Fitch վարկանիշային գործակալությունը վերահաստատել է Արդշինբանկի "B+" վարկանիշն ու վերանայել է կանխատեսումը Կայունի

Արմինֆո. Fitch միջազգային վարկանիշային գործակալությունն այսօր վերահաստատել է Արդշինբանկի արտարժույթով երկարաժամկետ պարտավորություններ թողարկողի (Long-term Issuer Default Rating (IDR)) "B+" վարկանիշը: Միաժամանակ Բացասական կանխատեսումը վերանայվել է Կայունի:

Ինչպես ԱրմԻնֆո-ին հաղորդեցին բանկի մամուլի ծառայությունից, վարկանիշային գործակալությունը տրամադրել է վարկանիշի իր մեկնաբանություններն և մասնավորապես նշել, որ «բանկի վարկանիշը հիմնված է ընդունելի ֆինանսական ցուցանիշների վրա, որոնք ամրապնդված են վերականգնվող տնտեսությամբ ու արժույթի հարաբերական կայունությամբ, բանկի կապիտալի ու իրացվելիության պաշարի, տեղական շուկայում բանկի զգալի դերի (ներքին շուկայի վարկավորման 13% մասնաբաժին) վրա»:

Կանխատեսման վերանայումը Բացասականից Կայունի «արտացոլում է Fitch-ի սպասումները, որ ակտիվների որակի, մասնավորապես, վերակառուցված/ռիսկային ակտիվների հետ կապված հնարավոր ռիսկերը կարող են աստիճանաբար կլանվել բանկի եկամուտներով՝ առանց կապիտալի վրա ազդեցության»:

Fitch վարկանիշային գործակալությունը նշել է նաև Արդշինբանկի կողմից Առէքսիմբանկի հետ միացման/ձեռքբերման վերջին գործարքը. «Վերջերս ավելի փոքր Առէքսիմբանկի հետ տեղի ունեցած միաձուլումը չեզոք ազդեցություն է ունեցել Արդշինբանկի վարկանիշի վրա, քանի որ Առէքսիմբանկի մասնակցությունը միաձուլված բանկի հաշվեկշռում չի գերազանցում 8%, այն դեպքում, որ Առէքսիմբանկի հաշվեկշիռն էականորեն մաքրվել է նախորդ սեփականատերերի կողմից»:

Բանկին շնորհվել է Հայաստանի Հանրապետության վարկանիշային մակարդակին հավասար վարկանիշ, ինչը մասնավոր կազմակերպության վարկանիշի գնահատման հնարավոր լավագույն ցուցանիշ է:

Արդշինբանկը Հայաստանի միակ մասնավոր կառույցն է, որն ունի միջազգային հեղինակավոր վարկանիշային երկու գործակալություններից (Moody’s և Fitch) ստացված վարկանիշ:

Հիշեցնենք, որ Fitch Ratings-ը Հայաստանի շուկայում աշխատում է շուրջ 15 տարի: Այժմ ընկերության վարկանշային ցուցակում ներառված են հայկական Ամերիաբանկն ու Արդշինբանկը:

ԱրմԻնֆո ԼԳ պատրաստած «Հայաստանի բանկերի ֆինանսական վարկանիշի» տվյալներով, Արդշինբանկը ներկայում երկրի խոշորագույն բանկերի եռյակում է հիմնական հաշվեկշռային ցուցանիշների գծով` հաշվի առնելով նրա հետ միավորված Առէկսիմբանկ-Գազպրոմբանկ խումբը: 2017 թվականի ապրիլի 1-ի դրությամբ Արդշինբանկի ակտիվները հասել են 533.1 մլրդ դրամի (2-րդ դիրք) 15,6% տարեկան աճով, ընդհանուր կապիտալը` 60.7 մլրդ դրամ (2-րդ  դիրք) 21,8% տարեկան աճով, կանոնադրական կապիտալի զգալի` մինչև 50.2 մլրդ դրամ (16 անգամ) համալրման շնորհիվ (1-ին դիրք): Ընդհանուր պարտավորությունները բանկն ավելացրել է տարեկան կտրվածքով 14,9%-ով, մինչև 472.3 մլրդ դրամ (2-րդ դիրք), որոնց կառուցվածքում 66,5% բաժին է ընկել հաճախորդների հանդեպ պարտավորություններին` 313.9 մլրդ դրամ (2-րդ դիրք)` 20,8% տարեկան աճով: Արդշինբանկի վարկային ներդրումներն Առէկսիմբանկի հետ հնամախմբված հաշվեկշռով տարեկան կտրվածքով ավելացել են 17,2%-ով, մինչև 354.5 մլրդ դրամ` ամրագրվելով 2-րդ դիրքում: 2017 թվականի առաջին եռամսյակն Արդշինբանկն ավարտել է 1.2 մլրդ դրամ զուտ շահույթով` 10,3% տարեկան աճով: «Արդշինբանկ» ՓԲԸ հիմնադրվել է 2003 թվականին: Միավորումից հետո Արդշինբանկն առաջատար է դարձել թե մասնաճյուղային ընդգրկումով` 71 մասնաճյուղ, թե մարզային մասնաճյուղերի թվով (45): Ունի նաև ներկայացուցչություն Փարիզում:

2017 թվականի հունվարի 1-ի դրությամբ որպես Արդշինբանկի մեծամասնական բաժնետեր հանդես են գալիս «Բիզնես ներդրումների կենտրոն» ՍՊԸ` կապիտալում 70,11% բաժնեմասով, և «Ռեգիոն» ֆինանսական արդյունաբերական կորպորացիա» ՓԲԸ-ն` 28,10%:  (31.03.2017 դրությամբ դրամի հաշվարկային փոխարժեքը կազմել է 483,45 դրամ/1դոլար):