Փարիզում տեղի է ունեցել Շառլ Ազնավուրի անվան պուրակի բացումը

Արմինֆո. Ֆրանսիայի մայրաքաղաքի 8-րդ շրջանում, որը գտնվում է քաղաքի պատմական կենտրոնում ՝ Ելիսեյան դաշտերում, բացվել է Շառլ Ազնավուրի անվան պուրակ: Այդ մասին հաղորդում է ֆրանսիական BFMTV հեռուստաալիքը։

Պուրակի ընտրությունը խորհրդանշական նշանակություն ունի, քանի որ դրանից ոչ հեռու գտնվում է Հայաստանի Էսպլանադը։ Պուրակը Ազնավուրի անունով անվանակոչելու որոշումը Փարիզի քաղաքային խորհուրդը կայացրել էր 2023 թվականի դեկտեմբերին։ Այսպիսով քաղխորհուրդը որոշել է հարգանքի տուրք մատուցել Ազնավուրին, որի երգերում Փարիզն առանձնահատուկ տեղ է զբաղեցնում: 2021 թվականին Փարիզի Օդեոն թաղամասում, որտեղ անցել են Ազնավուրի մանկության տարիները, բացվել է նրա կիսանդրին։ Շանսոնյեի ծննդյան 100-ամյակին նվիրված արարողությանը ներկա են եղել Փարիզի քաղաքապետ Անն Իդալգոն, արտիստի հարազատներն ու ընկերները:

Նշենք, որ Շառլ Ազնավուրը (իսկական անունը ՝ Շահնուր Վաղինակ Ազնավուրյան) ծնվել է 1924 թվականի մայիսի 22 - ին Փարիզում՝ հայ գաղթականների ընտանիքում: Շառլը սովորել է մանկական արտիստական դպրոցում, իսկ ավելի ուշ՝ TSF (Փարիզ) կենտրոնական դպրոցում։ Ինը տարեկանում Շառլը ելույթ է ունեցել բեմում, երգել է ու նվագել, տասներկու տարեկանում առաջին անգամ նկարահանվել է կինոյում։ Սկզբում Ազնավուրը դուետով հանդես է եկել կոմպոզիտոր Պիեռ Ռոշի հետ ։ Այն բանից հետո, երբ նրանց նկատել է Էդիթ Պիաֆը, Ազնավուրն ու Ռոշը մասնակցել են նրա շրջագայությանը Ֆրանսիայում և ԱՄՆ-ում՝ 1946 թվականին։ Այդ ժամանակվանից Շառլը սկսել է շանսոնյեի պրոֆեսիոնալ կարիերան։ 1960-ականների սկզբին Ազնավուրն արդեն բավականին հայտնի էր, նա համերգներ էր տալիս Նյու Յորքի դահլիճներում, իսկ ավելի ուշ Ֆրենկ Սինատրայի ֆիրմայում թողարկեց իր առաջին ամերիկյան ալբոմը։ Իր ստեղծագործական կարիերայի ընթացքում Ազնավուրը ստեղծել է ավելի քան հազար երգ, որոնցից շատերը հաճույքով երգել են այնպիսի աշխարհահռչակ կատարողներ, ինչպիսիք են Ռեյ Չարլզը, Լայզա Մինելին, Բոբ Դիլանը, Խուլիո Իգլեսիասը: Ազնավուրը զուգերգով հանդես է եկել Ֆ. Սինատրայի, Ս. Դիոնի, Լ. Պավարոտիի, Պ. Դոմինգոյի, Պ. Կաասի, Լ. Մինելլիի, է.Սեգարայի և այլ հայտնի արտիստների հետ: Տարբեր տարիների "CNN"-ը և "Times" - ը Ազնավուրին հռչակել են "Դարի արտիստ", Ֆրանսիան՝ "Ֆրանսիական երգի հայր", իսկ ՅՈՒՆԵՍԿՕ-ն ՝ "Բարի կամքի դեսպան":

2017 թվականի օգոստոսի 24-ին Ազնավուրն անվանական աստղ է ստացել Հոլիվուդի Փառքի ծառուղում ՝ "Լավագույն կենդանի կատարում" անվանակարգում: Նրա աստղը դարձել է 2618-րդը և գտնվում է Pantages թատրոնի հարևանությամբ, որտեղ 2016 թվականի հոկտեմբերին Ազնավուրը հանդես է եկել համերգով:

Շանսոնյեն մահացել է 2018 թվականի հոկտեմբերի 1-ին Մուրյեսում ՝ կյանքի 95-րդ տարում ։ Ֆրանսիայի և Հայաստանի նախագահների մասնակցությամբ հրաժեշտի արարողությունը տեղի է ունեցել հոկտեմբերի 5-ին Փարիզի Հաշմանդամների տանը, հոգեհանգիստը տեղի է ունեցել հայկական Սուրբ Հովհաննես եկեղեցում: Շանսոնյեի մահվան կապակցությամբ Ֆրանսիայի նախագահ Էմանուել Մակրոնը նշել է. "Ազնավուրը երբեք մեզ չի լքի, քանի որ Ֆրանսիայում բանաստեղծները երբեք չեն մահանում": Շառլ Ազնավուրին հուղարկավորել են Փարիզի արվարձանում գտնվող ֆրանսիական Մոնֆոր լ ' Ամորի կոմունայի ընտանեկան դամբարանում: