Ավիգդոր Էսկին. Հայոց ցեղասպանությունը պատմական փաստ է, բայց ավելի լավ է ուժերը ծախսել Հայաստանի ամրապնդման եւ Թուրքիայի դեմ հայցերի վրա

Արմինֆո. "Պետք չէ ոչ մի օրենք ընդունել խորհրդարաններում, զբաղվել Հայոց ցեղասպանության ճանաչմամբ և չճանաչմամբ։

Հնարավոր է՝ այսպիսի օրը իմ տեսակետը կարող է տեղին չլինել, բայց դա ժխտողական դիրքորոշում չէ, որովհետև անթույլատրելի և անբարոյական է ժխտել պատմական փաստը։ Ես, պարզապես, այլ ճանապարհի կողմնակից եմ", - ԱրմԻնֆո-ի թղթակցի հետ զրույցում հայտարարել է իսրայելցի քաղաքագետ և հասարակական գործիչ Ավիգդոր Էսկինը՝ մեկնաբանելով հերթական անգամ գործընկերներին Հայոց ցեղասպանությանը նվիրված օրինագծի քննարկում առաջարկելու Քնեսետի պատգամավոր Յաիր Լապիդի նախաձեռնությունը։

"Ես այնքան էլ չեմ հասկանում աշխարհի երկրների խորհրդարաններում ցեղասպանության ճանաչման բանաձեւերի առաջխաղացման բուն հայեցակարգը։ Դե՝ այսօր  30 երկրներ այն ընդունել են, վաղը կավելանա եւս մի քանիսը: Ի՞նչ կփոխվի։ Ինչ է, դրա շնորհիվ թուրքական քաղաքական վերնախավը ավելի խղճո՞վ կդառնա, թե՞ կոշտ համառությունը կփոխի փխրուն սենտիմենտալության։  Եվ, բացի այդ, ճանաչման համար պայքարի բուն փաստը խորհրդարաններում լեգիտիմություն է տալիս "չճանաչմանը"՝ անհերքելի պատմական փաստը վերածելով բանավեճի հարթակի", - կարծում է քաղաքագետը։

Նրա կարծիքով, պետք է գործել' ռեսուրսներն ուղղելով ոչ թե խորհրդարաններում լոբբիստական գործունեությանը, այլ համաշխարհային հանրության հետ համալսարանական եւ գիտական ծրագրերի կազմակերպման միջոցով մտածված, լավ կառուցվածքավորված ակտիվ աշխատանքին' գումարներ ծախսելով հուշարձանների եւ հատուկ միջոցառումների վրա, եւ, գլխաաավորը, Հայաստանի քաղաքական եւ իրավական աջակցությանը' Թուրքիայի նկատմամբ իրավաբանկան հայցադիմումների կազմակերպման համար: Ցեղասպանությունը պատմական փաստ է, որը պահանջում է լայնածավալ արշավ սկսել՝ հայությանն իր ունեցվածքը վերադարձնելու,, մեծ փոխհատուցման վճարումների համար՝ թե նյութական, թե բարոյական, այլ ոչ թե խորհրդարաններում քվեարկությունների վրա։

"Իհարկե, կա գործի մի լուրջ բարոյական կողմ, խորը վերք, բայց քաղաքականության մեջ, այդ թվում, մեծ միջազգային քաղաքականության մեջ, որը լի է փոփոխական կոնյունկտուրայով, ինձ թվում է, որ ընդհանրապես անարդյունավետ է քննարկել պատմական փաստերը այդ կերպ: Պատկերացրեք, եթե մենք՝ հրեաներս, այսօր զբաղվեինք օտարերկրյա քաղաքական գործիչների և պատգամավորների հետ քննարկելով այն հարցերը, որոնք կապված են հրեական բնակչության կոտորածների և էթնիկ զտումների բազմաթիվ պատմական փաստերի հետ այս կամ այն երկրում: Կրկնում եմ, դա ապարդյուն է, անարդյունավետ և, վերջիվերջո, ոչինչ չի տալիս։ Դուք դա տեսնում եք երեսուն տարվա ջանքերից հետո", - ընդգծել է Ավիգդոր Էսկինը ։