Փորձագետ. Վրաստանի խորհրդարանական ընտրությունների արդյունքները վկայում են Գլոբալ Հյուսիսն ընդդեմ Գլոբալ Հարավի գաղափարախոսական առճակատման նոր փուլի մասին

Արմինֆո. Վրաստանի խորհրդարանական ընտրությունների ողջ ընթացքն ու արդյունքները տեղավորվում են նոր երկբևեռության տրամաբանության մեջ:

Աշխարհը կրկին մտնում է գաղափարախոսական առճակատման փուլ՝ Գլոբալ Հյուսիսն ընդդեմ Գլոբալ Հարավի: Նման կարծիք է հայտնել քաղաքագետ Վահե Դավթյանը։

«ԲՐԻՔՍ+ կազանյան գագաթնաժողովը դրա կարևոր դրսևորումներից էր: Ընդ որում, նոր երկբևեռությունը որպես միջազգային հարաբերությունների նոր ՛՛նորմալություն՛՛ շարունակում են մատուցել բազմաբևեռության լոզունգների ներքո:

Մինչդեռ միջազգայնագիտության տեսությունից (Կապլան) մեզ հայտնի է, որ առնվազն 5 բևեռների առկայության դեպքում միայն կարելի է խոսել բազմաբևեռության մասին: Պարզ է, որ այսօր աշխարհն առավել քան հեռու է նման ցուցանիշից:

Աջ և ուլտրաաջ ուժերի շքերթն ամբողջ աշխարհում, այդ թվում՝ ազատական Եվրոպայում, Աֆրկայում ընթացող խորքային ապագաղութականացումը (Նիգեր, Գաբոն, Կոնգո, Բուրկինա-Ֆասո, առաջիկայում՝ Մալի, Էրիթրեա, Սուդան և այլն), շարունակվող ապավեստեռնիզացումը Կենտրոնական և Հարավային Ամերկայում, ասիակենտրոն նոր տնտեսական աշխարհակարգը և բազմաթիվ այլ գործընթացներ ու միտումներ վկայում են աշխարհում մեծ թափ հավաքող ՛՛աջ շրջադարձի՛՛ մասին:

Այդ շրջադարձի գլխավոր արդյունքներից է լինելու Վեստֆալյան համակարգի վերջանական ապամոնտաժումը և, որպես հետևանք, Իրավունքի նկատմամբ Աշխարհաքաղաքականության տոտալ հաղթանակը: Միտում, որն այսօր արդեն շատ հստակ է ուրվագծվում:

Այսպիսի նոր ՛՛նորմալության՛՛ պայմաններում գոյատևելու են բացառապես աշխարհաքաղաքական (տարածական) մտածողությամբ, պասիոնար և իդեոկրատ էլիտաներ ունեցող երկրները», - գրել է քաղաքագետը՝ «Ֆեյսբուքի» իր էջում:

Վրաստանի ԿԸՀ վերջին նախնական տվյալների համաձայն, 3111 ընտրատեղամասերից 3109 - ի ձայների մշակումից հետո, որը կազմում է դրանց ընդհանուր թվի 99.936% - ը, կառավարող "Վրացական երազանք-Ժողովրդավարական Վրաստան" կուսակցությունը հավաքել է 53.93% (1 118 796 ձայն): Երկրորդ տեղում է "Հանուն փոփոխությունների կոալիցիան՝ Գվարամիա, Մելիա, Գիրչի, Դրոա"՝ 11.03 տոկոսով (228 821 ձայն), որին հաջորդում է "Միասնություն - ազգային շարժումը" ՝ 10.161 տոկոսով (210 787 ձայն), "Ուժեղ Վրաստան. Լելո՝ ժողովրդի համար, հանուն ազատության" ՝ 8.814 տոկոսով (182 839 ձայն) եւ "Գախարիան Վրաստանի համար" կուսակցությունը՝ 7.771 տոկոսով (161 215 ձայն):

Ինչ վերաբերում է մնացած երկու ընտրատեղամասերին, Վրաստանի ԿԸՀ նախագահ Գեորգի Կալանդարիշվիլիի հայտարարության համաձայն, Մառնեուլի ընտրատեղամասերից մեկում ընտրությունների արդյունքները չեղյալ են հայտարարվել, իսկ Դուշեթի մյուս ընտրատեղամասից արձանագրություն չի ստացվել:

Հավելենք, որ ԵԱՀԿ/ԺՀՄԻԳ դիտորդական առաքելությունն արդեն հրապարակել է Վրաստանի խորհրդարանական ընտրությունների դիտարկման նախնական արդյունքները:

ԵԱՀԿ առաքելության համակարգող Պասկալ Ալիզարը նշել է ընտրությունների կազմակերպման լավ մակարդակը, սակայն թվարկել է մի շարք խնդիրներ. իրավիճակը լարված էր, քվեարկության գաղտնիությունը հաճախ խախտվում էր, տեղի էին ունենում ընթացակարգային անհամապատասխանություններ և խախտումներ:

Ալիզարը հայտարարել է նաեւ ահաբեկման եւ ճնշման փաստերի մասին, որոնք "բացասաբար են անդրադարձել ընտրողների վրա, եւ դա բացասաբար է ազդել գործընթացի վրա", ինչպես նաեւ ընտրությունների մասնակիցների ֆինանսական ռեսուրսների անհավասարակշռությունը, նախընտրական քարոզարշավի ժամանակ բեւեռացված մթնոլորտը եւ հակասական օրենսդրական փոփոխությունները: