Նաիրա Զոհրաբյան. ԵԽԽՎ-ն քարտ բլանշ տվեց Ադրբեջանին՝ սկսելու լայնամասշտաբ ռազմական գործողություններ

ՙՔվեարկելով կողմ Սարսանգի ջրամբարի բանաձեւին, նաեւ դո՜ւք Ադրեբեջանին տվեցիք քարտ- բլանշ՝ իր հանցագործ գործողություններում՚,- ԵԽԽՎ նիստում հայտարարել է ԲՀԿ խմբակցության ղեկավար Նաիրա Զոհրաբյանը:

Նրա խոսքով, հունվարյան նստաշրջանին քվեարկելով «կողմե ադրբեջանական ռազմատենչ օրակարգը սպասարկող Սարսանգի ջրամբարի զեկույցին՝ դրանով ԵԽԽՎ-ն եւս քարտ բլանշ տվեց Ադրբեջանին՝ սկսելու լայնամասշտաբ ռազմական գործողություններ։ ԲՀԿ պատգամավորը նաեւ կոչ է արել պատասխանատվության ենթարկել ԵԽԽՎ նախագահ Պեդրո Ագրամունտին՝ Ալիեւի հանցագործ ռեժիմը սատարող հայտարարություններ անելու համար։

«Ապրիլի 1-ի լույս 2-ի գիշերը, ղարաբաղա-ադրբեջանական ուժերի շփման գծի ողջ երկայնքով, Ադրբեջանը, կիրառելով ծանր զինուժ՝ տանկեր, «Տոսե հրանետային համակարգ, «Սմերչե, օդուժ, լայնամասշտաբ ռազմական գործողություն սկսեց՝ հրետակոծելով ոչ միայն Լեռնային Ղարաբաղի հետ շփման գիծը, այլեւ խաղաղ բնակավայրերը։ Եւ կրկին սպանված զինվորներ, դպրոցից տուն գնացող երեխա, ով սպանվեց իր եղբոր աչքի առաջ։ Ադրբեջանական զինուժը խոշտանգեց ու գլխատեց ռազմագերիների եւ կոմբատանտների, ու այդ ամենը քաղաքակիրթ աշխարհի աչքի առաջ։ Ավելին, երբ Ադրբեջանի զինուժին հաջողվեց ընդամենը մեկ օր իր վերահսկողության տակ վերցնել Լեռնային Ղարաբաղի Թալիշ գյուղը, Ալիեւի վարձկանները խոշտանգեցին ու դաժանաբար սպանեցին գյուղում մնացած խաղաղ բնակիչներին։ Ու այն ժամերին, երբ Ալիեւի վարձկանները ռազմական հանցագործություններ էին կատարում, ԵԽԽՎ նախագահ Պեդրո Ագրամունտն իր հայտնի հայտարարությամբ սատարում էր ահաբեկչական Ադրբեջանին։ Այն պահին, երբ ադրբեջանական զինուժը հրետակոծում էր խաղաղ բնակավայրերը, մեր Վեհաժողովի նախագահը, ով ի պաշտոնե պարտավոր է պահպանել անաչառություն եւ չեզոքություն, իր հայտարարությամբ ոգեկոչում էր ռազմական հանցագործներին։

Այն, որ ԵԽԽՎ ներկայիս նախագահ Պեդրո Ագրամունտը մեր Վեհաժողովում Ադրբեջանի պաշտոնական ներկայացուցիչն է՝ հայտնի ճշմարտություն է։ Ադրբեջանի կողմից սանձազերծած ռազմական ագրեսիայի օրերին ԵԽԽՎ նախագահն իրեն պահել է որպես Իլհամ Ալիեւի մամուլի խոսնակ։ ԵԽԽՎ պատմության մեջ աննախադեպ է, երբ Վեհաժողովի նախագահը զբաղվում ոչ թե ԵԽԽՎ, այլ մեկ առանձին երկրի շահերի բացահայտ պաշտպանությամբ։ ԵԽԽՎ նախագահ ընտրվելուց հետո առաջին այցը կատարելով Ադրբեջան, Ագրամունտն իր այդ քայլով հերթական հավատարմությունը հայտնեց Ալիեւի բռնապետությանը։ Իսկ ռազմական գործողությունների ամենածանր օրերին Ագրամունտն անում է հայտարարություն, որը բացահայտ խրախուսում է Ալիեւի մարդասպան ռեժիմին։

Եվրոպայի Խորհուրդը 47 երկրների կազմակերպություն է, որը պարտավոր է ներկայացնել եւ պաշտպանել 800 միլիոն եվրոպացիների շահերը։ Նման լրջագույն կառույցի նախագահը պարտավոր է լինել անկողմնակալ եւ անաչառ, այլ ոչ թե անձ, ով հրապարակային պաշտպանում է բռնատիրությունը՝ խրախուսելով հանցագործ Ադրբեջանին։ Մեր Վեհաժողովում աննախադեպ իրավիճակ է, երբ Վեհաժողովի նախագահի աթոռին նստած է Ադրբեջանի նախագահի մամուլի խոսնակը։

Եւ եւս մի կարեւոր խնդիր, որի հետեւանքների մասին մենք զգուշացնում էինք։

Երբ ձեզանից շատերը անցած նստաշրջանին քվեարկեցին կողմ Սարսանգի ջրամբարի, իբր, հումանիտար խնդրին, Ադրբեջանի ռազմական այս ագրեսիայից հետո հույս ունեմ հասկացաք, որ Ադրբեջանի նպատակը հումանիտար խնդիր լուծելը չէր, այլ Սարսանգը գրավելն էր։ Եւ դրա համար էր անհրաժեշտ միջազգային կառույցներում եւ ԵԽԽՎ-ում ստանալ ձեր աջակցությունը՝ հումանիտար նպատակի տակ ռազմական հանցագործություն կատարելու համար։ Նայեք ադրբեջանական զինուժի տեղաշարժը պատերազմի այդ օրերին, եւ կհասկանաք, որ ձեր քվեարկությամբ նաեւ դուք Ադրբեջանին տվեցիք այդ քարտ-բլանշը՚,- ասել է Նաիրա Զոհրաբյանը:

Նշենք, որ ապրիլի 3-ին ԵԽԽՎ նախագահ Պեդրո Ագրամունտը ղարաբաղյան հակամարտության կողմերին կոչ էր արել զերծ մնալ բռնություն կիրառելուց և վերսկսել խաղաղ կարգավորման շուրջ բանակցությունները: ԵԽԽՎ նախագահը նաև կոչ էր արել ՙդուրս բերել հայկական զինված ուժերն օկուպացված ադրբեջանական տարածքներից՝ ՄԱԿ-ի Անվտանգության խորհրդի բանաձևերի համաձայն՚:

Հիշեցնենք, որ հունվարի 26-ին Եվրախորհրդի խորհրդարանական վեհաժողովը հավանություն է տվել Բոսնիա և Հերցեգովինայի ներկայացուցիչ Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր կերպով զրկվում են ջրիցե զեկույցին` ուղղումներով: Ներկայացնելով զեկույցը` Մարկովիչը հայտարարել է, որ Սարսանգի ջրամբարի տարածքը վերահսկում է Հայաստանը, մինչդեռ «դա Ադրբեջանի տարածք էե: Նա հայկական կողմին մեղադրել է ադրբեջանական բնակավայրեր Սարսանգի ջրի մուտքին խոչընդոտելու համար, ինչի պատճառով տուժում է գյուղատնտեսությունը, բուսական և կենդանական աշխարհը: