Ռուսաստանի ԱԳ նախարարը դեմ է աշխատանքային միգրանտների համար վիզային ռեժիմին

Արմինֆո. Ռուսաստանը պետք է խստացնի հսկողությունը աշխատանքային միգրանտների վարքագծի նկատմամբ, բայց նրանց նկատմամբ վիզային ռեժիմ չսահմանի։ Այդ մասին հայտարարել է ՌԴ ԱԳ նախարար Սերգեյ Լավրովը՝ Պետդումայում կառավարական ժամի ընթացքում։

"Մենք ելնում ենք այն բանից, որ պետք է խստացնել վերահսկողությունը նրանց վարքագծի նկատմամբ ։ Բայց խոչընդոտներ չդնել, առավել ևս՝ վիզային ռեժիմ չմտցնել։ Այո, այն կարգի համեմատ, որը գոյություն ուներ, լրացուցիչ միջոցներ են ձեռնարկվում։ Բայց դրանք հենց ուղղված են վերահսկողության խստացմանը, այլ ոչ թե աշխատանքային միգրացիայի համար խոչընդոտների ստեղծմանը", - ասել է Լավրովը՝ պատասխանելով միգրանտների նկատմամբ մոտեցումների հնարավոր փոփոխության մասին խորհրդարանականների հարցին։

Ընդհանուր առմամբ, Լավրովը վստահություն է հայտնել, որ"Կենտրոնական Ասիայի երկրներից, առաջին հերթին ՝ Անդրկովկասից, նախկին այլ հանրապետություններից աշխատանքային միգրանտների նկատմամբ մոտեցումների որեւէ խստացում չի նպաստի երկարաժամկետ շահերին": "Այո, իհարկե, կարգուկանոնին պետք է հետևել։ Բազմաթիվ խախտումներ են արձանագրվել մի շարք աշխարհագրական ուղղություններով, որտեղից գալիս են միգրանտները", - ըստ ՏԱՍՍ-ի՝ խոստովանել է ՌԴ ԱԳ նախարարը։

Նա նաև նշել է, որ ռուսական կողմը հատուկ մի քանի հանդիպում է ունեցել Եվրասիական տնտեսական միության անդամ երկրների դեսպանների հետ: "Մանրամասն պատասխանել ենք նրանց հարցերին, բացատրել ենք այն տրամաբանությունը, որով մենք առաջնորդվում ենք։ Իսկապես, ԵԱՏՄ ստեղծման մասին հիմնարար փաստաթղթերում գրված է, որ միության բոլոր անդամ երկրների քաղաքացիներն ունեն հավասար իրավունքներ՝ եկեք առանց որևէ հրավերի, մի հաստատեք, թե որտեղ եք աշխատելու և այլն ։ Բայց, հավանաբար, դա դեռ պետք է կոնկրետացնել", - պարզաբանել է նա։

Ինչպես ավելի վաղ հաղորդել էր ԱրմԻնֆո-ն, այդ առնչությամբ իր մտահոգությունն է հայտնել

ԱԺ  "Հայաստան" խմբակցության ընդդիմադիր պատգամավոր Գառնիկ Դանիելյանը, նշելով, որ հայկական բեռնատարների վարորդները կարող են խնդիրներ ունենալ՝ Ռուսաստանի միգրացիոն օրենսդրության փոփոխությունների առնչությամբ, որոնց համաձայն, կրճատվել են ՌԴ-ում օտարերկրյա  քաղաքացիների գտնվելու ժամկետները:

Նշենք, որ 2025 թվականի հունվարի 1-ից, Ռուսաստանի Դաշնության 2024 թվականի օգոստոսի 8-ի դաշնային օրենքի համաձայն, ուժի մեջ են մտնում Ռուսաստանի Դաշնություն առանց վիզայի մուտք գործող օտարերկրյա քաղաքացիների ժամանակավոր կացության թույլատրելի ժամկետի փոփոխությունները ։ Ռուսաստանի տարածքում օտարերկրացիների այս կատեգորիայի գտնվելու ժամկետը կրճատվել է մինչև 90 օր, ընդհանուր առմամբ, օրացուցային տարվա ընթացքում (նախկինում նշված անձինք կարող էին Ռուսաստանում գտնվել ոչ ավելի, քան 90 օր 180 օրվա ընթացքում):

Բացառություն են կազմում 2002 թվականի հուլիսի 25-ի դաշնային օրենքով նախատեսված դեպքերը, երբ Ռուսաստանի Դաշնությունում օտարերկրյա քաղաքացու ժամանակավոր գտնվելու ժամկետը երկարաձգվում է նշված դաշնային օրենքին համապատասխան: Խոսքը այն պետությունների քաղաքացիների մասին է, որոնց հետ կնքվել են քաղաքացիների փոխադարձ առանց վիզայի այցելությունների մասին համապատասխան միջկառավարական համաձայնագրեր, որոնք սահմանում են Ռուսաստանի տարածքում գտնվելու այլ ժամկետ, ինչպես նաև՝ կրթություն ստանալու, աշխատանքային գործունեություն իրականացնելու, ժամանակավոր բնակության կամ ապաստան ստանալու նպատակով երկրի տարածք մուտք գործող օտարերկրացիների մասին։