Փորձագետ․ Հայաստանի նոր ջրային օրենսդրությունը պետք է նախատեսի ջրի ստացման այլընտրանքային աղբյուրներ

Արմինֆո.Շրջակա միջավայրի նախարարությունը ՀՀ Ջրային օրենսգրքի վերանայման անհրաժեշտություն է տեսնում։ Մասնավորապես, հաղորդվում է, որ շուտով գերատեսչությունը հանդես կգա նոր օրինագծով՝ Հայաստանի Հանրապետության ջրային օրենսգրքում փոփոխություններ կատարելու համար, որը կլինի համալիր եւ միջազգային չափանիշներին համապատասխան:

Ավելին, շուտով կձևավորվի համապատասխան աշխատանքային խումբ, որի նպատակն է լինելու վերհանել առկա օրենսդրական խնդիրները և առաջարկել նոր իրավակարգավորումներ։

Նախարարության տեղեկատվության համաձայն՝ նախարարը ջրավազանային տարածքային կառավարման բաժինների և նախարարության համապատասխան ստորաբաժանումների ղեկավարներին հանձնարարեց նախքան նախագծի փաթեթը կառավարություն ուղարկելը՝ կարճ ժամկետում գույքագրել խնդիրները, առանձնացնել նկատառումներն ու  առաջարկները։ Բոլոր առաջարկները պետք է լինեն առկա մարտահրավերները հաղթահարելու համատեքստում, գիտական հիմնավորվածությամբ և բալանսավորեն բնապահպանական շրջանակների ու տնտեսվարողի շահերը։

ԱրմԻնֆո-ի թղթակցի հետ հեռախոսազրույցում շրջակա միջավայրի նախարարի մամուլի քարտուղար Էդգար Առաքելյանը պարզաբանել է, որ ջրային ռեսուրսների կառավարման ոլորտում առկա են բազմաթիվ խնդիրներ՝ սկսած ջրօգտագործողներին լիցենզիաներ տրամադրելուց, վերջացրած ամենափոքր հարցերով: Նա նշել է, որ ամբողջ համակարգը օրենսդրական դաշտի ստեղծման կարիք ունի։ <Առկա խնդիրների լուծման համար անհրաժեշտ են համակարգային լուծումներ: Դրա համար էլ օրենսդրական փոփոխությունների անհրաժեշտություն է առաջացել>, - ընդգծել է Առաքելյանը ։

ԱրմԻնֆո-ի թղթակցի հետ զրույցում ջրային օրենսդրությանը գնահատական է տվել նաև Հայաստանի հայտնի բնապահպան, ջրային ռեսուրսների մասնագետ Քնարիկ Հովհաննիսյանը: Նա պատմել է, որ դեռեւս 2002 թվականին մասնակցել է ջրային օրենսդրության մշակմանը, որի կիրառումը թույլ կտար լուծել Հայաստանի ջրային ոլորտում առկա համակարգային խնդիրները: Սակայն, այս օրինագիծը փոխվեց հրավիրված <փորձագետների> կողմից, որոնք, ըստ տիկին Հովհաննիսյանի, չունենալով անհրաժեշտ իրազեկվածություն, աշխատում էին միայն ստացված գումարի համար։

Ծանոթանալով ընթացիկ տարում երկրի ջրային օրենսդրության մեջ փոփոխություններ նախատեսող օրինագծին՝  բնապահպանը որպես էական դրական փոփոխություններ նշել է փոքր ՀԷԿ-երին վերաբերող կետը: <Մեր <պուզատիների> թեթև ձեռքով ջրօգտագործման լիցենզիաները տրամադրվում էին 25 տարի ժամկետով՝ պատկերավոր ասած, մինչև իրենց կյանքի վերջը։ Այսօրվա օրինագծով առաջարկվում է այդ ժամկետները կրճատել մինչեւ 5 տարի։ Նույնը մենք առաջարկել ենք դեռ 2002 թվականին>,- նշել է Հովհաննիսյանը։

Դրա հետ մեկտեղ բնապահպանը նշել է բնակչության համար <պրոգրեսիվ> սակագնի ներդրման անհրաժեշտությունը: Նա պարզաբանել է, որ Երեւանում ջրի օրական սպառման նորման կազմում է 240 լիտր ։ Պրոգրեսիվ սակագինը ենթադրում է ջրի վարձի բարձրացում, եթե սպառողները գերազանցեն այդ նորմը։ Բացի այդ, Քնարիկ Հովհաննիսյանը նպատակահարմար է գտնում անապահով ընտանիքների համար 50 լիտր ջուր տրամադրել անվճար հիմունքներով, ինչը մարդու համար սանիտարական նորմ է:

<Դա շատ կարեւոր է, քանի որ կլիմայի սպասվող տաքացումը կհանգեցնի ջրային ռեսուրսների կտրուկ նվազման> - ընդգծել է նա: Այս առնչությամբ փորձագետն ընդգծել է, որ նոր ջրային օրենսգիրքը պետք է նախատեսի նաև ջրի ստացման այլընտրանքային աղբյուրներ:

<Օրինակ՝ մենք պետք է կուտակենք անձրեւի ջուրը, այն օդից ստանանք: Դրանք թանկ տեխնոլոգիաներ են, բայց արժե դա։ Քանի որ ջրի հետ մենք կարող ենք խնդիրներ ունենալ ։ Իսկ մենք զրկվեցինք շատ տարածքներից, որտեղ կային ջրային աղբյուրներ, որոնք այլևս չենք կարող օգտագործել>, - ասել է բնապահպանը ։