ANCA-ն կշարունակի պնդել Ազատությանն աջակցման ակտի 907-րդ ուղղման խստիվ պահպանումը

Արմինֆո.Ամերիկայի հայ ազգային կոմիտեն (ANCA) հայտարարել է, որ հավատարիմ է Ազատությանն աջակցման ակտի 907-րդ ուղղման խստիվ պահպանման պնդմանը:

Արձագանքելով 907-րդ ուղղումը կասեցնելու հնարավորության վերաբերյալ ԱՄՆ նախագահի ազգային անվտանգության գծով խորհրդական Ջոն Բոլթոնի վերջին հայտարարությանը` ANCA-ն, մասնավորապես, հայտարարել է. «ANCA-ն կշարունակի պնդել Ազատությանն աջակցման ակտի 907-րդ ուղղման խստիվ պահպանումը, որը, օրենքին համապատասխան, այժմ սահմանափակում է Ադրբեջանի կառավարությանն ԱՄՆ ուղիղ օգնության որոշակի ձևեր, այդ թվում` հարձակվողական ռազմական տեխնիկայի վաճառքը: Բաքվի կողմից աճող ագրեսիայի լույսի ներքո ANCA-ն Սպիտակ տանը կոչ է անում հրաժարվել 907-րդ ուղղումը վերացնելու գաղափարից և Կոնգրեսին թախանձագին հորդորում է հրաժարվել այդ օրենքի չեղարկմանն առնչվող իր որոշումից՚, - ասվում է ԱրմԻնֆո-ին տրամադրված ANCA  հաղորդագրությունում:

Ամերիկայի հայ ազգային կոմիտեում նաև ընդգծել են, որ 907-րդ ուղղման հարցին զուգընթաց կառույցն ուշադիրի հետևում է սպառազինության նկատմամբ փորձագիտական վերահսկողության` Ադրբեջանին, ինչպես նաև երրորդ երկրներին առնչվող խախտումներին, որոնց մակարարվում է ԱՄՆ զգայուն սարքավորում, ծրագրային ապահովում, ծառայություններ ԱԹՍ-ների համար և սպառազինությունների այլ համակարգեր:

Անդրադառնալով սպառազինություն վաճառելու մտադրության վերաբերյալ Բոլթոնի հայտարարությանը` ANCA-ում փաստել են, թե վտանգն այն է, որ եթե ԱՄՆ սպառազինություն վաճառի Հայաստանին, ապա կվաճառի նաև Ադրբեջանին, իսկ, հաշվի առնելով Ադրբեջանի ռազմական բյուջեի ծավալը, նա կարող է իրեն թույլ տալ զգալիրեն ավելի շատ ժամանակակից ամերիկյան սպառազինություն ձեռք բերել, քան Հայաստանը, ինչը կհանգեցնի տարածաշրջանում հաշվեկշռի խախտման, այդ թվում` քաղաքական հարաբերությունների տեսանկյունից՚, - ասվում է հաղորդագրությունում:

Հիշեցնենք, որ ավելի վաղ «Ամերիկայի ձայնի՚ հետ հարցազրույցում Բոլթոնը չէր բացառել, որ Դոնալդ Թրամփը կարող է օգտագործել իր լիազորությունները` Ազատությանն աջակցման ակտի 907-րդ ուղղման գործողությունը կասեցնելու համար, որը սահմանափակում է ԱՄՆ պետական օգնությունն Ադրբեջանին: «Շատ դեպքերում տարբեր նախագահներ կասեցրել են այդ դրույթի գործողությունը` գնումներ իրականացնելու համար, և մենք մշտապես դիտարկում ենք այդ հնարավորությունը` որոշելու համար, թե արդյոք դա անհրաժեշտ է՚, - նշել է Բոլթոնը:

Արդեն Երևանում, անդրադառնալով Դոնալդ Թրամփի կողմից 907-րդ ուղղումը չեղարկելու և Ադրբեջտանին զենք վաճառելու հնարավորությանը, Բոլթոնը, մասնավորապես, ասել է, որ առայժմ այդ ուղղումը կասեցնելու որոշում չի կայացվել, և ինքը չի կարող կանխատեսել, թե այն ինչպիսին կլինի սպառազինության վաճառքի քանակի ավելացման մասով: «Սակայն իրավիճակն այնպիսին է, որ Հայաստանն իր սպառազինության մեծ մասը ձեռք է բերում Ռուսաստանից, Ադրբեջանը նույնպես 80 տոկոսից ավելին գնում է Ռուսաստանից: Այդ հանգամանքը,  անշուշտ, չի նպաստում Լեռնային Ղարաբաղի հակամարտության կարգավորմանը՚, - նշել է Բոլթոնը, ընդգծելով, որ այդ փաստը կողմերի նկատմամբ ներգործության համար լուրջ գործիք է տալիս և չի հանգեցնում հաշտության: Նա նաև հավելել է,  որ ամերիկացիների համոզմամբ, մրցակցությունը շարժիչ ուժ է: «Եվ մեր զենքն, ամեն դեպքում, ռուսականից լավն է: Կարծում եմ, որ մենք այդ հարցը պետք է ուսումնասիրենք մեր օրենքների շրջանակում՚, - ամփոփել է Բոլթոնը:

Ազատությանն աջակցման ակտի 907-րդ ուղղումն ընդունվել է 1992 թվականին և արգելում է ԱՄՆ կառավարության գծով աջակցությունը Բաքվին` Ադրբեջանի և Հայաստանի միջև հակամարտության առնչությամբ: Երկար տարիներ ադրբեջանական դիվանագիտությունը ձգտում է չեղարկել 907-րդ ուղղումը, սակայն առայժմ` ապարդյուն: