«Հայաստան» դաշինքը բարեհաջող տապալեց թե՛ փողոցներ փակելու գործը, թե՛ իր իսկ կողմից նախաձեռնված քննիչ հանձնաժողովի աշխատանքը. Բաբկեն Թունյան

Արմինֆո.  «Հայաստան» դաշինքը բարեհաջող տապալեց թե՛ փողոցներ փակելու գործը, թե՛ իր իսկ կողմից նախաձեռնված քննիչ հանձնաժողովի աշխատանքը: Նման կարծիք է հայտնել "Քաղաքացիական պայմանագիր" խմբակցության պատգամավոր, տնտեսական հարցերի մշտական հանձնաժողովի նախագահի տեղակալ Բաբկեն Թունյանը ։

Նա հիշեցրել է, որ 2021 թվականի հոկտեմբերին Ազգային ժողովում «Հայաստան» դաշինքի նախաձեռնությամբ ձևավորվել էր «Հայաստան» համահայկական հիմնադրամի կողմից հավաքագրված եւ Հայաստանի Հանրապետության պետական բյուջե փոխանցված միջոցների օգտագործումը ուսումնասիրող քննիչ հանձնաժողով:

«Մենք ոչ միայն չընդդիմացանք, այլ հակառակը՝ ողջունեցինք և ներգրավվեցինք հանձնաժողովի աշխատանքներին, որպեսզի հանրությանը հուզող բոլոր հարցերի պատասխանները ստացվեին: Որովհետև անհիմն մեղադրանքներ էին հնչում 44-օրյա պատերազմի ժամանակ հանգանակված միջոցների ծախսման մասին:

Քննիչ հանձնաժողովը Արծվիկ Մինասյանի նախագահությամբ մի քանի նիստ արեց, որից հետո մեր ընդդիմության հետաքրքրությունն իր իսկ ստեղծած նախաձեռնության նկատմամբ կորավ:

Հանձնաժողովը ստեղծվել էր 6 ամիս ժամկետով և մինչև ժամկետի լրանալը պետք է կա՛մ աշխատանքն ավարտած լիներ ու եզրակացություն ներկայացներ, կամ պետք է առաջարկվեր հանձնաժողովի աշխատանքը երկարաձգել ևս 6 ամսով:

2022 թվականի ապրիլին, սակայն, «Հայաստան» դաշինքի պատգամավորները փողոցներ փակելով (քաղաքական բոյկոտով) էին զբաղված և չներկայացան ԱԺ նիստին, որպեսզի հանդես գան նման առաջարկով: Եվ հանձնաժողովը, որպես այդպիսին, դադարեց գոյություն ունենալ:

Փաստացի, «Հայաստան» դաշինքը բարեհաջող տապալեց թե՛ փողոցներ փակելու գործը, թե՛ իր իսկ կողմից նախաձեռնված քննիչ հանձնաժողովի աշխատանքը:

Ինչո՞ւ սա հիշեցրի: Վարչապետ Նիկոլ Փաշինյանը կառավարության երեկվա նիստում խոսել էր «Հայաստան» հիմնադրամի այս պատմության մասին, և հիշեցրել, որ ընդդիմությունը քննիչ հանձնաժողով էր ստեղծել, որն այդպես էլ ոչինչ չբացահայտեց:

Ռոբերտ Քոչարյանի գրասենյակի ղեկավարը, արձագանքելով վարչապետի խոսքերին, փոխանակ խոսի բուն թեմայից՝ իրենց կողմից ստեղծված քննիչ հանձնաժողովի աշխատանքից ու դրա փաստացի տապալումից, կրկնել է այն թեզերը, որոնք տարածում էին «Հայաստան» դաշինքի անդամները, մինչև իրենց կողմից հանձնաժողով ստեղծելը (արձագանքը տեղադրում եմ մեկնաբանություններում):

Սա է ամբողջ պատմությունը ու մեր ընդդիմադիր գործենկերների աշխատաոճը. խոսել ինչ-որ բանի մասին, մեղադրանքներ հնչեցնել, դրանք ապացուցելու համար հանձնաժողով ստեղծել, հետո այն անգործության մատնել ու փաստացի ձախողել, հետո էլի խոսել նույն բանի մասին», - գրել է Բաբկեն Թունյանը՝ «Ֆեյսբուքի» իր էջում: