Ղազախստանի դեսպան. ՂՀ քաղաքացիները նախագահական ընտրություններում կկարողանան քվեարկել Հայաստանի տարածքում

Արմինֆո. Հունիսի 9-ին Երեւանում Ղազախստանի դեսպանատան տարածքում կբացվի ընտրատեղամաս, եւ այդ պահին Հայաստանի տարածքում գտնվող ՂՀ բոլոր քաղաքացիները կկարողանան մասնակցել Ղազախստանի Հանրապետության նախագահի ընտրություններին: Այդ մասին մայիսի 27-ին Երեւանում կայացած մամուլի ասուլիսի ժամանակ հայտարարել է Հայաստանում Ղազախստանի դեսպան Թիմուր Ուրազաեւը։

ՙԴեսպանատանը կբացվի ընտրատեղամաս, և մենք պատրաստ ենք ընդունել Ղազախստանի բոլոր քաղաքացիներին, ովքեր ժամանակ կգտնեն և ցանկություն կցուցաբերեն մասնակցել ընտրություններին։  Մենք գիտենք, որ ղազախստանցի զբոսաշրջիկները սկսել են հետաքրքրություն ցուցաբերել Հայաստանի նկատմամբ, ուստի նրանք նույնպես կարող են մասնակցել ընտրություններին, եթե այդ պահին գտնվեն ՀՀ տարածքում։  Դեսպանատունը սպասում է նաեւ նրանց, ովքեր եկել են Հայաստանի մայրաքաղաք՝ ավտոմեքենաների հետեւից՚, - կատակել է դեսպանը։

Ընդ որում, նա տեղեկացրել է, որ այսօր Ղազախստանի դեսպանատանը ժամանակավոր կամ մշտական հաշվառման մեջ է գտնվում 100-ից  ավելի մարդ, իսկ ընդամենը ընտրություններին կմասնակցի Ղազախստանի Հանրապետության շուրջ 11.9 մլն քաղաքացի: Դիվանագետը նաեւ տեղեկացրել է, որ ընտրություններին դիտորդական գործունեություն կարող են իրականացնել բոլոր նրանք, ովքեր համապատասխան փաստաթղթեր կունենան այդ առաքելությունն իրականացնելու համար:

Խոսելով, ընդհանուր առմամբ, հունիսի 9-ին Ղազախստանում կայանալիք նախագահական ընտրությունների մասին, դիվանագետը հիշեցրել է, որ ՂՀ Սահմանադրության համաձայն, ընտրությունները պետք է կազմակերպվեն երկամսյա ժամկետում ՝ ոչ ուշ:

Ուրազաեւը պատմել է, որ այսօրվա դրությամբ 7 թեկնածու, այդ թվում ՝ մեկ կին, ցանկություն են հայտնել մասնակցել ընտրություններին: Ընդ որում, թեկնածուների մի մասը ներկայացնում են տարբեր քաղաքական շրջանակներ, այդ թվում ՝ ոչ համակարգային ընդդիմություն։

Առաջիկա ընտրություններում կնոջ կողմից իր թեկնածության առաջադրման համատեքստում Ուրազաեւը նշել է, որ Ղազախստանում լուրջ ուշադրություն է դարձվում գենդերային հավասարության հարցին եւ պետական կառավարման համակարգում կանանց մասնակցության ապահովմանը: Այդ կապակցությամբ Նա հիշեցրել է, որ Ղազախստանի օրենսդիր մարմնում կանանց ներկայացվածությունը կազմում է ավելի քան 25 տոկոս: ՙԱյս քայլը եւս մեկ անգամ վկայում է պետական կառավարման համակարգում կանանց հավասարակշռված ներկայացուցչության գծին հավատարիմ մնալու մասին՚, - ընդգծել է նա։

Նշենք, որ Ղազախստանի նախագահի վերջին արտահերթ ընտրությունները տեղի են ունեցել 2015 թ.ապրիլի 26-ին։  Այն ժամանակ առաջին նախագահ Նուրսուլթան Նազարբաևը հավաքել էր ընտրողների ձայների 97,7 տոկոսը։  Պետության ղեկավարի լիազորությունների ժամկետը սահմանվել էր մինչեւ 2020 թվականի ապրիլը: Սակայն 2019 թվականի մարտի 19-ին Նուրսուլթան Նազարբաևը հրամանագիր է ստորագրել մարտի 20-ից Ղազախստանի նախագահի լիազորությունները վայր դնելու մասին։ Երկրի նախագահի լիազորությունները դրվել են խորհրդարանի Սենատի խոսնակի պաշտոնը զբաղեցնող Կասիմ Ժոմարտ Տոկաեւի վրա, ով ապրիլի 9-ին հայտարարել է, որ արտահերթ նախագահական ընտրությունները տեղի կունենան հունիսի 9-ին:

Պետության ղեկավարի պաշտոնի համար պայքարում են յոթ թեկնածուներ՝ Կոմունիստական ժողովրդական կուսակցությունից Ժամբլ Ախմետբեկովը, ՙԱկ Ժոլ՚ կուսակցությունից Դանիա Եսպաևան, Ազգային-հայրենասիրական շարժումից՝ Ամիրժան Կոսանովը, Ղազախստանի արհմիությունների ֆեդերացիայից՝ Ամանգելդա Տասպիխովը, Ղազախստանի գործող նախագահ Կասիմ-Ժոմարտ Տոկաևը՝ Nur Otan կուսակցությունից, Սադիբեկ Տուգելը ՙՄեծ տափաստանի արծիվներ՚ հասարակական միավորումից։