ԱԻՆ. Ադրբեջանի ագրեսիայի հետեւանքով առավելապես տուժել է Գեղարքունիքի մարզը

Արմինֆո.Գեղարքունիքի մարզի Վերին Շորժա, Կուտ, Սոթք բնակավայրերում ադրբեջանական զինուժի ագրեսիայի հետեւանքով վնասվել է 195 շենք-շինություն, այդ թվում ՝ բնակելի տներ, դպրոցների եւ վարչական շենքեր, անասնագոմեր, բուժկետ, ավտոլվացման կետ եւ այլ օժանդակ կառույցներ: Այդ մասին այսօր մամուլի ասուլիսում հաղորդել  արտակարգ իրավիճակների նախարարի տեղակալ Դավիթ Համբարյանը, նշելով, որ մյուս մարզերի համեմատ առավելապես տուժել է Գեղարքունիքը։

Մասնավորապես, նա հավելել է, որ Գեղարքունիքի որոշ բնակավայրերում վնասվել են Էլեկտրահաղորդման գծերը, մարզի բնակիչների անձնական ավտոմեքենաները, տուժել են ցորենի եւ գարու ցանքատարածությունները ՝ 150 հա ընդհանուր մակերեսով:

Սյունիքի մարզում, ըստ Համբարյանի, քանդվել է 5 շենք, որոնցից 4-ը՝ բնակելի տներ եւ  հանդիսությունների  սրահ, բացի այդ, վնասվել են էլեկտրահաղորդման եւ գազամատակարարման գծեր:

 Վայոց Ձորի մարզում հակառակորդի ուժերը ավերել և վնասել են 9 շենք, այդ թվում ՝ բնակելի տներ, հյուրատներ և առողջարան: Միևնույն ժամանակ, հարվածի տակ է ընկել նաև Ջերմուկի ճոպանուղին սպասարկող վարչական շենքը, քաղաքացիների անձնական տրանսպորտային միջոցները, իսկ Կեչուտի ջրամբար երկու արկ է նետվել։

Բացի այդ, փոխնախարարի խոսքով, հրշեջ ստորաբաժանումների ուժերով մարվել են Սյունիքի 5, Վայոց Ձորի 7 կանաչ տարածքների հրդեհները: Ջերմուկի անտառներում, փոխնախարարի խոսքով, հաջողվել է մարել հրդեհի բոլոր օջախները, բացառությամբ մեկի, քանի որ այն դիտարկվում է հակառակորդի կողմից: Համբարյանը նշել է, որ այդ օջախը սպառնալիք չի ներկայացնում, քանի որ այն մխացող է։

Փոխնախարարը հիշեցրել է նաև, որ առաջադրանքի կատարման ժամանակ հակառակորդի կողմից գնդակոծվել են ՀՀ ԱԻՆ փրկարար ծառայության աշխատակիցները: