծամասնություն, որն անհրաժեշտ է ՀՀ սահմանադրության մեջ ուղղակի փոփոխություններ կատարելու համար:

Հավելենք, որ Արցախի բռնազավթումից հետո Բաքվից հաճախ են հնչում ՀՀ սահմանադրության փոփոխության պահանջներ՝ այն պատճառով, որ այնտեղ, իբր, տարածքային նկրտումներ կան Ադրբեջանի նկատմամբ։ Այս և մյուս պահանջների կատարումն ադրբեջանական կողմը ներկայացնում է որպես "խաղաղության պայմանագրի" կնքման նախապայման։