Մոսկվան այսօր ի վիճակի չէ երկրորդ ճակատ բացել Անկարայի դեմ և պատրաստ է հեռանալ Կովկասից. Սամվել Բաբայան

Արմինֆո.Ռուսաստանի սահմանապահներն Իրանի և Թուրքիայի հետ սահմաններին մնացել են հայկական կողմի խնդրանքով։ "Ա1+" - ի եթերում նման հայտարարությամբ հանդես է եկել Արցախի զինված ուժերի նախկին հրամանատար Սամվել Բաբայանը։

<2012-13թթ. սկսած՝ նրանք (Ռուսաստանը) 2-3 անգամ գրել են, որ Ռուսաստանի սահմանապահները չեն ուզում պահել (սահմանը), եթե հայերն ուզում են, թող վերցնեն ու պահպանեն (հայ-թուրքական և հայ-իրանական սահմանները): Ես այդ մասին բազմիցս հայտարարել եմ։ Մենք ի վիճակի չենք դա անել, որովհետև թե ֆինանսական, թե մարդկային ռեսուրսները քիչ են, պետք է պրոֆեսիոնալներ պահել, իսկ պրոֆեսիոնալը բարձր աշխատավարձ է պահանջում", - ասել է նա։

<Նույնիսկ այսօր ռուսները խնդրում են, որ դուք պահեք (սահմանը), և այդպես՝ արդեն վաղուց: Եթե իշխանությունները դա չեն բարձրաձայնում... Մեր անվտանգության ծառայությունը, որը պատասխանատու է այդ մասով, դեռեւս 2012 թվականից նամակներ է ստանում Ռուսաստանից", - հավելել է Բաբայանը։

Միաժամանակ, նրա ասելով, ռուս սահմանապահները Երևանի խնդրանքով լքել են "Զվարթնոց" օդանավակայանի տարածքը, սակայն հայ-ադրբեջանական սահմանը նրանք թողել են հենց Բաքվի պահանջով:

Բաբայանի կարծիքով ՝ Արցախից հայերի հեռանալուց հետո ինչպես ռուսական խաղաղապահ զորախումբը, այնպես էլ սահմանապահները պետք է հեռանային ոչ միայն Արցախից, այլև Հայաստանից: Ինչպես կարծում է Բաբայանը, ևս մի քանի ամիս մնալով Արցախում, նրանք "մեղսակից դարձան այն ամենին, ինչ եղավ հետո"։

Ինչ վերաբերում է ռուսական 102-րդ ռազմակայանին, ապա, ինչպես ընդգծել է Բաբայանը, այն Հայաստանի տարածքում է գտնվում պայմանագրին համապատասխան (1995 թվականի մարտի 16-ի,  ՌԴ-ն եւ ՀՀ-ն 2010 թվականի օգոստոսի 20-ին ռազմակայանի տեղակայման մասին պայմանագրի գործողության ժամկետը երկարաձգել են մինչեւ 2044 թվականը -խմբ.) եւ այդ խոսակցությունների հետ որեւէ առնչություն չունի: "Նրանք ասում են (ՌԴ), եթե ցանկանում եք, կարող ենք առանց շտապելու հեռանալ", - նշել է նա, հավելելով, որ Մոսկվան չի վախենում կորցնել իր ազդեցությունը տարածաշրջանում, "քանի որ արդեն կորցրել է այն եւ կփորձի այլ կերպ պահպանել իր ազդեցությունը": "Մոսկվայի համար, Վրաստանի եւ Ադրբեջանի վրա իր ազդեցությունը կորցնելուց հետո, հեշտ չէ պահպանել իր ազդեցությունը Հայաստանում, ղարաբաղյան պատերազմը դրա վկայությունն է. Ռուսաստանն այսօր պատրաստ չէ առճակատման գնալ հանուն այդ տարածքների, պատրաստ չէ երկրորդ ճակատ բացել Թուրքիայի դեմ, որն այսօր արդեն լիակատար ազդեցություն ունի Կովկասի եւ Կենտրոնական Ասիայի վրա", - հայտարարել է նա:

Անդրադառնալով «այն թիմերին, որոնք խոսում են ԵՄ-ին անդամակցության, Արևմուտքի և այլնի մասին», Բաբայանը հայտարարել է. "Թող չեղյալ հայտարարեն Հայաստանի 12 միլիարդ պարտքը (ՀՀ պետական պարտքը) և 800 միլիոն դոլարի չափով, որը ՀՀ-ն տարեկան վճարում է տոկոսների տեսքով, ստեղծեն սահմանապահ զորքեր, որոնք կպաշտպանեն հանրապետության սահմանի ողջ պարագիծը", - ասել է Սամվել Բաբայանը:

Նա նշել է, որ Վրաստանում "Վարդերի հեղափոխությունից" անմիջապես հետո Արևմուտքի երկրները մարել են երկրի 15 մլրդ դոլար պարտքը: "Եվ եթե նրանք իսկապես ցանկություն ունեն, որպեսզի Հայաստանը դառնա ինքնիշխան երկիր, որպեսզի մեկընդմիշտ օրակարգից դուրս գա ՀՀ - ում Ռուսաստանի սահմանապահների հարցը, թող մարեն այդ պարտքը", - ամփոփել է նախկին հրամանատարը:

Նշենք, որ մայիսի 8-ին Մոսկվայում Հայաստանի և Ռուսաստանի ղեկավարների բանակցություններից հետո "Քաղաքացիական պայմանագիր" կուսակցության խորհրդարանական խմբակցության ղեկավար Հայկ Կոնջորյանը հայտարարել է, որ ռուս սահմանապահները կլքեն Գեղարքունիքի, Սյունիքի, Տավուշի, Արարատի և Վայոց Ձորի մարզերը, որտեղ եղել են 44-օրյա պատերազմից հետո ՝ ՀՀ կառավարության նախաձեռնությամբ, ինչպես նաև՝ "Զվարթնոց" օդանավակայանը: Դրանից հետո արդեն մայիսի 10-ին ՌԴ նախագահի մամուլի քարտուղար Դմիտրի Պեսկովը հաստատել է, որ Հայաստանի մի շարք մարզերից Ռուսաստանի զինվորականների և սահմանապահների դուրսբերման գործընթացը համաձայնեցվել է մայիսի 8-ին Մոսկվայում Հայաստանի և Ռուսաստանի ղեկավարների հանդիպման ժամանակ: Նա հավելել է, որ Երևանի խնդրանքով Ռուսաստանի սահմանապահները կշարունակեն գտնվել հայ-թուրքական և հայ-իրանական սահմաններին:

ՀՀ Անվտանգության խորհրդի քարտուղար Արմեն Գրիգորյանը, սակայն, հերքել է Պեսկովի հայտարարությունը,  նշելով. "Մենք ռուսական կողմին առաջարկել ենք լքել երեք կետերը (օդանավակայան, 17 կետ Տավուշում, բազաներ Սյունիքում), քանի որ դրանց տեղակայումը բանավոր պայմանավորվածությունների արդյունք էր։ Նրանք համաձայնել են, որից հետո հարցրել են, թե արդյոք մենք ցանկանում ենք, որ իրենք լքեն նաեւ Հայաստան-Իրան և Հայաստան-Թուրքիա սահմանները: Մենք պատասխանել ենք, որ այդ կետերում Ռուսաստանի սահմանապահների տեղակայումը պայմանագրային է, այս պահին մենք այդ հարցը չենք քննարկում", - ասել է Արմեն Գրիգորյանը ։