ԵՊՀ լեզվաբան ուսանողները բողոքում են բուհերում հայոց լեզվի կարգավիճակի մասին օրինագծի դեմ. ԿԳՄՍՆ պարզաբանում է

Արմինֆո. ԵՊՀ հայ բանասիրության ֆակուլտետի ուսանողները նոյեմբերի 6-ին դասադուլ են անում՝ ի նշան "Բարձրագույն կրթության և գիտության մասին" օրինագծի դեմ բողոքի, որը մշակել է ՀՀ կրթության, գիտության, մշակույթի և սպորտի նախարարությունը: Հիշեցնենք, որ օրինագծի համաձայն, հայոց լեզուն եւ գրականությունը պարտադիր առարկաների ցանկում չեն ընդգրկվի բուհերի ոչ մասնագիտական ֆակուլտետների ուսումնական ծրագրերում: Փոխարենը՝ բուհերը կարող են ավելացնել այլ մասնագիտական առարկաների ուսումնասիրմանը նվիրված ժամերը:

ԵՊՀ հայ բանասիրության ֆակուլտետի ուսանողները նշում են, որ այսօրվա բողոքի ակցիան նախազգուշական ահազանգ է նախարարությանը, որի ուղերձն այն է, որ նման որոշումներ կայացնելիս հաշվի առնվեր ուսանողների և դասախոսական կազմի կարծիքը:

Բողոքող ուսանողները նաև հայտարարել են, որ եթե նախարար Արայիկ Հարությունյանը հաշվի չառնի ուսանողների կարծիքը, իրենք կշարունակեն բոյկոտել պարապմունքները:

ԵՊՀ հայ բանասիրության ֆակուլտետի դասախոս Վարդան Պետրոսյանը նախաձեռնությունը ճիշտ և ժամանակին է համարել, հայտարարելով, որ ուսանողների բողոքն ուղղված է հայոց լեզվի ՝ որպես ազգային լեզվի պաշտպանությանը: Իր հերթին ԵՊՀ դասախոս, գրաբարի մասնագետ և լրագրող Նարինե Դիլբարյանը հայտարարել է, որ երկրում իսկապես շատ լուրջ խնդիրներ կան, սակայն "թավշյա հեղափոխությունից" հետո հարցերն ավելի ու ավելի են շատգանում:  "Դժգոհությունը առանց հիմքի չի ծնվում։ Նոր սերունդը մտածում է Հայաստանի մասին, թե որտեղ են աշխատելու և ինչպես զարգանալու", - բացատրել է մանկավարժը։

Ավելի վաղ Արմինֆոյի հետ զրույցում Երևանի վալդորֆյան դպրոցի հայտնի մանկավարժ և ԵՊՀ պատմության ֆակուլտետի դասախոս, արվեստաբան Արա Աթայանը կարծիք էր հայտնել, որ  հայոց լեզուն բուհերում պետք է ուսումնասիրվի միայն մասնագիտական անհրաժեշտության դեպքում, քանի որ հայագիտությամբ հագեցած 12-ամյա դպրոցական ծրագիր կա: Իսկ կրթական համակարգի բարելավմանն ուղղված յուրաքանչյուր քայլ

չպետք է բախվի պահպանողականների կատաղի դիմադրությանը։

Միևնույն ժամանակ, նախարարությունն օպերատիվ արձագանքել է ԵՊՀ լեզվաբանների դասադուլին, իր հայտարարության մեջ նշելով, որ «Բարձրագույն կրթության և գիտության մասին» ՀՀ օրենքի աշխատանքային նախագծով յուրաքանչյուր բուհ իրավասու է «Հայոց լեզու», «Հայ գրականություն» և «Հայոց պատմություն» առարկաները դարձնել պարտադիր:

ՙԻ պատասխան «ՀՀ բարձրագույն կրթության և գիտության մասին» ՀՀ օրենքի՝ ՀՀ ԿԳՄՍՆ-ի ներկայացրած աշխատանքային տարբերակում «Հայոց լեզու», «Հայ գրականություն» և «Հայոց պատմություն» առարկաները բուհերում ուսուցանվող պարտադիր առարկաների ցանկից հանելու առաջարկի վերաբերյալ հարցումների և առկա դժգոհությունների, հայտնում ենք․

Թեպետ աշխատանքային քննարկման նպատակով ուղարկված օրենքի նախագծի վերաբերյալ բուհերից այս հարցին առնչվող դիտողություններ ու առաջարկներ գրեթե չեն ստացվել, սակայն օրենքի նախագծով լայն ինքնավարություն է տրվում բուհերին՝ որոշելու ուսումնական և գիտական ծրագրերի բովանդակությունը։ Հետևաբար, նախագծի ընդունումից հետո յուրաքանչյուր բուհի գիտական խորհուրդ կարող է որոշում կայացնել, որ այս առարկաները պարտադիր պետք է դասավանդվեն բոլոր ֆակուլտետներում։

Միևնույն ժամանակ, նախագծի աշխատանքային տարբերակում առկա սկզբունքներում հստակ ամրագրված են հայագիտական հետազոտությունների գերակայությունը, սփյուռքի համար հայագիտության զարգացման ու հայ մշակութային ժառանգության ճանաչման տարածման նպատակով մասնագետների պատրաստումը, ազգային ինքնության և համամարդկային արժեքների արմատավորումը։

Նախատեսված է բազային ֆինանսավորման տրամադրում բուհերին` ազգային արժեք ներկայացնող գիտական ենթակառուցվածքների պահպանման ու զարգացման նպատակով։

Ավելին՝ ՀՀ-ում ցանկացած բուհ ընդունվելու համար ՀՀ քաղաքացիները, անկախ ընտրած մասնագիտությունից, պարտավոր են հանձնել հայոց լեզվի միասնական քննություն։

Այսպիսով, օրենքի նախագիծը ոչ միայն չի նվազեցնում հայերենի և հայրենագիտության դերը, այլ ընդհակառակը, ամրագրում է այս կարևոր արժեքների սերմանումն ու համապատասխան մասնագետների պատրաստումը՚, - ասվում է նախարարության հայտարարությունում։