«Հետք». Հարցը մնում է բաց.  Որտեղի՞ց  Գնել Սանոսյան եղբայրներին 230 հազար դոլար առանձնատուն կառուցելու համար

Արմինֆո.Բաց աղբյուրներից ստացված տվյալներն ամենևին էլ չեն հիմնավորում տարածքային կառավարման և ենթակառուցվածքների նախարար Գնել Սանոսյանի եղբայրների կողմից 230 հազար դոլար շահույթի ստացումը: Այդ մասին ասվում է "Հետք" պարբերականի հերթական նյութում՝ նվիրված է Գնել Սանոսյանի մոր՝ Օլգա Սանոսյանի առանձնատան կառուցմանը, որի արժեքը գնահատվում է 230 հազար դոլար։

Հետաքննությունը շարունակելու դրդել է հենց նախարարի հայտարարությունը լրագրողներին՝ ճեպազրույցի ընթացքում։ Նա, մասնավորապես, նշել է. «Այդ հոդված գրողը եթե մի քիչ ուշադիր լիներ, բացեր, կարդար իմ եղբոր ընկերությունների անունները, կարդար, տեսներ՝ այդ ընկերությունները ինչքան տարեկան շրջանառություն են ունեցել, 230 հազար դոլարի մասին հարց չէր առաջանա։ Այսինքն, կարող էր այդ հոդված գրողը մտներ ինտերնետով կարդար մեր ընտանիքին պատկանող շինարարական ընկերությունը … Եղբայրներս կա՛մ անհատապես են աշխատել, կա՛մ ընկերությունում… Սկզբից ընկերություն չի եղել, մասնավոր են աշխատել, հետո ընկերություն են հիմնել»,- հայտարարել է Գնել Սանոսյանը՝ նշելով, որ իր ընտանիքի անդամներին պատկանող ընկերության անունն է՝ «ՎԳՎ»։

Այդ առնչությամբ պարբերականը ներկայացրել է բաց աղբյուրներից ստացված տվյալները, որոնք չեն հիմնավորում 230 հազար ԱՄՆ դոլար եկամուտը։ «Գնել Սանոսյանի եղբայրը՝ Վահան Հենզելի Սանոսյանը, 2021 թ.-ին ՌԴ-ում հիմնադրել է «ВГВ ДОРСТРОЙ» ՍՊԸ-ն։ Ընկերության 100% բաժնետոմսերը նրան են պատկանում։ Վահան Սանոսյանն այլ ընկերություններ չի հիմնադրել, այլ ընկերությունների բաժնեմասեր ձեռք չի բերել։ Նա կապված է միայն «ВГВ ДОРСТРОЙ» ընկերության հետ (բաժնետեր և տնօրեն է)։

Ռուսաստանի Դաշնային հարկային ծառայության հարկերի և եկամուտների հաշվետվություններից պարզ է դառնում, որ «ВГВ ДОРСТРОЙ» ընկերությունը մեծ եկամուտ չի ստացել։ 2023 թ.-ին ընկերության մաքուր շահույթը կազմել է 237 հազար ռուբլի, իսկ 2022 թ.-ին՝ 275 հազար ռուբլի։ Ընկերության կանոնադրական կապիտալն ընդամենը 10 հազար ռուբլի է։ Եթե ընկերության երկու տարվա զուտ շահույթը վերածենք դրամի, կստացվի մոտ 2 միլիոն 252 հազար 800 դրամ (512 հազար ռուբլի)։ Նախարարի մյուս եղբայրը՝ Վարդան Հենզելի Սանոսյանը, ՌԴ-ում 2021 թ․-ին գրանցվել է որպես անհատ ձեռնարկատեր։ Նրա ստացած եկամուտների մասին տվյալներ առկա չեն։ Այս պայմաններում շարունակում է արդիական մնալ այն հարցը, թե որտեղի՞ց նախարարի եղբայրներին մոտ 230 հազար դոլար գումար առանձնատան ներկա փուլի ծախսերը հոգալու համար», - նշում է աղբյուրը։

Հիշեցնենք, որ առանձնատան կառուցման մասին "Հետքի" առաջին նյութի հրապարակումից հետո Սանոսյանի մամուլի ծառայությունը հանդես էր եկել հայտարարությամբ, որում, մասնավորապես, ասվում էր. «Առանձնատունը վերագրել նախարարին և այնտեղ կոռուպցիա փնտրելը զուր ջանքեր են։ Եթե առանձնատուն կառուցելու փաստը թաքցնելու, կամ ենթադրյալ կոռուպցիոն ռիսկեր լինեին, ապա դժվար թե այն Սանոսյան ազգանունով գրանցված լիներ»։

Նախարարն ավելի վաղ պարզաբանել էր, որ առանձնատունը կառուցվում է իր հոր և եղբայրների միջոցներով, որոնք երկար տարիներ աշխատում են Ռուսաստանում: "Եղբայրներս այժմ էլ այնտեղ շարունակում են զբաղվել ձեռնարկատիրական գործունեությամբ ։ Տարիների խնայողությունների և ընթացիկ եկամուտների արդյունքում ձեռք է բերվել նշված հողատարածքը, որտեղ էլ ընթանում է առանձնատան շինարարությունը», - նշել էր նա։

Հիշեցնենք, որ խոսքը Ավան վարչական շրջանում (Գ. Առինջ) 1000 քմ մակերեսով հողամասի մասին է, որտեղ ավարտին է մոտենում 377 քմ մակերեսով 2 հարկանի առանձնատան շինարարությունը: