Գլխավոր դատախազությունը պահանջում է 600 մլրդ դրամի գույքի և դրամական միջոցների բռնագանձում

Արմինֆո.Կառավարության այսօրվա երեք որոշումներով ՀՀ սեփականություն հանդիսացող 7 անշարժ գույք ամրացվել է ՏԿԵ նախարարության Պետական գույքի կառավարման կոմիտեին՝ դրանց հետագա տնօրինումն իրականացնելու նպատակով: Այդ մասին ասվում է կառավարության հաղորդագրությունում:

Ինչպես նշել է ՏԿԵ նախարար Դավիթ Խուդաթյանը, նշված 7 գույքերը վերադարձվել է Գլխավոր դատախազության հայցերի հիման վրա, Հակակոռուպցիոն դատարանի կողմից կայացրած դատական ակտերով: Գույքերի նկատմամբ արդեն իսկ գրանցված է ՀՀ սեփականությունը: «Գույքերը գտնվում են հիմնականում Երևան քաղաքում և Կոտայքի մարզում. ունեն տարբեր կադաստրային արժեքներ: Ամենամեծ կադաստրային արժեքով գույքը 730 մլն ՀՀ դրամ է»,- նշել է նախարարը:

Նիկոլ Փաշինյանը թվարկել է այդ գույքերը՝ Երևանի Ծիծեռնակաբերդի խճուղի 2/5 հողամաս հասցեում գտնվող 1.2 հա մակերեսով հողամասը. արժեքը՝ 730 մլն 462 հազար դրամ, Կոտայքի մարզի Ծաղկաձոր համայնքի Աղավնաձոր բնակավայրի Աղավնու աղբյուր թաղամասի թիվ 8 հասցեում գտնվող 2 հա մակերեսով հողամասը՝ արժեքը 730 մլն դրամ, Կոտայքի մարզի Ծաղկաձոր համայնքի Աղավնաձոր բնակավայրի Աղավնու աղբյուր թաղամասի թիվ 29 հասցեում գտնվող 0.5 հա մակերեսով հողամասը՝ արժեքը 9 մլն 388 հազար դրամ, Կոտայքի մարզի Ծաղկաձոր համայնքի Աղավնաձոր բնակավայրի Աղավնու աղբյուր թաղամասի թիվ 30 հասցեում գտնվող 0.4 հա մակերեսով հողամասը՝ արժեքը 9 մլն 382 հազար դրամ, Կոտայքի մարզի Ծաղկաձոր համայնքի Ծաղկաձոր քաղաքի Մկրտչյան փողոցի 32/1 հասցեում գտնվող 2.6 հա մակերեսով հողամասը՝ արժեքը 431 մլն 915 հազար դրամ, Կոտայքի մարզի Ծաղկաձոր համայնքի Ծաղկաձոր քաղաքի Մկրտչյան փողոցի 36/1 հասցեում գտնվող 2.6 հա մակերեսով հողամասը՝ արժեքը 427 մլն դրամ, Կոտայքի մարզի Չարենցավան համայնքի Արզական բնակավայրի թիվ 22 հասցեում գտնվող 3 հա մակերեսով հողամասը՝ արժեքը 86 մլն 625 հազար դրամ:

«Սա մեր ստանձնած քաղաքական հանձնառությունների իրավական, օրինական իրացումն է»,- ասել է Նիկոլ Փաշինյանը և ՀՀ գլխավոր դատախազ Աննա Վարդապետյանից հետաքրքրվել. «Հիմա մենք կարո՞ղ ենք արձանագրել, որ ապօրինի գույքի բռնագանձման մեխանիզմը ՀՀ-ում, ըստ էության, լիարժեք աշխատում է: Մենք զուգահեռաբար երկու մեխանիզմ էլ ունեք, մեկը՝ պետական շահերի պաշտպանության, և մի մեխանիզմ, որ նոր ենք ներդրել՝ համայնքային շահի պաշտպանության համակարգը, որը դարձյալ զրոյից է ներդրվել»:

Ի պատասխան Աննա Վարդապետյանը նշել է. «Թվարկված 7 գույքերի շուկայականին մոտարկված կադաստրային արժեքը շուրջ 1 միլիարդ 732 մլն դրամ է: Սա կադաստրային արժեքն է, և հետագա գնահատումը շուկայական արժեքի շրջանակներում մի քանի անգամ առնվազն գերազանցելու է հնչեցված թվային արտահայտումը: 2023-2024 թվականների ընթացքում Դատախազության երկու բացառիկ լիազորությունների՝ 2023 թվականի սկզբին ներդրված համայնքային շահերի պաշտպանության գործառույթի և ապօրինի ծագում ունեցող գույքի բռնագանձման շրջանակներում ընդհանուր վերադարձված գույքերի շուկայական արժեքի և դրամական միջոցների հանրագումարը գերազանցում է 30 մլն ԱՄՆ դոլարը: Ձեր հարցին պատասխանելով, թե արդյոք այլևս իրողություն է ապօրինի ծագում ունեցող գույքի բռնագանձումը, թե ոչ՝ արդեն դատական ակտով օրինական ուժի մեջ մտած վճռով հաստատված է, որ այդ ինստիտուտը գործում է և եռաստիճան դատական համակարգում վերջնական օրինական ուժի մեջ մտած վճռով ունենք ամբողջությամբ բավարարված հայց»:

ՀՀ գլխավոր դատախազը նշել է, որ Հակակոռուպցիոն դատարանի՝ 2024 թվականի հուլիսի 15-ի վճռով, խոսքն առաջին ատյանի դատարանի մասին է, գլխավոր դատախազության հայցադիմումն ամբողջությամբ բավարարվել էր, և վճռի հիման վրա, որն օրինական ուժի մեջ է մտել տարեսկզբին, ՀՀ սեփականության իրավունքն է արդեն գրանցվել Երևան քաղաքի Վարդանանց փողոցում գտնվող մեկ բնակարանի և Կոտայքի մարզի Առինջ համայնքում գտնվող 1 բնակելի տան նկատմամբ: Հօգուտ ՀՀ-ի բռնագանձվել է նաև 50,720 եվրոյին համարժեք շուրջ 22 մլն դրամ: «Վճռի մնացած մասի կատարման նպատակով գլխավոր դատախազությունը դիմել է Հակակոռուպցիոն դատարան՝ խնդրելով տրամադրել կատարողական թերթ, որպեսզի հարկադիր կատարման ծառայության միջոցով մնացածը կատարվի»,- ասել է Աննա Վարդապետյանը:

ՀՀ գլխավոր դատախազը նաև տեղեկացրել է, որ մինչ այժմ ապօրինի ծագում ունեցող գույքի բռնագանձման վարույթի շրջանակում վերադարձված գույքերը հաշտություններ են եղել: «Ապօրինի ծագում ունեցող գույքի բռնագանձման մեր գործառույթի շրջանակում այս պահին ներկայացված հայցադիմումների թիվը 136-ն է, որոնք տարբեր ատյանների դատարաններում են: Հիշեցնենք, որ այդ հայցադիմումներով պահանջում ենք բռնագանձել 270 շարժական, 1381 անշարժ գույք, 359 իրավաբանական անձում մասնակցություն: Մոտավոր դրամական պահանջն այս պահին կազմում է 527 մլրդ դրամ: Ընդհանուր հայցագինը կազմում է շուրջ 600 մլրդ դրամ, իհարկե այս թիվը ևս շուկայական և կադաստրային արժեքների հարաբերակցության արդյունքում կփոխվի»,- նշել է Աննա Վարդապետյանը:

Գլխավոր դատախազն անդրադարձել է նաև անցած տարի գործարկված՝ վերականգնված միջոցների միասնական հաշիվ մեխանիզմին. գործարկման օրվանից՝ դեկտեմբերի 5-ից, մինչ օրս վերականգնված միջոցների միասնական հաշվին մուտքագրվել է շուրջ 10 մլրդ 283 մլն դրամ: «Սա տնտեսական հանցագործությունները չի ներառում: Այսինքն՝ բոլոր այն հանցագործությունները, որոնք կապված են հարկային պարտավորությունների չկատարման հետ, բոլոր այդ վերականգնումները վճարվելու են ոչ թե այս հաշվեհամարին, այլ համապատասխան հարկ վճարողների համար նախատեսված հաշվեհամարին»,- ընդգծել է Աննա Վարդապետյանը:

Նշվել է նաև, որ Կառավարության որոշմամբ նախաքննական մարմինները Գլխավոր դատախազություն են փոխանցում տեղեկատվություն՝ քրեական վարույթներով որպես գույք փաստացի արգելադրված դրամական միջոցների վերաբերյալ: Այդ տեղեկատվությունը գտնվում է ամփոփման փուլում և սահմանված ժամկետում՝ 2025 թվականի հուլիսի 30-ին, Գլխավոր դատախազությունը կհրապարակի նաև տեղեկատվություն քրեական վարույթներով որպես գույք փաստացի արգելադրված դրամական միջոցների վերաբերյալ:

Նիկոլ Փաշինյանն ընդգծել է նաև, որ 2024 թվականի ընթացքում հարկային հանցագործությունների հետ կապված քրեական գործերով 43 մլրդ դրամի վերականգնում է եղել. «Բայց սա ամբողջը չէ, և՛ համայնքային, և՛ պետական շահի պաշտպանության ոլորտներում մենք արդեն ունենք լուծումներ և դրանց մասին հրապարակումներ արվել են»:

Վարչապետը նշել է՝ ձևավորվել է պետական ինստիտուտ, որը դուրս է նախկին-ներկա տրամաբանությունից. «Վերաբերում է բոլորին, բոլոր այն դեպքերին, երբ ապօրինի գույք է ձեռք բերվել, և այդ ապօրինի գույքի ձեռքբերման մեխանիզմ է ձևավորվել: Իհարկե, մենք նաև պետք է ուշադիր լինենք, որ այդ թվում՝ միջազգային ատյաններում գնա, հաստատվի, ընկնի տեղը, որպեսզի լրացուցիչ խնդիրներ չառաջանան: Բայց փաստն այն է, որ ինստիտուտն այսօր արձանագրված է և աշխատում է»:

Թեմայի շրջանակում Աննա Վարդապետյանն անդրադարձել է նաև առանձին համայնքների մասով վերականգնումներին. «Օրինակ՝ երեկ Արարատի մարզի տվյալներն ամփոփելու արդյունքում պարզվեց, որ 2024 թվականի ընթացքում համայնքին վերադարձվել է 900 հազար դոլարի չափով գույք և դրամական միջոց: Շարունակվում են ամփոփումները: Կարծում եմ շատ կարևոր է, որ բոլոր գույքերը, որոնք վերադարձվում են համայնքին, չդառնան վարչական ծախս, այլ դառնան հանրային բարիք»: