Տիգրան Խաչատրյանը կզբաղեցնի փոխվարչապետի, Վահե Հովհաննիսյանը՝ ֆինանսների նախարարի պաշտոնը

Արմինֆո.Վարչապետ Նիկոլ Փաշինյանի գլխավորությամբ տեղի է ունեցել Անվտանգության խորհրդի հերթական նիստը:

Կառավարության հաղորդագրության համաձայն, բացի ԱԽ անդամներից՝ նիստին մասնակցել են նաև Հանրապետության նախագահ Վահագն Խաչատուրյանը, Ազգային ժողովի նախագահ Ալեն Սիմոնյանը, Վարչապետի աշխատակազմի ղեկավար Արայիկ Հարությունյանը, ԱԺ փոխնախագահ Ռուբեն Ռուբինյանը, Ֆինանսների նախարար Տիգրան Խաչատրյանը, Բարձր տեխնոլոգիական արդյունաբերության նախարար Ռոբերտ Խաչատրյանը, ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը, Պաշտպանության նախարարի տեղակալ Կարեն Բրուտյանը:

Նիստի սկզբում վարչապետ Փաշինյանը նշել է.«Մեծարգո պարոն նախագահ, Հարգելի գործընկերներ,

Անվտանգության խորհրդի հերթական նիստում հարցերի լայն շրջանակ ենք քննարկելու, իհարկե, այդ թվում՝ կքննարկենք տարածաշրջանում հաստատված ռազմաքաղաքական իրադրությունը:

Մինչ օրակարգի հարցերին անցնելը, ուզում նաև տեղյակ պահել, որ այսօր Հանրապետության նախագահի հետ էլ ենք քննարկել այդ հարցը և փոխվարչապետի պաշտոնում կնշանակվի Տիգրան Խաչատրյանը, ով մինչ այժմ զբաղեցնում էր Ֆինանսների նախարարի պաշտոնը: Ֆինանսների նախարարի պաշտոնում կնշանակվի Վահե Հովհաննիսյանը, ով զբաղեցնում է Ֆինանսների նախարարի տեղակալի պաշտոնը»:

Հիշեցնենք, որ Համբարձում Մաթևոսյանը ՀՀ փոխվարչապետի պաշտոնից ազատվել էր սույն թվականի դեկտեմբերի 12-ի ՀՀ նախագահի հրամանագրով (այդ պաշտոնում նշանակվել էր 2021 թվականի նոյեմբերի 25-ին)։ Մինչ այդ երեք տարի եղել է Արմավիրի մարզպետ։

Տիգրան Խաչատրյանը ֆինանսների նախարար է նշանակվել 2021 թվականի օգոստոսի 3-ին (2018-2019թթ. ՝ - ՀՀ տնտեսական զարգացման և ներդրումների նախարար, 2019 - 2020թթ.՝ էկոնոմիկայի նախարար): Վահե Հովհաննիսյանը ֆինանսների նախարարի տեղակալ է նշանակվել 2021 թվականի օգոստոսի 18-ին։