Ալեքսանդր Ցինկեր. Ո՞վ է փորձում դիվայնացնել Հայաստանն Իսրայելում

Արմինֆո. Ո՞վ է փորձում դիվայնացնել Հայաստանն Իսրայելում: Այդպիսի հարցադրում էանում իսրայելցի քաղաքագետ, Իսրայել-Հայաստան միջխորհրդարանական բարեկամության խմբի հիմնադիր և առաջին ղեկավար Ալեքսանդր Ցինկերը՝ իր ֆեյսբուքյան հոդվածում:

Փորձագետն ուշադրություն է հրավիրում այն հանգամանքի վրա, որ օրերս The Jerusalem Post-ը հրապարակել է իրանահայկական զենքի գործարքի մասին Մորդեխայ Կեդարի հոդվածը: Ցինկերը հիշեցնում է, որ այս տեղեկությունը ֆեյք է, որը հերքել են ոչ միայն Հայաստանն ու Իրանը, այլև, նույնիսկ, զենքի առևտրի ոլորտի անկախ մասնագետները:

Այս առումով քաղաքագետն ուշադրություն է հրավիրել մի քանի իրական փաստերի վրա, որոնք կապ ունեն այս հարցի հետ ։ "Հեղինակը հղում է անում Iran International գործակալությանը, որն էլ հաղորդել է 500 միլիոն դոլարի գործարքի մասին, որը կազմում է Հայաստանի պաշտպանական բյուջեի մեկ երրորդը: Այնուհետև Մորդեխայ Կեդարը, ինչ-ինչ պատճառներով փորձելով Հայաստանը ներկայացնել որպես Ադրբեջանի նկատմամբ պոտենցիալ ագրեսոր, հաղորդում է, որ Հայաստանը զինամթերքի գործարք է կնքել նաև Հնդկաստանի հետ "600 միլիոն դոլարի չափով, ինչը կազմում է Հայաստանի ռազմական բյուջեի մոտ 90% - ը": Այստեղ ակնհայտ է տոկոսային առումով ինչ-որ շփոթություն, բայց հարցը դա չէ ։ Հայտնի է, որ Ռուսաստանից անորակ զենքի մատակարարման պատճառով Հայաստանը լուրջ խնդիրներ է ունեցել իր բանակի արդիականացման հարցում,  մ ինչդեռ, Ադրբեջանը հաջողությամբ իրականացրել է այն ոչ առանց Իսրայելի օգնության՝ նրա հետ կնքելով ավելի քան 5 միլիարդ դոլարի սպառազինության մատակարարման պայմանագիր",-նշում է Ցինկերը։

Այնուհետև փորձագետը նշում է, որ հեղինակը, խոսելով Հայաստանի կողմից զենքի վերջին գնումների մասին, անսպասելի եզրակացություն է անում. "Կարծես, Հայաստանը նախապատրաստվում է հաջորդ պաատերազմին Կովկասում: Հետաքրքիր է, իսկ Ադրբեջանի կողմից զենքի միլիարդավոր գնումները նրա և Մեծ Մերձավոր Արևելքի այլ մասնագետների տագնապն ու կասկածները չէին առաջացնում Հայաստանի դեմ նախապատրաստվող Ադրբեջանի լայնածավալ ռազմական գործողության մասին",-  այդ առնչությամբ հարցնում է Ցինկերը։

Քաղաքագետը հիշեցրել է, որ Հայաստանն ինքնիշխան պետություն է, որը պարտավոր է պաշտպանել իրեն, և այդ նպատակով իրավունք ունի զենք գնել ումից հարկ գտնի: "Հարկ է նշել նաև, որ Հայաստանի կողմից զենքի գնումները, թեկուզ և Իրանից, ոչ մի անվտանգություն չեն ներկայացնում Իսրայելին, այն դեպքում, երբ Ադրբեջանին իսրայելական զենքի մատակարարումները լուրջ սպառնալիք են ներկայացնում Հայաստանի անվտանգության համար, ինչը ակնհայտ ցույց տվեց ղարաբաղյան երկրորդ պատերազմը", - նշել է նա:

Ցինկերն ընդգծել է, որ իսրայելական զենքի մատակարարումն անմիջապես այդ պատերազմի ընթացքում, այն պայմաններում, երբ մյուս բոլոր երկրները դադարեցրել են այդպիսիք, ամենաբացասական կերպով են ազդել  հայ-իսրայելական հարաբերությունների վրա: "Այնուամենայնիվ, ակնհայտ է, որ Հայաստանն իր մեջ ուժ գտավ շրջելու այդ մռայլ էջը ՝ Թել Ավիվում դեսպանատուն բացելով և Երևան-Թել Ավիվ ուղիղ ավիաչվերթով, քայլեր, որոնց, ցավոք, մինչ օրս չի հետևել Իսրայելի համանման պատասխանը", - հավելել է քաղաքագետը:

Միաժամանակ, Ցինկերը նշել է, որ իրականությանը չի համապատասխանում նաև այն պնդումը, թե "Իրանը վաղուց է զինում Հայաստանին։ Իրանի և Հայաստանի միջև համագործակցությունը սկիզբ է առնում Ղարաբաղյան առաջին պատերազմից" ։ "Իրանը ոչ մի կերպ չի մասնակցել ղարաբաղյան երկու պատերազմներին,մինչդեռ, Ադրբեջանի կողմից, ինչպես վերջերս պարզվեց Էրդողանի աղմկահարույց հայտարարության շնորհիվ, ակտիվորեն ներգրավված էր Թուրքիան, էլ չեմ խոսում Աֆղանստանից, Սիրիայից եւ նույն Թուրքիայից բազմաթիվ իսլամական վարձկանների մասին", - ընդգծել է փորձագետը: Այնուհետև, հիշեցնելով, որ Իրանն ու իր վստահված անձինք բացահայտ պատերազմ են մղում Իսրայելի դեմ, Թել Ավիվին ստիպելով գտնել զենքի նոր մատակարարներ  իր անվտանգությունն ապահովելու համար, Ցինկերը հարց է տվել, թե ինչու են Ոմանք զարմանում, որ այդպես է վարվում նաև ոչ մահմեդական Հայաստանը, որը թշնամական միջավայրում իր անվտանգության ապահովման ոլորտում բախվում է նույն մարտահրավերներին, ինչ Իսրայելը ։ "Իր հարեւանի հետ լավ հարաբերությունների պատճառով Հայաստանը դիվայնացնելու սիրահարներին պետք է հիշեցնել, որ լինելով քրիստոնյ0ա երկիր, այն ոչ մի կերպ ենթակա չէ Իրանի գաղափարական ազդեցությանը, ինչի մասին վկայում է Իսրայելի հետ բարեկամական հարաբերություններ զարգացնելու նրա ցանկությունը, եւ ոչ մի կերպ չի հանդիսանում շիական կիսալուսնի եւ չարիքի առանցքի անդամ: Իսրայելական մամուլում ժամանակ առ ժամանակ փորձում են Հայաստանից ստեղծել հակասեմականության բարձր մակարդակ ունեցող երկրի կերպար, իսկ Իսրայելի ազգային անվտանգության խորհուրդը, ըստ երևույթին, չկարդալով այդ հրապարակումները, Հայաստանը, ի տարբերություն իրեն շրջապատող բոլոր երկրների, մեկ-մեկ դասում է հրեաների համար ամենաապահով երկրների շարքին ՝ողջ եվրասիական տարածքում ։ Այսօր Հայաստանը որդեգրել է Արևմուտքի հետ մերձեցման ուղին ։ Ինչու պետք է նա վտանգի իր հետ հարաբերությունները՝ Իրանի հետ ինչ-որ կասկածելի գործարքով։ Բայց եթե նման կեղծ նյութ հրապարակվել է մեր երկրում, ուրեմն, այն ինչ-որ մեկին պետք է եղել։ Ում", - հարց է տվել Ցինկերը։