Վալմար. Արվեստը, լինելով զգացմունքների գիտություն, մաքրում է մարդու հոգին

Արմինֆո. Ազգային պատկերասրահում բացվել է ցուցադրություն, որը ներկայացված է հայ ականավոր նկարիչ Վալմարի (Վլադիմիր Մարգարյան) ինքնատիպ հավաքածուով: Ցուցահանդեսի բացման ընթացքում նկարիչն Ազգային պատկերասրահին նվիրաբերել է իր մոտ պահվող Մարտին Պետրոսյանի <Սոֆիա> ջրաներկ  աշխատանք, որն այսօրվանից կհամալրի Ազգային պատկերասրահի հավաքածուն: Ցուցահանդեսը բաց կլինի բոլոր ցանկացողների համար՝ մինչև ս. թ. հուլիսի 7-ը:

Իր տեսակով իսկապես եզակի ցուցահանդեսը ներկայացված է այնպիսի նշանավոր հայ վարպետների աշխատանքներով, ինչպիսիք են Ժանսեմը, Գառզուն, Հակոբ Հակոբյանը, Վրույր Գալստյանը, Խաչատուր Եսայանը, Հակոբ Գրիգորյանը և շատ ուրիշներ, ինչպես նաև երկու էստոնացի նկարիչներ՝ Հելլե Վախերսալու և Վալդուր Օհակաս: Վալմարի հավաքածուն ձևավորվել է 1970-ական թվականներից և բաղկացած է 170 աշխատանքներից, այդ թվում՝ այժմ ողջ վարպետների վրձնի:

<Իմ էությամբ ես եզակիություն, բացառիկություն սիրող մարդ եմ: Ես չեմ սիրում նման մարդկանց, նման քաղաքներ, գեղանկարչություն և այլն", - ասել է Վալմարը ՝ պարզաբանելով իր հավաքածուի հայեցակարգը: Նշելով, որ յուրաքանչյուր ժողովուրդ հարուստ է իր արվեստով, նա թվարկել է հայ նկարիչների անունները ՝ ընդգծելով նրանց բացառիկությունը համաշխարհային արվեստի համատեքստում: "Արվեստը, լինելով զգացմունքների գիտություն, մաքրում է մարդու հոգին, արթնացնում է զգայարանները, արթնացնում է քնած մարդուն", - հավելել է նա: Կոլեկցիոները նշել է, որ հպարտ և երջանիկ է, որ հնարավորություն է ունեցել ժամանակին շփվելու, հյուրընկալելու այդ նշանավոր նկարիչներին, որոնց կտավներն այսօր զարդարում են Ազգային պատկերասրահի սրահները: Ցուցահանդեսի համակարգողն էր Մարգարիտա Խաչատրյանը: Նա պատմել է, որ ցուցադրությունը ներառում է Խորհրդային Հայաստանի հեղինակների, Սփյուռքի և Էստոնիայի ներկայացուցիչների բազմաժանր աշխատանքներ: Կտավների դարձերեսին կարելի է տեսնել ջերմ ընկերական բարեմաղթանքներ, որոնք ինքնին փաստական արժեք են ներկայացնում: Բացմանը ներկա էին ՀՀ վարչապետի աշխատակազմի, Հայաստանի նկարիչների միության ներկայացուցիչներ, Վալմարի ստեղծագործության երկրպագուներ և այլոք:

Նշենք, որ Վալմարը ծնվել է 1948թ. Գյումրիում: 1972թ. ավարտել է Երևանի գեղարվեստաթատերական ինստիտուտը: Սովորել է Երվանդ Քոչարի մոտ։ Ինստիտուտն ավարտելուց հետո ծավալում է բեղմնավոր ստեղծագործական գործունեություն ՝ ակտիվորեն մասնակցելով հանրապետական և համամիութենական ցուցահանդեսներին: 1976 թվից Հայաստանի նկարիչների միության անդամ է, իսկ 1994 թվից' Նկարիչների միջազգային միության (ՅՈՒՆԵՍԿՕ) անդամ: Վալմարն ունեցել է 50 անհատական և 117 խմբակային ցուցահանդեսներ, որոնք կազմակերպվել են Հայաստանում, Մոսկվայում, Էստոնիայում, Լատվիայում, եվրոպական, մերձավորարևելյան և ամերիկյան մշակութային կենտրոններում: Վալմարի նկարները ցուցադրվում են Հայաստանի, Ռուսաստանի, ԱՄՆ-ի, Իսպանիայի, Ճապոնիայի, Ֆրանսիայի թանգարաններում և պատկերասրահներում, ինչպես նաև պահվում են մասնավոր հավաքածուներում: 2006թ.՝ Հայաստանի Հանրապետության վաստակավոր նկարիչ: 2015թ․՝ ՀՀ ժողովրդական նկարիչ։