Արփինե Հովհաննիսյանը՝ ադրբեջանցի գործընկերներին. Այն ինչ եղավ ու հնարավոր է Հայաստանում, Ադրբեջանում պատկերացնելն անգամ անհնար է

Արմինֆո.ՀՀ ԱԺ նախագահի տեղակալ, ԵԽԽՎ-ում ՀՀ ԱԺ պատվիրակության ղեկավար Արփինե Հովհաննիսյանը ելույթ է ունեցել ԵԽԽՎ նստաշրջանում: ԱԺ փոխնախագահը նշել է.

«Խոսքս՝ ուղղված ադրբեջանցի գործընկերներին: Հիշեք՝ այն ինչ եղավ ու հնարավոր է Հայաստանում, Ադրբեջանում պատկերացնելն անգամ անհնար է:

Հարգելի գործընկերներ, արդեն մեկ տարի է, այս վեհաժողովում հանդես եմ գալիս որպես Հայաստանի պատվիրակության ղեկավար եւ այս ընթացքում իմ ելույթներից ոչ մեկը նվիրված չի եղել Ադրբեջանին: Սակայն երեկ մեր ադրբեջանցի գործընկերներից մեկը միտք արտահայտեց, որին չեմ կարող չարձագանքել: Տիկին Ֆատալիեւան այնքան ոգեւորված էր ներկայացնում Ադրբեջանում ընտրությունները եւ այնքան էր ջանում արժանանալու իր իշխանությունների գովեստին, որ ասաց հետեւյալը, մեջբերում եմ. «Մենք անգամ չենք քննարկում Հայաստանում ընտրությունները, նրանք համարվել են թափանցիկ եւ ժողովրդավարական, բայց որոշ ժամանակ անց հայ ժողովուրդը ոտքի ելավ այսպես կոչված «լեգիտիմե ընտրությունների դեմ եւ սկսվեցին զանգվածային ցույցերե: Իրականում մեր ադրբեջանցի գործընկերների կողմից նման վարքագիծը նորություն չէ, եւ նրանք միշտ թիրախավորում են Հայաստանը` իրենց խնդիրներից ուշադրությունը շեղելու համար: Այնուամենայնիվ, չարձագանքել անհիմն հնչած մեղադրանքներին նվազագույնն ազնիվ չէ իմ երկրի նկատմամբ: Իրոք, տիկին Ֆատալիեւա, Հայաստանում ընտրությունները թափանցիկ եւ ժողովրդավարական էին, նման գնահատականներ պաշտոնապես տրվել են բոլոր հեղինակավոր միջազգային կազմակերպությունների կողմից:

Սակայն, երբ պարզ դարձավ, որ երկրում առկա քաղաքական տրամադրություններն այլ են եւ չեն համապատասխանում ժողովրդի ակնկալիքներին, նախկին վարչապետը եւ կառավարությունը հրաժարական տվեցին եւ հանձնեցին իշխանությունը: Իշխանության փոխանցման խաղաղ ու ոչ բռնի եղանակը խոսում է Հայաստանում իրական ժողովրդավարության հասունության մասին եւ իմ երկրի ձեռքբերումն է:

Ես հասկանում եմ, որ այս երեւույթն անհավանական է թվում ժողովրդավարության «ալիեւյան» ընկալման համար: Դուք ձեր արժեքային համակարգով չեք հասկանա ինձ: Հարց է ծագում՝ ինչի՞ համար ձեզ պետք է գովերգեն: Կարծում եմ, շատ բան չկա գովերգելու համար: Բոլորը գիտեն, թե ինչ է կատարվում ձեր երկրում մարդու իրավունքների, քաղաքական ազատությունների տեսանկյունից: Բայց դուք բացառիկ երկիր եք ոչ միայն նրա համար, որ ներքաշված եք տարբեր միջազգային սկանդալներում, այլեւ նրանով, որ հաջողեցիք ձեր «արժեքներըե բերել նույնիսկ այս վեհաժողով, հաջողեցիք ստվեր գցել, թունավորել այս կազմակերպության արժեքային համակարգը: Սրանք իմ գնահատականները չեն, սրանք արդեն փաստեր են:

Ազնվորեն, ես կարծում եմ, որ Ադրբեջանում կան մարդիկ, ովքեր անհանգստացած են Ադրբեջանի ապագայով: Ես դիմում եմ այդ մարդկանց. դուք իսկապես կարծում եք, որ ձեր ժողովրդավարությունն ապահո՞վ է, որ դուք խնդիրներ չունե՞ք: Եթե այո, ապա «ամենայն բարիք» ձեզ: Հիշեք՝ այն ինչ եղավ ու հնարավոր է Հայաստանում, Ադրբեջանում պատկերացնել անգամ անհնար է:

Եվ վերջապես, Արցախի վերաբերյալ հավերժ հնչող շահարկումների մասին:

Հայաստանի գործողությունները ցույց են տալիս, որ մեր թիվ մեկ առաջնահերթ խնդիրը Լեռնային Ղարաբաղի հիմնախնդրի խաղաղ ճանապարհով լուծումն է: Եվ կխնդրեի, որ բացատրեք այս վեհաժողովին, թե ինչու եք դուք այս օրերին կրկին զենք եւ զինամթերք կուտակում սահմանին: Պատերազմի՞ եք պատրաստվում....

Ուզում եմ ընդգծել՝ հույս մի՛ դրեք մեր ներքաղաքական հակասությունների վրա: Մենք աջակցում ենք մեր իշխանություններին ազգային միասնության, անվտանգության, ինքնության, արժանապատվության, ժողովրդավարության եւ օրենքի գերակայության ամրապնդմանն ուղղված բոլոր հարցերում»: