Անդրանիկ Թևանյան. Մայրաքաղաքի իշխանությունների կողմից տրանսպորտի թանկացումը հետապնդում է բացառապես գերշահույթ ստանալու նպատակ

Արմինֆո.Մայրաքաղաքի իշխանությունների կողմից տրանսպորտը թանկացնելը հետապնդում է բացառապես գերշահույթ ստանալու նպատակ:  Նման կարծիք է հայտնել "Մայր Հայաստան" շարժման առաջնորդ Անդրանիկ Թևանյանը։

«Երևանում տրանսպորտի գինը գրեթե եռակի թանկացնելու ծրագիրը Նիկոլ Փաշինյանի թիմը ներկայացնում է որպես բարեփոխում։ Ասում են, թե, իբր, մեկ ուղևորի փոխադրման ինքնարժեքը տատանվում է 200–ից 230 դրամի սահմաններում։ Թե ինչպես են ստացել այդ թիվը, չեն ասում։

Փոխարենն ուրիշ բան են ասում և իրենց այդ ասածով բռնվում է սուտը։ Սուտը և տրանսպորտի գինը թանկացելու իրական նպատակը։

Եվ այսպես, ՔՊԿ–ական չինովնիկը պնդում է, որ քաղաքային տրանսպորտի տարեկան սուբսիդիան կազմում է 7 միլիարդ դրամ։ Նա հնչեցրել է նաև տրանսպորտից օգտվողների թիվը (ավտոբուս, տրոլեյբուս, մետրո)՝ 635.000 ուղևորափոխադրում 1 օրում։ Այսինքն՝ տարեկան 231․775․000։

Որպեսզի պարզենք, թե 1 ուղևորի համար որքան գումար է սուբսիդավորում բյուջեն, պետք է 7 միլիարդը բաժանենք 231.775.000–ի։ Ստացվում է մոտ 30 դրամ։ Այսինքն՝ իրենց իսկ ներկայացրած թվերով՝ այսօրվա մեկ ուղևորափոխադրումը կազմում է 130 դրամ, որից 100–ը վճարում է քաղաքացին, իսկ 30 դրամը տալիս է բյուջեն։

Ստացվում է, որ տրանսպորտը թանկացնելը հետապնդում է բացառապես գերշահույթ ստանալու նպատակ։ Կամ իրենց իսկ սիրած բառերով ասած՝ քաղաքացուն թալանի մատերիալ սարքելու նպատակ։ Այնպես որ թող դեմագոգիայով չզբաղվեն։ Իրենք տրանսպորտի գինը թանկացնում են ճիշտ այն նպատակով, ինչով որ մյուս հարկերն ու տուրքերը, կարմիր կետագծերով ավտոկայանատեղիները և գույքահարկերը ավելացրեցին։ Նպատակը մեկն է՝ քաղաքացուն դարձնել «մուծվող», որպեսզի իրենք հարստանան՝ բյուջեն մսխելով։ Դրա համար էլ հարկատուին հռչակում են հերոս։ Իրենց պատկերացրած հերոսն առավոտից երեկո աշխատողն ու բյուջեին փող տվողն է։ Դե իսկ բյուջեն Նիկոլ Փաշինյանն ու իր թիմակիցները տնօրինում են սեփական դրամապանակի պարունակության պես», - գրել է Թեւանյանը՝ «Ֆեյսբուքի» իր էջում։

Նշենք, որ Երեւանի իշխանությունները, այն բանից հետո, երբ "մարսեցին" Երեւանում կայանման գնի ավելի քան 10 անգամ բարձրացումը (12 հազարից այն դարձավ 160 հազար դրամ), որոշեցին բարձրացնել հասարակական տրանսպորտի ուղեվարձը: Երևանի փոխքաղաքապետ Սուրեն Գրիգորյանը վերջերս կայացած մամուլի ասուլիսի ժամանակ հաղորդել է, որ հասարակական տրանսպորտի համար գործելու են տարբեր սակագնային փաթեթներ, ուստի, դժվարացել է նշել թանկացումների ճշգրիտ չափը: Ընդ որում, նա հաղորդել է, որ ամսական 60 ուղևորության համար (խոսքը 30 օրացուցային օրվա մասին է) տոմսի համար անհրաժեշտ կլինի վճարել 11 000 դրամ կանխիկ, իսկ Telcell համակարգով վճարելու դեպքում՝ 10 800 դրամ: Նույն կերպ եռամսյակային և տարեկան տոմսերը կարժենան, համապատասխանաբար, 25 հազար դրամ (Telcell-ի միջոցով՝ 24,8 հազար դրամ) և 110 հազար դրամ (108 հազար դրամ): "Ըստ այդմ, մեկ ուղղությամբ տրանսպորտի մեկ տեսակով ուղեւորության արժեքը կկազմի 180 դրամ՝ ներկայիս 100-ի փոխարեն", - ասել է նա:

Ըստ մամուլում շրջանառվող տեղեկությունների՝ տրանսպորտի ուղեվարձը մեկ ուղևորության համար կտատանվի 300-500 դրամի սահմաններում ։ Նշենք, որ սա աննկարագրելի բարձր գին է քաղաքացիների համար, որոնցից շատերի եկամուտը ամսական կտրվածքով 200 դոլարից պակաս է։ Առայժմ նախագիծը հանվել է քննարկումից, սակայն մայրաքաղաքի իշխանություններն արդեն հայտարարել են, որ մտադիր չեն հրաժարվել հասարակական տրանսպորտի ուղեվարձի թանկացման գաղափարից: