Հայաստանի շրջակա միջավայրի նախարարը Շվեյցարիայի, Հնդկաստանի և Կատարի ներկայացուցիչների հետ քննարկել է բնապահպանական համագործակցության հեռանկարները

Արմինֆո.COP17-ի նախագահ, Հայաստանի շրջակա միջավայրի նախարար Համբարձում Մաթևոսյանն առանձին հանդիպումներ է անցկացրել է Շվեյցարիայի, Հնդկաստանի և Կատարի ներկայացուցիչների հետ․ ուշադրության կենտրոնում եղել են բնապահպանական համագործակցության հեռանկարները։

Ինչպես հաղորդել է ՀՀ շրջակա միջավայրի նախարարությունը, Շվեյցարիայի շրջակա միջավայրի դաշնային գրասենյակի տնօրեն, պետական քարտուղար Կատրին Շնեեբերգերի հետ հանդիպմանը Համբարձում Մաթևոսյանը շնորհակալություն է հայտնել Հայաստանի բնապահպանական ոլորտին ցուցաբերվող շարունակական աջակցության համար՝ կարևորելով FORACCA ծրագրի դերը անտառների կայուն կառավարման, կլիմայի փոփոխության նկատմամբ դիմակայունության բարձրացման և գյուղական համայնքների կենսապայմանների բարելավման գործում։ Անդրադարձել է նաև COP17-ի շրջանակում համագործակցությանը՝ ընդգծելով կենսաբազմազանության պահպանության համաշխարհային հանձնառությունները տեղում չափելի արդյունքների վերածելու անհրաժեշտությունը։

Հնդկաստանի շրջակա միջավայրի, անտառների և կլիմայի փոփոխության նախարար Բհուպենդեր Յադավի հետ հանդիպման ընթացքում քննարկվել են շրջակա միջավայրի պահպանության ոլորտում հայ-հնդկական համագործակցության ընդլայնման հնարավորությունները։

Համբարձում Մաթևոսյանը կարևորել է Հայաստանի և Հնդկաստանի միջև բարեկամական հարաբերությունները՝ որպես ոլորտային համագործակցության զարգացման, փորձի փոխանակման և համատեղ նախաձեռնությունների իրականացման հիմք։

Կողմերն անդրադարձել են նաև COP17-ի նախարարական բանակցությունների շրջանակում փոխգործակցությանը և կենսաբազմազանության պահպանությանն ուղղված միջազգային ջանքերին։ Այս համատեքստում նախարարը կարևորել է խոշոր կատվազգիների միջազգային դաշինքի շրջանակում համագործակցությունը՝ ընդգծելով վտանգված տեսակների և դրանց ապրելավայրերի պահպանության ուղղությամբ համատեղ աշխատանքի նշանակությունը։

Համբարձում Մաթևոսյանը նշել է, որ Հայաստանի համար այս ուղղությունն առանձնահատուկ կարևորություն ունի՝ հաշվի առնելով երկրում ընձառյուծի պահպանության և դրա պոպուլյացիայի վերականգնման առաջնահերթությունը։

Կատարի Պետության շրջակա միջավայրի և կլիմայի փոփոխության նախարար Աբդուլլահ բին Աբդուլազիզ բին Թուրքի Ալ Սուբայիի հետ հանդիպման ընթացքում քննարկվել են շրջակա միջավայրի ոլորտում հայ-կատարական երկկողմ հարաբերությունների զարգացման հեռանկարները՝ անդրադառնալով կենսաբազմազանության պահպանության, բնական ռեսուրսների կայուն կառավարման և կլիմայի փոփոխության դեմ պայքարի ուղղություններով համագործակցության հնարավորություններին։

Հանդիպման երկրորդ հատվածում անդրադարձ է եղել Հայաստանում կայանալիք COP17-ի շրջանակում նախարարական բանակցություններին և դրանցում Կատարի ակտիվ ներգրավմանը։

Կարևովրել է նախարարական մակարդակով երկխոսությունն ու ջանքերի համադրումը՝ կենսաբազմազանության պահպանության հանձնառությունները գործնական արդյունքների վերածելու նպատակով։