«Ուժեղ Հայաստան» խմբակցության քարտուղարը Կարապետյանների տներում խուզարկությունները կապել է ընդդիմությանը Փաշինյանի արած «առաջարկի» հետ

ԱրմԻնֆո. «Ուժեղ Հայաստան» կուսակցության առաջնորդ Սամվել Կարապետյանի և «Ուժեղ Հայաստան» խորհրդարանական խմբակցության ղեկավար Նարեկ Կարապետյանի տներում խուզարկությունները կարող են կապված լինել Հայաստանի վարչապետ Նիկոլ Փաշինյանի՝ ընդդիմությանն արված «առաջարկի» հետ։ Այս մասին նոյեմբերի 4-ին լրագրողների հետ զրույցում հայտարարել է «Ուժեղ Հայաստան» խմբակցության քարտուղար Տիգրան Աբրահամյանը։

Նրա խոսքով՝ Հայաստանի իշխանությունների գործողությունների բնույթն իրենց արդեն լավ հայտնի է, և տեղի ունեցածը միայն վկայում է քաղաքական հետապնդման փորձերի մասին։ «Եթե հետևենք Փաշինյանի վերջին հայտարարություններին, ապա ակնհայտ է դառնում, որ տեղի ունեցողը կապված է ընդդիմությանն ուղղված նրա առաջարկի հետ։ Այժմ մենք փաստացի տեսնում ենք, թե ինչ էր ենթադրում այդ առաջարկը։ Սակայն, չնայած իշխանությունների ձեռնարկած քայլերին, Հայաստանում «ալիևյան Սահմանադրություն» չի ընդունվելու։ Մենք «ալիևյան Սահմանադրությանը» կասենք ոչ, իսկ Հայաստանի անկախությանը՝ այո», - հայտարարել է Աբրահամյանը։

Խորհրդարանական խմբակցության քարտուղարը նաև նշել է, որ նման գործողություններն ակնկալելի էին՝ հաշվի առնելով, որ իրենց քաղաքական ուժն ի սկզբանե դեմ է հանդես եկել Հայաստանի Սահմանադրության փոփոխությանը։ Ընդհանուր առմամբ, նրա խոսքով, Հայաստանի իշխանությունների գործողությունների նման մոտեցումն իրենց արդեն ծանոթ է. «բախվելով իր ծրագրերի իրականացման խոչընդոտներին՝ Փաշինյանը դիմում է նման մեթոդների»։ Այս կապակցությամբ Աբրահամյանը հիշեցրել է, թե ինչպես 2025 թվականի հունիսի 17-ին Սամվել Կարապետյանի այն հայտարարությունից հետո, որ ինքը մտադիր է «մեր ձևով» պաշտպանել Հայ Առաքելական եկեղեցին, հաջորդեցին բոլորին հայտնի իրադարձությունները։ «Սակայն, ինչպես Փաշինյանին չհաջողվեց արդյունքի հասնել ՀԱԵ-ի դեմ իր արշավի շրջանակում, այնպես էլ «ալիևյան Սահմանադրությունն» ընդունելու փորձերն անհաջողության կմատնվեն», - վստահեցրել է խմբակցության քարտուղարը։

Խոսելով անմիջականորեն խուզարկությունների մասին՝ նա նշել է, որ առայժմ մանրամասն տեղեկություններ չունի։ «Իմ ունեցած տեղեկությունների համաձայն՝ գործը կապված է Կարապետյաններին փոխկապակցված ձեռնարկությունների հետ։ Ավելի ստույգ տեղեկություններ հետագայում կներկայացնի փաստաբանական խումբը», - ամփոփել է քաղաքական գործիչը։

Հիշեցնենք, որ «Ուժեղ Հայաստան» կուսակցության մամուլի քարտուղար Աղավնի Սուքիասյանը հայտնել էր, որ վաղ առավոտից Հայաստանի քննչական կոմիտեի քննիչները խուզարկություններ են անցկացնում «Ուժեղ Հայաստան» դաշինքի առաջնորդ Սամվել Կարապետյանի և «Ուժեղ Հայաստան» խորհրդարանական խմբակցության ղեկավար Նարեկ Կարապետյանի տներում։ Նա նշել էր, որ խուզարկություններ են իրականացվում նաև Կարապետյանների ընտանիքի հետ կապված այլ հասցեներում։ Ավելի ուշ Հայաստանի քննչական կոմիտեի մամուլի քարտուղար Կիմա Ավդալյանը հայտնել էր, որ խուզարկությունները միաժամանակ իրականացվում են 65 հասցեներում։

Հավելենք, որ Փաշինյանն ավելի վաղ հայտարարել էր, որ նոր Սահմանադրության ընդունմանը խորհրդարանական ընդդիմության հակազդեցության դեպքում իշխող մեծամասնությունը կսկսի ձևավորել հասարակական ճնշում։ Բացի այդ, նա նշել էր, որ «իշխանությունները խորհրդարանական ընդդիմության համար կարող են ձևակերպել նոր Սահմանադրության վերաբերյալ այնպիսի առաջարկ, որից նա չի կարողանա հրաժարվել»։