Արցախի խորհրդարանականները Հայաստանի գործընկերների ուշադրությունը հրավիրում են Լեռնային Ղարաբաղի ճանաչման հարցի միջազգային լոբբինգի անհրաժեշտությանը

Արմինֆո. Փետրվարի 2-4- ն աշխատանքային այցով Արցախի Հանրապետություն մեկնած ՀՀ Ազգային ժողովի պատվիրակությանն ընդունել է նախագահ Բակո Սահակյանը:

Հանդիպմանը քննարկվել են հայկական երկու պետությունների խորհրդարանների միջեւ կապերի հետագա ընդլայնմանն ու խորացմանը վերաբերող հարցեր:

Փետրվարի 3-ին ԱՀ ԱԺ նիստերի դահլիճում տեղի է ունեցել երկու հանրապետությունների
խորհրդարանականների ընդլայնված կազմով հանդիպումը: ԱՀ ԱԺ նախագահ Աշոտ Ղուլյանն Արցախի խորհրդարանի համար առանցքային է համարել Հայաստանի Ազգային ժողովի հետ տարեցտարի կատարելագործվող հարաբերությունները, հանձնաժողովների մակարդակով պարբերական հանդիպումներն ու համագործակցության միջխորհրդարանական հանձնաժողովի նիստերը: ՀՀ ԱԺ ՀՀԿ խմբակցության ղեկավար Վահրամ Բաղդասարյանն,
իր հերթին, բարձր է գնահատել երկու հանրապետությունների խորհրդարանների միջեւ առկա փոխգործակցության մակարդակը: Երկու երկրների խորհրդարանականները քննարկել են ՀՀ ԱԺ սումգաիթյան ջարդերի վերաբերյալ հայտարարության նախագիծը, որն առաջիկա օրերին կներկայացվի Հայաստանի խորհրդարան: Ելույթներով հանդես են եկել ՀՀ ԱԺ մշտական հանձնաժողովների նախագահները եւ խմբակցությունների ներկայացուցիչները, ովքեր տեղեկատվություն են տրամադրել մի շարք հարցերի շուրջ Հայաստանի խորհրդարանում ընթացող քննարկումների մասին: Մասնավորապես, ԱՀ ԱԺ պաշտպանության, ազգային անվտանգության և ներքին գործերի հանձնաժողովի նախագահ Կորյուն Նահապետյանը ընդգծել է, որ Հաայստանի ռազմական բյուջեն վերջին
տարիներին ավելացել է 37 մլրդ դրամով, ինչը թույլ է տալիս ապահովել ուժերի հաշվեկշիռը տարածաշրջանում և հայկական ԶՈՒ արդիակնացումը:

Կառավարող «Հայրենիք՚ կուսակցության խմբակցության ղեկավար Ազատ Թովմասյան, իր հերթին, ուշադրություն է հրավիրել Լեռնային Ղարաբաղի ճանաչման հարցի միջազգային լոբբինգի անհրաժեշտությանը: Այդ առաջարկությամբ նա դիմել է ՀՅԴ իր գործընկերներին, քանի որ այն ազդեցիկ կառույցներ ունի արտասահմանում և ակտիվորեն ներկայացնում է համահայկական կարևորության տարբեր հարցեր: «Ժամանակն է, որպեսզի հայ
խորհրդարանականները, ինչպես նաև ՀՅԴ արտասահմանյան կառույցները միջազգային հարթակներում ակտիվորեն առաջ մղեն Արցախի ճանաչման հարցը` ինչպես արվում է Հայոց ցեղասպանության միջազգային ճանաչման հարցի առնչությամբ: Դա ոչ միայն չի վնասի ղարաբաղյան հակամարտության կարգավորման բանակցային գործընթացին, այլև մեծապես կնպաստի դրան, քանի որ որոշակի աստիճանով կզսպի Ադրբեջանին՚, - բացատրել է խորհրդարանականը: Նա նաև անհրաժեշտ է համարել Հայաստանի և Արցախի միջև միջպետական պայմանագրի բարեփոխումը` նոր իրողություններին համապատասխան: «Մենք պետք է դա անենք` ակնկալիքով, քանի դեռ Հայաստանի չի ճանաչել Արցախի անկախությունը՚, - հայտարարել է պատգամավորը:

Փետրվարի 3-ին Հայաստանի Ազգային ժողովի մշտական հանձնաժողովների նախագահների և
խմբակցությունների ղեկավարների պատվիրակությանն ընդունել է Արցախի Հանրապետության պետական նախարար Արայիկ Հարությունյանը, ով կարևորել է նման ձևաչափով հանդիպումները, շեշտելով, որ դրանք հնարավորություն են տալիս առկա հարցերի շուրջ արդյունավետ քննարկումներ կազմակերպել: Ա. Հարությունյանը նշել է, որ շնորհիվ ՀՀ իշխանությունների սրտացավ վերաբերմունքի՝ վերջին տասը տարիների
ընթացքում Արցախում լուրջ հաջողություններ են արձանագրվել տնտեսության զարգացման և ժողովրդագրության իրավիճակի բարելավման ուղղություններում: Նա ներկաների ուշադրությունն է հրավիրել 2017թ.-ի Արցախի տնտեսական արդյունքների վրա՝ ընդգծելով, որ անցած տարիների ընթացքում իրականացված հետևողական քաղաքանության շնորհիվ արձանագրվել է ռեկորդային՝ շուրջ 15 տոկոս ՀՆԱ աճ: «Տպավորիչ ցուցանիշներով
ենք սկսել նաև նոր տարին: Այս տարվա հունվար ամսվա ընթացքում պետական բյուջե մուտքագրված հարկերն ու տուրքերը, 2017թ.-ի նույն ժամանակահատվածի համեմատ, աճել են շուրջ երկու անգամ: Դա հնարավոր է դարձել ինչպես հանքագործական ոլորտից ստացված լրացուցիչ հարկային եկամուտների, այնպես էլ տնտեսության մյուս ճյուղերում արձանագրված հաջողությունների շնորհիվ»,- ասել է Ա. Հարությունյանը: ԱՀ պետնախարարն
անդրադարձել է նաև առաջիկա տարիներին նախանշված մի շարք ծրագրերի՝ մասնավորապես, խոսելով ընդունվելիք գյուղատնտեսության զարգացման հայեցակարգի, էլեկտրաէներգիայի արտադրության ծավալների ավելացման, հայրենադարձության խթանման և այլ ուղղությունների մասին:

Փետրվարի 4-ին Արցախ մեկնած ՀՀ ազգային ժողովի պատգամավորները ՊԲ շտաբում հանդիպել են Արցախի Հանրապետության ՊՆ, ՊԲ հրամանատար, գեներալ-լեյտենանտ Լևոն Մնացականյանի հետ: Հանդիպման ընթացքում ՊԲ հրամանատարը համառոտ ներկայացրել է արցախա-ադրբեջանական հակամարտ զորքերի շփման գծում տիրող վիճակը, զորամասերում և բանակային առաջնագծում կատարված և կատարվող գործընթացները, զինծառայողների սոցիալ-կենցաղային պայմանների բարելավման ուղղությամբ իրականացվող աշխատանքները և այլն: